Ŋiyataŋak 9 - Uwumbɔr aagbaŋ

Nlan ni kijɔrk aabɔr

¹ Nlan le maa lidichal, le ki maa ŋitakpal aajaatɔlk tiib bilole kiir lidichal ngbaan.

² Mu nan ku kiwakork ke mu ji njim, le ki di tiwan ni nu mɔ na ŋmal ndaan ni, le ki gor ni mɔmɔk siin.

³ Mu nan tun mu aanaagbiisapɔm ke bi ti sil kitiŋ ni nin chee paa sakpen sakpen na ki yin ke,

⁴ “Nimi maa‑nyi‑nibaa‑dam, dan man,” le ki bui bijɔrb ke,

⁵ “Dan ki nan ji maajikaar, ki nyu maadaan mu m ŋa na.

⁶ Nya maa‑nyi‑nibaa‑dam chee man, ki kan limɔfal. Li dii nlan aasan man.”

⁷ Aa yaa sur unii u yoor ubaa paacham sakpen na kan, ŋisiibil le u ga di giin tii si. Aa yaa sur kinimbɔŋdaan kan, u ga tii si titotonn.

⁸ Taa sur unii u yoor ubaa paacham sakpen na, u ga li nan si nsurm ngbaan pu. Tɔ, aa yaa sur ulandaan ma kan, u ga li gee si.

⁹ Saah di tiwan nimɔk tuk ulandaan na moo kpae u nlan la. Tiwan ni aa di tuk unii u kpa mbimbinyaan na moo kpae u nlan la.

¹⁰ Aa yaa ban aa li kpa nlan kan, puen bee Uwumbɔr ke uma le yeh kipak mɔmɔk. Aa yaa bee Uwumbɔr u ye Chain na kan, aa sil kpa nlan.

¹¹ Nlan ga di ŋibin pam moo kpee saamɔfal pu.

¹² Sin u kpa nlan na le ga kan tinyoor, le sin u yii nlan na ga ji falaa.

¹³ Igbaan bi ke upii u kpa kifuuk, kaa nyi nibaa, kaa san inimɔɔn kpala na la.

¹⁴ U ka waadichal aabisamɔb, bee kitiŋ ni, nin chee paa sakpen sakpen na,

¹⁵ le ki ka tar yin binib bi chuun bibaa pu ki jer u chee na ke:

¹⁶ “Maa‑nyi‑nibaa‑dam, dan man,” le ki bui bijɔrb ke,

¹⁷ “Nnyun sukaan mɔ jer aabaa yoo. Tijikaar sukaan mɔ jer aabaa yaar.”

¹⁸ Binib bi chaa u chee na aa nyi ke binib bi puen buen udo na kpoi la, baa nyi ke binib bi puen buen u chee na kpaan sunn buen bitekpiib do a.