Ŋiyataŋak 5 - Uwumbɔr aagbaŋ

Kidagook aasurm

¹ Maabo, pel mbamɔm, ki ŋun maalan ni mbaem.

² Kina kan, aa ga li nyi saah ga li bi pu na, ki cha saamɔliin mɔk ke aa kpa nlan.

³ Nibaakan aaŋeen aatɔ aapuu aamɔgban ga li mirk ke tisiir na,

⁴ le waah ga moor aamɔb pu na ga li ŋar ke olif aakpan na, tɔ, li nyi tiwan ni ga dan nee aapuwɔb na, mpombiin ni iween le u ga di tii si buyoonn ni ti doo na.

⁵ U ga di si kunn bitekpiib chee. Waah chuun waasan mu pu na cha nkun ni la.

⁶ Waa bi limɔfal aasan ni; le ki nya do ki ti nya do kaa nyi tiwan ni bi ŋani na.

⁷ Njapɔtiib, li pel dandana wee man, ki taa suln maah bi len pu na man.

⁸ Li san kina aapii man. Taa duun waabisamɔb man.

⁹ Ni yaa ŋa kina kan, binib bibaa le ga nan gaa naah kpa liyimbil li na, le ni ga kpo nimi aanachipɔnn ni, bibiindam aaŋaal ni.

¹⁰ Mbamɔn, bicham le ga gaa nimi aawangol, le naah tun ki kan tiwan ni na ga kpaln bibaa yaan.

¹¹ Aa ga li dɔ saakun aawandookaan pu ki du, ki donn kpakl kpakl,

¹² le aa ga bui ke, “Ba ŋa m nan yii kaa bae? Ba ŋa maa nan cha ubaa sur mi?

¹³ M nan yii kaa ŋun tii binib bi nan mɔk mi na. Maa nan pel baamɔbon,

¹⁴ le ki nan kpaan yoork mbaa binib ni.”

¹⁵ Cha aasui li bi aapuu baanja ni, ki di saageehm tii uma baanja.

¹⁶ Saah ma mbim mu bipiib biken chee na aan ŋa si tinyoor.

¹⁷ Ni ŋan ke saabim muun ki nan ter sin la, naa ye biniyayam.

¹⁸ Kina pu na, li kpa aapuu chee mpopiin ki kan mmɔɔn usapɔɔn u aa nan yoor na chee,

¹⁹ u kpa kinyaan ki bi suuna ke upeeman na la. Cha waanyaan tii si mpopiin ki cha u di waageehm tii si.

²⁰ Maabo, ba ŋa aa joo saageehm tii upii uken? Ba ŋa aa tee gee aaŋeen aatɔ aapuu aanyaan ki jer aayoo?

²¹ Uwumbɔr kani saah ŋani tiwan ni na mɔmɔk. U waa si saasachun mɔmɔk ni.

²² Ubiindaan aatunwanbir ye gaawɔb la. Uma ubaa aatunwanbir le chur u.

²³ Waah kaa ŋmaa chur ubaa pu na le ku u. Waajɔrk sakpeŋ le ga tun u waakaakul ni.