Ŋiyataŋak 6 - Uwumbɔr aagbaŋ

Nsakm muken

¹ Maabo, aa puu tipuur ke aa ga gaa ubaa aapɔln ki pa aa?

² Aabaa aabɔlen kee chuu si koon tibɔr ni ii? Bee saah puu tipuur ti na kee chuu si ii?

³ Aa yaa koo kina aabɔr ni kan, saah ga ŋa pu ki nya na sɔ. Ŋa mala ki buen udaan chee ki ti gaŋ u ke u di cha pinn si.

⁴ Taa li dɔ geen. Taa sil ke aa fuur waahr aan ki nin buen.

⁵ Nya gaawɔb ngbaan ni mala ke unyoon, bee upeeyun aah ŋmar ukpan pu na.

⁶ Bigbanyakdam, lik man inyann aah bi pu na ki bae mbaem i chee.

⁷ Yaa kpa usaloln, kaa kpa ubɔr, bee ujojoor,

⁸ i mu tee kuuni yaajikaar lipeel la, ki gor ki kii kiseek.

⁹ Bayoonn aan ugbanyakdaan ga finn ngeen pu? U ga doon ki yunn kinye?

¹⁰ Waamɔliin le ye ke, “Cha m doon geen siib, m ga bɔɔb ŋŋaal ki fuur siib.”

¹¹ Tɔ, buyoonn u dɔ geen na le igiin ga dan ki nan chuu u ke unaayuk‑pɔɔl na.

¹² Nifam mam ni bibiindam le geei inyamɔn.

¹³ Bi kae binimbil ki yoor si iŋaal ke bi ŋmann si la,

¹⁴ le ki bi dak tibɔbir baasuuwanbir ngbaan ni, ki fikr tibɔkpokr ni kookoo.

¹⁵ Nimina pu na, tibɔbir yaa ga pii bi kan, baan li nyi ti pu, le bi ga kan iween i ga ku bi na.

^16-19 Tiwan nilole nibaa le bi aan Uwumbɔr kaa gee ni, kaan ŋmaa gaa ni ŋa usui ni. Nima le ye: Kigaak aanimbilikl, ni lilambil li geei inyamɔn na, ni iŋaal i ku bininyaam na, ni nsui mu dakl tilandakwanbir na, ni ŋitaa ŋi chuun mala cha ŋi ti tun titunwanbir na, ni useeraadaan u geei inyamɔn ki ki gir geei na, ni unii u fikr tibɔr jɔtiib aakaasisik ni na.

Kidagook aasurm

²⁰ Maabo, ŋa aate aah tuk si pu na, ki taa suln aana aah mɔk si pu na.

²¹ Li joo baabɔr n‑yoonn mɔmɔk, ki di ti laŋ ŋa aapobil ni.

²² Aa yaa cha nsan kan, baamɔkm le ga di si buen, ki li kii si kinyeek, ki sur si nwiin pu.

²³ Baamɔkm ye nwiin mu moor lak lak na la, baasurm ga ŋmaa mɔk si saah ga li bi pu na.

²⁴ Baamɔkm ga ŋmaa nyan si bipiidagoob chee, ki ga nyan si aaŋeen aatɔ aapuu aamɔmɔɔn ni.

²⁵ Taa cha baanyaan chuu si, ki taa cha baadagoonimbil chuu si.

²⁶ Uja ga ŋmaa di liboroboro kpiln libaa aamombil daa pateer, le aa yaa doon aaŋeen aatɔ aapuu chee kan, ni ga ŋmaa gaa saamɔfal aa chee.

²⁷ Aa ga ŋmaa di mmii tam aabiŋ aan mu taa gaa saawanpeenkaan aa?

²⁸ Aa ga ŋmaa chuun mmiisakɔn ni aan mu taa wu aataa aa?

²⁹ Aa yaa ban aaŋeen aatɔ aapuu kan, ni mu bir kina la. Unii umɔk ŋa kina na ga ji falaa.

³⁰ Nkon yaa joo unaayuk aan u ti sun tijikaar kan, baan lik seen u;

³¹ bi yaa chuu u kan, u ga pa waah sun pu na nfum mulole, u ga di waawankpal mɔmɔk pa ni pu.

³² Uja umɔk gɔr kidagook na aa kpa nlan kpala. U bi bii ubaa la.

³³ Bi ga gbaa u ki jinn u inimɔɔn; bi ga li jinni u inimɔɔn n‑yoonn mɔmɔk la.

³⁴ Upii aachal aaŋuul fiir sakpen buyoonn lipiipoln joo u na la; waah ga teen uja ngbaan pu na aa kpa ndoon.

³⁵ Waan gaa tipar tibaa kina pu. Ipiin ibaa aa bi ki ga ŋmaa sɔŋ usui.