Ŋiyataŋak 29 - Uwumbɔr aagbaŋ

¹ Buyoonn bi sur si aa yii ki moo ŋani kalmbaani na kan, daalbaadaal aa ga nan lir, kaan ki fii sil.

² Mɔk mi unibamɔnn u bi mpɔɔn ni na, aan m mɔk si ke waanib kpa mpopiin. Mɔk mi ubiindaan u bi mpɔɔn ni na, aan m mɔk si ke waanib kpa mpombiin la.

³ Aa yaa neen nlan kan, aate ga ŋmaa li kpa limakl aa pu. Aa yaa ji saamombil bipiidagoob pu kan, ni ye kijɔrk la.

⁴ Ubɔrkpaan u aatafal bi ibamɔn ni na aatiŋ kpa mpɔɔn, le ubɔr u aatafal bi ŋimombil ni na aatiŋ ga kuln.

⁵ Aa yaa joo kimɔmɔɔn ŋmanni aajɔtiib kan, aa bi pen aabaa gaawɔb la.

⁶ Titunwanbirdam aagaawɔb le chur bi, le mbimbinyaandam ma kpa mpopiin ki ka fuur.

⁷ Uninyaan nyi ugiin aabamɔn, le bibiindam ma aan bee kina aatataa.

⁸ Binib bi lik biken fam na ga ŋmaa bii litimbomɔln. Le bilandam ma cha kitiŋ ponn ni bi suuna.

⁹ Ulandaan yaa di ujɔr buen libɔjil ni kan, ujɔr ngbaan ma laa le ki seei.

¹⁰ Binikurb aa gee binib bi kaa kpa taani na, le uninyaan ga ŋmaa gaa kina aanii lii.

¹¹ Ulatiir joo waaŋuul mɔk binib la, le bilandam ma kpa limɔr ki chur bibaa.

¹² Ubɔr u pel tinyamɔnbɔr na aatutum mɔmɔk ga li ye binyamɔndam la.

¹³ Ugiin ni unii u muk u na mɔmɔk kpaan tiwan nibaa nee la, Uwumbɔr le tii bi mɔmɔk ŋinimbil.

¹⁴ Ubɔrkpaan u jaa bigiim pu ki joo baabamɔn tii bi na aanaan ga yunn pam.

¹⁵ Nsurm ni ntafadaan ŋan tii bibilb la. Ubo yaa ŋani waageehn kan, u ga nan tii una inimɔɔn la.

¹⁶ Titunwanbirdam yaa bi mpɔɔn ni kan, titunwanbir moo kpae la. Le bininyaam ga li bi ki nan kan titunwanbirdam ngbaan aadoon.

¹⁷ Li dar saabo aatafal ki li kpa u pu limakl n‑yoonn mɔmɔk. Waan jinn si inimɔɔn daalbaadaal.

¹⁸ Litimbol li kaa kpa Uwumbɔr aasurm na aa bi mbamɔm. Unii u joo Uwumbɔr aakaal na le kpa mpopiin.

¹⁹ Saan ŋmaa di imɔliin baanja di sur ututunn. Nibaakan u ga bee yaatataa, ki mu aa ŋun tii si.

²⁰ Ujɔr sakpiin soor unii u len tibɔr kaa dakl lik na.

²¹ Saanaagbiija yaa ban tiwan waabir ni aan aa tii u n‑yoonn mɔmɔk kan, daalbaadaal u ga nan gaa saah kpa pu na mɔmɔk.

²² Binib bi aasui fiir yɔl yɔl na ban kijaak ni tibɔr n‑yoonn mɔmɔk la.

²³ Kigaak le ga joo ni saadoon, le aa yaa sunn aabaa taab kan, aa kani kipak ni lisil.

²⁴ Aa yaa ye unaayuk aaŋeen aatɔ kan, aa tii aabaa titotonn la. Aa yaa len mbamɔn libɔjil ni kan, bi ga daa aatafal, le aa yaa nee kan, Uwumbɔr mu puuni lir aa pu.

²⁵ Aa yaa dii binib aah dak aa pu pu na kan, naa ŋan. Aa yaa tii Uwumbɔr naadii kan, le aa ŋmar.

²⁶ Unii mɔk ban waajojoor chee nterm la, Uwumbɔr mu baanja chee le ibamɔn bi.

²⁷ Unibamɔnn aa gee ubiindaan, le ubiindaan mu aa gee unibamɔnn.