Nkahm 1 - Uwumbɔr aagbaŋ

Baah nan kahn Israel yaab njan pu na

¹ Israel yaab aah nan nyan Ijipt aatiŋ ni, ni ti saa ŋibin ŋilee na, lelee aaŋmal ni, njan aawiin daal, le Uwumbɔr nan len Moses chee tibɔr, uma Uwumbɔr Aabool ni, Sainai Aateersakpiin ni. U nan bui Moses ke,

² “Aa ni Aaronn kahn Israel yaab itaŋaal itaŋaal, ni mmaal mmaal. Ŋmee bijab

³ bi ye ŋibin moninko, ni bi jer kina, ki ga ŋmaa buen butɔb na aayimbil.

⁴ Nyan itaŋaal mɔmɔk ponn ni uyidaan ubaabaa, bi li ye Israel yaab aanibol mɔmɔk ni aanib, aan bi ter nimi.”

^5-16 Bijab bimina le nan ye bisalolm bi nan bi baanibol ni, aan bi nyan bi baanib ponn ni, ke bi ter lituln ngbaan ni na: Linibol Ntaŋaal Aasaloln Rubenn Sedeur aajapɔɔn Elisur Simeonn Surisadai aajapɔɔn Selumiel Juda Aminadab aajapɔɔn Nasonn Isakar Suar aajapɔɔn Netanel Sebulunn Helonn aajapɔɔn Eliab Efraim Amihud aajapɔɔn Elisama Manase Pedasur aajapɔɔn Gamaliel Benjaminn Gideoni aajapɔɔn Abidann Dann Amisadai aajapɔɔn Ahieser Aser Okrann aajapɔɔn Pagiel Gad Dewel aajapɔɔn Eliasaf Naftali Enann aajapɔɔn Ahira

Linibol Ntaŋaal Aasaloln

¹⁷ Bijab kipiik ni bilee bee le nan ter Moses ni Aaronn

¹⁸ bi nan yin ŋipepel ngbaan aanib mɔmɔk, lelee aaŋmal ni, njan aawiin daal, le ki ŋmee binib ngbaan aayimbil itaŋaal itaŋaal, ni mmaal mmaal. Bi nan ŋmee bijab bi aabin ye moninko, ni bi jer kina na aayimbil, le ki kahn bi mɔmɔk,

¹⁹ Uwumbɔr aah nan bui ke bi ŋa pu na. Sainai Aateersakpiin ni, le Moses nan kahn binib ngbaan.

^20-46 Bijab bi nan ye ŋibin moninko, ni bi jer kina, ki ŋeer bi to butɔb na, bi nan ŋmee baayimbil baataŋaal ni, ni baamaal ponn ni. Bi nan piin Jakob aajan aabijabo u bi nan yin u ke Rubenn na aanibol ponn ni la. Baah nan saa pu na sɔ: Linibol Nkahm Rubenn ŋichur imonko ilee ni ŋiloob, ni ikui iŋmu Simeonn ŋichur piiŋmu ni ŋiwae, ni ikui itaa Gad ŋichur imonko ilee ni ŋiŋmu, ni ikui iloob ni piiŋmu Juda ŋichur imonko itaa ni kipiik ni ŋinaa, ni ikui iloob Isakar ŋichur piiŋmu ni ŋinaa, ni ikui inaa Sebulunn ŋichur piiŋmu ni ŋilole, ni ikui inaa Efraim ŋichur imonko ilee, ni ikui iŋmu Manase ŋichur piitaa ni ŋilee, ni ikui ilee Benjaminn ŋichur piitaa ni ŋiŋmu, ni ikui inaa Dann ŋichur imonko itaa ni ŋilee, ni ikui ilole Aser ŋichur imonko ilee ni libaa, ni ikui iŋmu Naftali ŋichur piiŋmu ni ŋitaa, ni ikui inaa Bi mɔmɔk aah ti kpaan saa pu na sɔ: ŋichur ikui iloob ni ŋitaa, ni ikui iŋmu ni piiŋmu.

Linibol Nkahm

⁴⁷ Baa nan kahn Liifai yaab kpaan ŋinibol ŋiken chee;

⁴⁸ ba pu? Uwumbɔr nan bui Moses ke,

⁴⁹ “Aa yaa ban aa kahn bijab bi ŋeer bi to butɔb na kan, taa kahn Liifai aanibol.

⁵⁰ Di Maabool li m bi li ponn ni na, ni laawan mɔmɔk aatuln, di tii Liifai yaab bi li tun. Bima le ga li tui laawan mɔmɔk, ki li tun lituln li ponn ni, ki kal gob li.

⁵¹ N‑yoonn mumɔk ni ti fii ki cha na kan, Liifai yaab le ga kpab Libool ngbaan aawan mɔmɔk, le ki ti ki gaa Libool ngbaan nimi aakakaapɔɔn chee. Unii umɔk dan li chee, kaa ye Liifai yaab ponn ni na kan, u ga kpo la.

⁵² Israel yaab bi gur na ga kal ŋigetek, ŋigetek, unii mɔk ni waanib, baatuutaa taab.

⁵³ Le Liifai yaab ma ga kal gob Libool ngbaan ki li kii li, aan nima kan, biken taa duun li, ki cha maaŋuul fii aan m bii Israel yaab.”

⁵⁴ Nima pu na, Israel aanib ngbaan nan ŋa tiwan ni mɔmɔk Uwumbɔr nan bui Moses ke bi ŋa na.