Ŋiyataŋak 31 - Uwumbɔr aagbaŋ

Ubɔr aasurm

¹ Ubɔrkpaan Lemuel aana aabɔkpaan ti u nan tuk u na sɔ:

² “Sin le ye njapɔɔn u m gee u na, u Uwumbɔr nan di gaa maameel na. M ga bui si ke ba?

³ Taa di saapɔɔn ni saamombil mɔmɔk tii bipiib. Bi puun ku bibɔrb a.

⁴ Lemuel, li pel. Naa ŋan ke bibɔrkpaam li nyu ndaan, bee bi li neen ndaan sakpen.

⁵ Bi yaa nyu ndaan kan, bi suln ikaal la, le ki yii binib bi bi limukl ni na, kaa tii bi baabamɔn.

⁶ Ndaan ye binib bi bi kpoi na aawan la, ni binib bi bi kinimbaak ni na.

⁷ Cha bima li nyu ki suln baagiin ni baapombiin pu.

⁸ “Len tii binib bi kaa ŋmaa len na. Li kii binib bi kaa kpa nterm na aabamɔn.

⁹ Len tii bi, ki li ye ubɔjirbamɔnn. Li kii bigiim ni bifalaadam aabamɔn.”

Upiibamɔnn

¹⁰ Ni pɔɔ pam ke aa kan upiibamɔnn. U kpa tinyoor jer nleen mu ŋan ki kpa kidaak sakpen na.

¹¹ Uchal joo waamakl ŋani u ni la, le kaan ŋa ugiin daalbaadaal.

¹² N‑yoonn mumɔk u bi na kan, u ŋani u ni ŋan na la, kaa ŋani u ni kaa ŋan na.

¹³ N‑yoonn mɔmɔk kan, u bi tun la, ki luu ŋikeken.

¹⁴ U joo ni tijikaar saah kaa nyi nin chee na la, ke uwankooh aaŋɔb aah nya ni dandar pu na.

¹⁵ U finn ngeen pu lichakpitaawoln le ki ŋa tijikaar siin waadichal ni aanib, le ki mɔk waanaagbiisapɔm baatun.

¹⁶ Uma le ban kitiŋ ki bi ga ko na, le ki di waamombil daa ki, ki bu tijikaar ki pu.

¹⁷ U ye ututunn la, ki kpa mpɔɔn ki tun pam.

¹⁸ U nyi waah ŋani nimɔk na aanyoor, le ki tun ti mue kinyeek.

¹⁹ U fik ubaa aakokonn le ki luu ubaa aawanpeenkaan.

²⁰ U kpa bigiim ni bifalaadam chee tiŋann.

²¹ Tiwoor aayoonn kan, naa muk u, ba pu? waanib mɔmɔk kpa tiwoor aawanpeenkaan.

²² U ŋal ubaa aawandookaan aakeken, le ki peeni ŋitanyaan aawanpeenkaan.

²³ Le unii mɔk nyi uchal bɔr ke u ye uninyuun la.

²⁴ Upii ngbaan luu ŋikeken ni ŋigbapapan, le ki joo kooh biwankoob pu.

²⁵ U kpa mpɔɔn, le binib neen u, waa san fen u ga woln na aajawaan.

²⁶ Waamɔliin ye nlan ni ngbasoon aabɔr la.

²⁷ N‑yoonn mɔmɔk u tun le ki tii waadichal aanib baah ban pu na.

²⁸ Le waabim neen u, le uchal pak u.

²⁹ Le uchal bui ke, “Bipiib pam le ye bipiib, le sin ma ti nyaŋ bi mɔmɔk.”

³⁰ Ibɔnyɔk ŋmanni, le kinyaan mu door, le upii u san Uwumbɔr ijawaan na ma kpa kipak.

³¹ Waah ŋani pu na mɔmɔk ponn ni tii u kipak la. U kpa unibɔn mɔmɔk chee kipak la.