Ŋiyataŋak 30 - Uwumbɔr aagbaŋ

Unii u bi yi u ke Agur na aamɔliin

¹ Jake aajapɔɔn Agur aabɔkpaan sɔ: “Uwumbɔr aa bi m chee, Uwumbɔr aa bi m chee, le maa kpa nterm.

² M naahn kiwakork ki jer unibɔn, maa kpa nlan mu unibɔn ga li kpa na.

³ Maa bae nlan daalbaadaal, kaa nyi Uwumbɔr aabɔr tibaa.

⁴ Ŋma kee bee paacham aalan mbamɔm? Ŋma kee chuu libuln ŋa uŋaal ni? Ŋma kee di nnyun poo likekeln ni? Ŋma kee siin kitiŋ aanaanmɔk? Aa yaa nyi kan, ŋma ye udaan, ŋma ye ujapɔɔn?

⁵ “Uwumbɔr joo waah puu tipuur ti na mɔmɔk. U kii binib bi mɔmɔk ban waaterm na.

⁶ Aa yaa bui ke u len tibɔr tibaa aan waa len ti kan, u ga daa aatafal ki mɔk si ke aa ye unyamɔndaan la.”

Ŋiyataŋak ŋiken

⁷ Uwumbɔr, m mee si ke aa cha m kan tiwan nilee nee waahr aan ki nin kpo.

⁸ Nyan mi inyamɔn ni, ki cha m taa li kpa, ki taa li ye ugiin mu. Kina pu na, tii mi maah ban tijikaar pu na mɔk.

⁹ M yaa kpa pam kan, nibaakan m ga bui ke maa ki ban si. M yaa ti ki ye ugiin mu kan, nibaakan m ga su kinaayuk ki di inimɔɔn tii si.

¹⁰ Taa bii unaagbiija udindaan chee. Unaagbiija ngbaan ga nan puun lii aa pu, le aa ji falaa ti pu.

¹¹ Binib bibaa bi, ki puuni lir bitetiib pu, kaa neen binatiib mu.

¹² Binib bibaa bi, ki dak ke baabimbin ŋan la, le ki tee kpa tijɔŋ sakpen.

¹³ Binib bibaa bi, ki dak ke bi ŋan sakpen, bi po dak ke bi ŋan ni ti nyaŋ la.

¹⁴ Binib bibaa ŋani bigiim ni bifalaadam mbiin ki kuln bi ke bi taa ki li bi na.

¹⁵ Kigiik le kpa bisatiib bilee, ki yin bi mɔmɔk ke “Tii‑mi.” Tiwan ninaa nibaa le bi, kaan bab naah kpa tiwan ni na:

¹⁶ Kitekpiitiŋ, ni upii u kaa kpa ubo na, ni kitiŋ ki kuur ki ban utaal na, ni mmii mu wu mubaa pu na.

¹⁷ Unii umɔk ŋani ute yaansara na, ni unii umɔk lik una fam waapininkpir ni na ŋan ke nangba tiib le ji u, le ikaabɔn mu gaa lokr unimbil.

¹⁸ Tiwan ninaa nibaa le bi, le maa ŋmaa bee naatataa:

¹⁹ Likaagiil li bi paacham ki laani na, ni uwaa aah chuun litakpal pu pu na, ni buŋɔb sakpem aah kaa wɔŋni nnyusakpem ponn ni pu na, ni uja ni upii aah bɔnni tɔb pu na.

²⁰ Upii u nya uchal aapuwɔb na ŋani kina la: u goor kidagook, le ki nan fu nnyun, ki bui ke, “Maa tun titunwanbir.”

²¹ Tiwan ninaa nibaa le bi aan kitiŋ kee aa gee ni:

²² Unaagbiija u nan kpaln ubɔr na, ni ujɔr u kani waah ban tiwan nimɔk u ji na,

²³ ni upii u aabimbin aa ŋan na, kan uja ki mɔn, ni unaagbiipiibo u nan gaal udindaan aachal na.

²⁴ Tiwakor tinaa tibaa le aa filk dulnyaa wee ni, ki mu tee kpa nlan pam:

²⁵ Inyann: yaa kpa mpɔɔn, le ki mu tee ban yaajikaar lipeel siin ni.

²⁶ Lijool paab aalapol: yaa kpa mpɔɔn, le ki mu tee lukr waabuu ŋijootakpal ni.

²⁷ Itoon: yaa kpa ubɔr, le ki mu kpaan le ki dii tɔb.

²⁸ Kijapark: aa ga ŋmaa di kibaa ŋum aaŋaal ponn ni, le ti mu tee koo bibɔrb aanaakɔr ni.

²⁹ Tiwan ninaa nibaa aasachuln ŋan ke aa li lik ni chuun:

³⁰ Ichinn; i ye tiwakor mɔk aapɔɔl u kaa san nibaa na,

³¹ ni iŋoob, ni ikooja aah chuun pu na, ni bibɔrb aah chuun binib ponn ni pu na.

³² Aa yaa jɔr ki kpa kigaak sakpen ki dak ilandak i kaa ŋan na kan, sil ki ki dakl lik.

³³ Aa yaa di nnaabiin siin nnaabiin aasambil ni kan, aa ga kan nnaabiinkpan la. Aa yaa faa unii aamɔfal kan, nsin le ga nyan ni. Aa yaa bii unii aasui kan, le aa di aabaa koon tibɔr ni.