Ŋiyataŋak 27 - Uwumbɔr aagbaŋ

¹ Taa li kpa kipupuk fen u ga woln na pu, saa nyi ni ga ŋa dandana wee ni n‑yoonn ngbaan aakaasisik ni na.

² Cha binib biken pak si, ki cha bicham mu pak si, taa pak aabaa.

³ Litakpal ni litambol aah nyuun pu na aan ŋmaa ŋaŋ tibɔr ti kijɔrk ga ŋmaa ban na.

⁴ Liŋuul aa ŋan ki ki ŋmaa bii tiwan mu, ki mu aa ŋmaa bii tiwan ki ti pii lipiipoln aah ga bii tiwan pu na.

⁵ Aa yaa sur unii kinipaak ni kan, ni soor ni ke aa cha u li dak ke saa neen u kpala.

⁶ Aajɔ beenin dak aa pu mbamɔm, hali n‑yoonn mu u tii si titotonn na. Saadin ma yaa di uŋaal paan aabɔgbiln pu kan, li nyi.

⁷ Aa yaa jin gbiin kan, aa ga ŋmaa yii tisiir, le nkon ma yaa joo si kan, tijikaar ti cho na mɔ la.

⁸ Uja u kaa bi linampal na naahn unyoon u nyan ki cha waadil na la.

⁹ Tulalee ni nkpamɔɔn cha aasui piir la; le aajɔ yaa sur si kan, ni mɔ jer kina la.

¹⁰ Taa suln aajɔtiib ni aate aajɔtiib bɔr. Aa yaa bi tibɔr ni kan, taa ban aate aabo chee nterm; aaŋeen aatɔ u koo gbɔk si na ga ŋmaa ter si ki jer aate aabo u bi dandar na aah ga ter si pu na.

¹¹ Maabo, li kpa nlan, aan ni li mɔ mi; nima kan, m ga li kpa ngarm ki tii unii u galni mi na.

¹² Bilandam waa tibɔr aah choo pu na le ki minn ti, le ujɔr ma ga koo ti ni, le ki nan ki bi wii.

¹³ Ujɔr u gaa uchaan aapɔln ke u pa na, waawangol le bi ga nan di pa lipɔln ngbaan.

¹⁴ Aa yaa puun lii aajɔ pu kan, ni soor ni ke aa di kifuuk ti doon u ki finn u kichakpinaanyeek ni.

¹⁵ Upii u kpa bumɔb sakpen na naahn titaapupur la.

¹⁶ Saan ŋmaa ŋmin u. Aa yaa ban aa ŋmin u kan, ni naahn ke saah ban aa kiir libuln li taa li daar, ki ki naahn ke saah ban ke aa di nkpan di ŋum aaŋaal ni aan mu taa nyan pu na la.

¹⁷ Binib bae biken chee ke tikur aah ga ŋmaa luun tikur pu na la.

¹⁸ Li kii likakaln mbamɔm ki kan ŋikakan ki ŋmɔ. Ututunn u joo udindaan mbamɔm na ga li kpa kipak.

¹⁹ Saah waa aabaa nnyun ni pu na, kina le aa waa saabimbin mu aapobil ni.

²⁰ Unibɔn aageehn naahn kitekpiitiŋ ni la, mpaan bi n‑yoonn mɔmɔk le ki ban bitekpiib biken.

²¹ Mmii le bi joo tɔŋni salmaa ni tikunabr, kina le binib aah pak unii pu na le mɔk waabimbin aah bi pu na.

²² Aa ga ŋmaa gbaa ujɔr u ti li ban u kpo, aa mu aan ŋmaa gbaa nyan waajɔrk u ni.

²³ Li kii saapiih ni saanaa mbamɔm,

²⁴ ba pu? liwangol aan gaar unibaan chee. Hali ŋitimbol aan ŋmaa li bi ki ti saa n‑yoonn mu kaa kpa ndoon na.

²⁵ Aa ga chee titamoor le ki chee timoor lijool taab, le saah chee titamoor nin chee na ki bi bunni.

²⁶ Aa ga ŋmaa di saapiih aakor di luu ŋibɔkul, le ki di ŋimombil ŋi aa di saaŋoob kooh ki kan na di daa kitiŋ.

²⁷ Le iŋoob i gur na ga tii aa ni saadichal, ni saanaagbiisapɔm ŋŋobiin.