Ŋiyataŋak 3 - Uwumbɔr aagbaŋ

Binib bi laa diin na aasurm

¹ Maabo, taa suln maah tuk si pu na. Li teer maah tuk si ke aa ŋa pu na n‑yoonn mɔmɔk.

² Maamɔkm ga tii si liwangol, ni limɔfal li fɔk na.

³ Taa cha ngeehm ni gaakii ŋmar si. Di ni gbin aaneen ni, ki ŋmee ni paan aapobil pu.

⁴ Aa yaa ŋani kina kan, Uwumbɔr ni binib mu aasui ga li piin aa pu.

⁵ Di aasui mɔmɔk kii tii Uwumbɔr. Taa li joo saah dak ke aa nyi pu na tun.

⁶ Teer Uwumbɔr bɔr, saatuln mɔmɔk ni, le u ga mɔk si nsanyaan.

⁷ Taa dakl daalbaadaal ke aa nyi jer saah nyi pu na; kii tii Uwumbɔr, ki yii titunwanbir aatum.

⁸ Aa yaa ŋani kina kan, ni ga li bi ke nnyɔk mu ŋan, ki ga nyaŋ saabunbunn, ki sɔŋ saaween mɔmɔk na la.

⁹ Di saajikaar ti ŋan na tii Uwumbɔr ipiin ki li pak u.

¹⁰ Aa yaa ŋani kina kan, saapil ga gbiin njikaabim, le ndapɔm ga gbiin saadabuu mɔmɔk.

¹¹ Maabo, Uwumbɔr yaa sak si kan, ŋun mbamɔm, ki kii ke nsurm ngbaan ye mbamɔn la.

¹² Uwumbɔr sur binib bi u gee bi na, ke te aah sur waabo u u kpa u pu limakl na pu na la.

¹³ Uwumbɔr aanyoor bi unii u kan nlan ki kpa ŋuntii na pu la.

¹⁴ Tinyoor bi kina aawan ni, ki jer ŋimombil, kina aawan kpa tinyoor ki jer salmaa.

¹⁵ Nlan kpa tinyoor ki jer nleenyaan; nlan ŋan jer saah neen tiwan nimɔk na.

¹⁶ Nlan tii si liwangol, ni limɔfal li fɔk na, ni kipak la.

¹⁷ Nlan ga ŋmaa tii si mmɔɔn aamɔfal, ki ga li joo si mbamɔm ki ti saa saadoon.

¹⁸ Binib bi kan nlan na kpa mpopiin. Nlan ga tii bi limɔfal li kaa kpa ndoon na.

¹⁹ Uwumbɔr nan di nlan le ki di naan dulnyaa, waalan le u di kitaapaak siin kaah bi nin chee na.

²⁰ Waalan le cha ŋimɔɔ puu, ki cha ntaalangbam tii kitiŋ utaal.

²¹ Maabo, li joo nlan ni mbaem mbamɔm. Taa cha ni nya aa chee daalbaadaal.

²² Ni ga tii si limɔfal li ye mmɔɔn, ni mpopiin aamɔfal na.

²³ Nibaa aan ŋa si saasan ni, le aa ga chuun, kaan gbeer nibaa.

²⁴ Aa yaa cha aa ti doon geen kan, saan li san ijawaan, le aa ga geen mbamɔm.

²⁵ Saan li san ijawaan i ga lir si, ke yaah ga lir ubiindaan, ke kitaabuŋ aah lir unii pu na.

²⁶ Uwumbɔr ga li kii si. Waan cha aa koo gaawɔb ubaa ni.

²⁷ N‑yoonn mumɔk aah ga ŋman na kan, aa ŋa tiŋann tii binib bi ban ti na.

²⁸ Aa yaa ŋmaa ter aaŋeen aatɔ dandana kan, taa bui u ke u li kii fen aan aa fe ter u.

²⁹ Taa gor tiwan ni ga bii aaŋeen aatɔ u koo gbɔk si ki kpa aa pu limakl na.

³⁰ Taa kpak unii u kaa tun si taani na kinikpakpak.

³¹ Taa li kpa lipiipoln binib bi bir na pu, ki mu taa tun baah tun ŋitun ŋi na,

³² ba pu? Uwumbɔr aa gee binib bi tun titunwanbir na, li ki tee tuk binib bi aabimbin ŋan na waabɔbɔrkaan.

³³ Uwumbɔr puuni lir bibiindam aadichal pu, le ki ŋani waanyoor ŋani binib bi aabimbin ŋan na aadichal pu.

³⁴ Waa di binib bi kpa kigaak na yin nibaa, le ki lik faar binib bi sunn bibaa taab na.

³⁵ U ga tii bilandam liyimbil li nyuun na, le ki ga di inimɔɔn kpee bijɔrb, baajɔrk pu.