Ŋiyataŋak 8 - Uwumbɔr aagbaŋ

Nlan aapak

¹ Li pel man. Nlan le yin nimi. Ichiin le yin nimi.

² Mu bi ŋijoo pu, ki chuun isan ni, ki si isayakr mɔmɔk ni ki yin.

³ Mu si ntim aabisamɔi ki yin, ki len ke;

⁴ “M gaŋni si, unibɔn; m yin unii umɔk bi kitiŋ pu na.

⁵ Ni laa ye bibilb la aa? Bae nlan man. Ni ye bijɔrb la aa? Bae nlan man.

⁶ Li pel man maamɔbonyaan ŋee; ŋi mɔmɔk ye ibamɔn la.

⁷ Maah len pu na ye mbamɔn la; maa geei inyamɔn.

⁸ Maah len tiwan ni mɔmɔk na ye ibamɔn la, nibaa aa ye inyamɔn, bee tiwan ni ga cha aa yenn na.

⁹ Ni wiin chain unii u kpa nlan na chee la, ni nyan dɔ mpaan pu unii u kpa ichiin na chee la.

¹⁰ Lee maamɔkm ki di cha ŋimombil, lee nnyim ki di cha salmaa.

¹¹ Min le ye nlan, m ŋan jer nleen mu ŋan sakpen na. Nlan ŋan jer saah neen tiwan ni mɔmɔk na.

¹² Min le ye nlan, m kpa ŋuntii, m kpa ichiin le ki nyi tiwan ni ŋan na, ni ni kaa ŋan na.

¹³ Saah ga nyuŋ Uwumbɔr pu na le ye ke aa yii kinimbɔŋ; maa gee kigaak, ni inimpoo, ni kinimbɔŋ aasan, ni inyamɔn aamɔliin.

¹⁴ M ŋani laasaab waahr le ki tun maatuln. M kpa ichiin, le ki pɔɔ.

¹⁵ M ter bibɔrb le bi joo baanib, le ki ter biyidam le bi siini ikaal i ŋan na.

¹⁶ Maaterm pu le uyidaan umɔk bi kitiŋ kee pu na ŋmaa joo waanib, kina le m ter bijojoob ni bininyuum mu.

¹⁷ M gee binib bi gee mi na; unii umɔk ban mi na ga kan mi.

¹⁸ M kpa liwankpal ni kinyuŋ, ni liwangol li kaan doo na, ni ibamɔn m tii nimi.

¹⁹ Saah ga kan tiwan ni m chee na ŋan jer salmaa u ŋan sakpen na, ki ŋan jer ŋimombil mɔmɔk.

²⁰ M chuun mbimbinyaan, ni ibamɔn aasan ni la,

²¹ le ki joo liwankpal tii binib bi gee mi na, ki joo nkam gbiini baadichal ni.

²² Min le Uwumbɔr nan pue naan njan, waahr aan u nin naan tiwan nibaa.

²³ Min le u nan pue naan njan, le dulnyaa nin piin.

²⁴ M nan bi waahr le nnyusakpem nin naan, n‑yoonn ngbaan inyunbun aa nan kee bi.

²⁵ M nan bi waahr le Uwumbɔr nin naan ŋijoo ni ŋigongon,

²⁶ m nan bi le Uwumbɔr nin naan kitiŋ ni kaakpaakon, ni njan aatan ti ga gbiin liŋaakul libaa na.

²⁷ M nan bi le u di kitaapaak siin kaabuul ni, ki taln ntaalangbam ti siin nnyusakpem aanaanmɔk,

²⁸ m nan bi le u di ntaalangbam di ŋa kitaapaak ni, m nan bi le u chuu piir nnyusakpem aanyunbun

²⁹ le ki bui nnyusakpem aanyun ke mu taa ki fii ti jer waah siin mu nin chee na. M nan bi le u naan kitiŋ aatinyikl.

³⁰ M nan si u chee ke unii u bi mɔk udimaar na la; min le nan ye waawiin mɔmɔk aamɔɔn, le ki kpa u chee mpopiin n‑yoonn mɔmɔk,

³¹ m nan kpa dulnyaa pu mpopiin, le nsui piin unibɔn pu.

³² Tɔ, maabim, li pel m chee man. Ŋa maah len pu na man, ki li kpa mpopiin.

³³ Li pel baah mɔk nimi tiwan ni na man. Li kpa nlan man, ki taa lik mu fam kpala.

³⁴ Unii u ŋun tii mi na kpa mpopiin; unii u ka maadichal aabisamɔb, ki ka kii mi iwiin mɔmɔk na ga li kpa mpopiin.

³⁵ Unii u kan mi na kan limɔfal la, le Uwumbɔr ga li gee u.

³⁶ Unii umɔk aa ban kan mi na tii ubaa titotonn la; unii umɔk kaa gee mi na gee nkun la.”