Ŋiyataŋak 28 - Uwumbɔr aagbaŋ

¹ Ubaa yaa kaa san dii ubiindaan kan, u san la, le uninyaan ma kaar ke uchinn na.

² Litimbol li tun titunwanbir na aaninkpiib kpelni mala mala la. Le bilandam ni bichiindam aatiŋ ma kpa mpɔɔn ki yunni.

³ Ugiin yaa ŋa uyidaan ki muk bigiim kan, u naahn utaal u bii tijikaar na la.

⁴ Aa yaa kaa joo Uwumbɔr aakaal kan, aa bi bibiindam wɔb la; le aa yaa joo i kan, aa ye baadin la.

⁵ Titunwanbirdam aa nyi ibamɔn, le binib bi dii Uwumbɔr na ma beer ibamɔn mbamɔm.

⁶ Aa yaa ye ugiin ni tibulchinn daan kan, ni ŋan jer aa li kpa liwangol ki ye ubeebeedaan.

⁷ Unachipɔɔn u joo Uwumbɔr aakaal mbamɔm na kpa ichiin. Le u chuun jɔnni maabitibaanidam na tii ute inimɔɔn.

⁸ Aa yaa ji binib pem pem ki kan liwangol kan, unii u san bigiim kinimbaak na le ga nan ji saawangol ngbaan.

⁹ Aa yaa kaa joo Uwumbɔr aakaal kan, waan ŋun saameel.

¹⁰ Aa yaa ŋmann unibamɔnn aan u tun titunwanbir kan, aabaa aagaawɔb le ga chuu si. Le maa‑kpa‑taani‑dam ga kan baapar.

¹¹ Biwankpadam dak n‑yoonn mɔmɔk ke bi kpa nlan la, le ugiin u kpa ichiin ki nyi mbimbin na nyi jer bi.

¹² Uninyaan yaa bi mpɔɔn ni kan, unibɔn mɔmɔk mɔɔni la, le bibiindam yaa bi mpɔɔn ni kan, unibɔn mɔk bɔrni ubaa la.

¹³ Aa yaa joo saatunwanbir bɔrni kan, saan kan tinyoor saamɔfal ni. Kpiir saatunwanbir ki di ti mee aan Uwumbɔr san si kinimbaak.

¹⁴ Aa yaa ban mpopiin kan, kii tii Uwumbɔr n‑yoonn mɔmɔk. Aa yaa kpa tafalaaŋun kan, saamɔfal ga junn.

¹⁵ Ubiindaan yaa bi mpɔɔn ni kan, bigiim aa kani nterm u chee, u bir le ke uchinn na, bee unaamuun na.

¹⁶ Unii u bi mpɔɔn ni, kaa kpa nlan na ga li ye ubiindaan la. Le unii u kaa gee igaŋgaŋlik na ga yunn nnaan ni.

¹⁷ Unii u ku uŋeen aatɔ na bi gbii ubaa aabuu la. Taa bui u ke u di cha.

¹⁸ Li bi mbamɔm ki ŋmar. Aa yaa ye beebeedaan kan, aa ga lir mala la.

¹⁹ Ukpaal umɔk tun na kpa ki ji gur ni. Le binib bi ka fam, kaa tun nibaa na ga li ye bigiim n‑yoonn mɔmɔk.

²⁰ Binibamɔm ga li kpa limɔfal li fɔk na, ni mpopiin la. Le aa yaa ban mala ke aa kan liwangol kan, Uwumbɔr ga daa aatafal.

²¹ Njinjin aa ŋan; le bibɔjirb bibaa ma pɔɔni bibaa ki gaal igaŋgaŋlik.

²² Bikumɔndam ban ke bi kan liwangol mala, kaa tee nyi buyoonn igiin ga fuu ni bi na.

²³ Unii u sur binib na kani kipak bi chee ki jer unii u ŋani bi kimɔmɔɔn na.

²⁴ Unii u su ute ni una aawan ki dak ke waa tun titunwanbir na ni unaayuk ye tiwan nibaa la.

²⁵ Kukumɔŋ joo ni tibɔr baanja la. Aa yaa tii Uwumbɔr naadii kan, ni soor.

²⁶ Aa yaa dii aabaa aalandak baanja kan, ni ye kijɔrk la. Li dii bilandam aasurm ki ŋmar.

²⁷ Aa yaa tii bigiim kan, saan lann nibaa. Aa yaa kan bigiim ki ŋum aanimbil kan, binib pam le ga puun lii aa pu.

²⁸ Bibiindam yaa bi mpɔɔn ni kan, binib bɔrni la. Le bi yaa nyan mpɔɔn ni kan, mbamɔndam le ga koo mpɔɔn ni.