Ŋiyataŋak 26 - Uwumbɔr aagbaŋ

¹ Kipak aa ŋeer ujɔr, ni naahn utaal u nu tijikaar aacheen aayoonn na, bee tiwoor ti bi kitotoŋ aayoonn na la.

² Aa yaa kaa tun taani kan, imɔpuur aan ŋmaa chuu si. Ti naahn inyoon i laani kaan kal busub paab na la.

³ Aa ga loe utaan linaalab, ki di itangar kpom ubon, le ki ga gbaa ujɔr mu.

⁴ Aa yaa gar kijɔrk aabaan kan, aa mu jɔr ke unii u baa mu na la.

⁵ Unii yaa baa si tibɔr ti kaa kpa ŋitaa kan, di tibɔr ti kaa kpa ŋitaa na giin kii u, aan u bee ke waalan aa fuu waah ba dak pu na.

⁶ Aa yaa di inaŋ di naŋ ujɔr kan, ni naahn ke saah gaa gii aataal le na; aa bi ban tibɔr le na.

⁷ Ujɔr yaa ti bi ŋakl ŋiyataŋak kan, li nyi uwɔb mu ga ŋmaa di utaal di chuun.

⁸ Aa yaa pak unii u ye ulatiir na kan, ni bi le ke aa di litakpal ki di kpiin lifulaataln ponn ni ki buu pu na.

⁹ Ujɔr yaa ŋakl si liyataŋakl kan, nima ni udagbiir aah bi nyani nkokon uŋaal ponn ni pu na ye tiwan nibaa la.

¹⁰ Unii umɔk yoor ujɔr waatuln ni na bi tii binib bi bi nima na iween la.

¹¹ Ujɔr yaa ki gir ŋa kijɔrk aatuln nfum mulee kan, ni naahn ubɔ aah gir ti jin waawuln pu na la.

¹² Ujɔr sakpiin soor unii u dak ke u chi kaa chi na.

¹³ Ba ŋa ugbanyakdaan ma aan nya lipaal? Ni ye ba aan u san? U san ichinn la aa?

¹⁴ Ugbanyakdaan ma dɔ tiwandookaan pu le ki labr. U bi le ke jaaleŋ aah bi fiini libubaan ni pu na.

¹⁵ Ligbanyakl pu, bigbanyakdam bibaa aa kpaan ŋmaa joo busaa ŋani bimɔi ni.

¹⁶ Ugbanyakdaan dak ke u kpa nlan ki jer binib bilole bi ga ŋmaa di baalan di len baah dak pu na la.

¹⁷ Aa yaa koo kinikpakpak ki kaa kpaa si na ni, ni aa buen ti chuu ubɔ aatafal ki daa na, ni ye tiwanbaan la.

^18-19 Unii u joo uŋeen aatɔtiib koo ni tibɔr ni, ki ki bui ke u ŋani yaansara na naahn uwaar u gbiir tiwan ni ga ku u na la.

²⁰ Idɔ yaa kaa ki bi mmii ni kan, mu junni la; le libɔmbɔtukl mu yaa kaa bi kan, kijaak mu door.

²¹ Nkoon le cha mmiiyon bi, le idɔ mu cha mmii gaal, le bibɔbam cha kinikpakpak bi, kaan doo.

²² Libɔmbɔtukl mɔ pam. Ti gee ti pel li pam.

²³ Ikpatakpaln i bɔrni unii aabimbin na aah bi pu na naahn n‑yam aah bi tiyakr aabukpiik pu pu na la.

²⁴ Unii u ŋmanni binib na joo waananaŋ bɔrni waamɔmɔɔn aabɔgbaal ponn ni la.

²⁵ Waamɔliin ga li mɔ ki ŋan, taa gaa waah len pu na, ba pu? usui gbii kinanaŋ le ki ti bar kpir.

²⁶ U ga ŋmaa bɔr waananaŋ, le binib mɔmɔk mu waa waah tun titunwanbir ti na.

²⁷ Binib bi pen biken gaawɔb tiib na, gaawɔb tiib ngbaan le ga ki gir chur bi. Aa yaa bil unii litakpal nsan ni kan, sin le ga nan ki gbeer li ki lir.

²⁸ Aa yaa gii inyamɔn ki bii unii aayimbil kan, aa nan u le na. Kimɔmɔɔn aa joo ni nibaa see libiil ŋmeen.