Ŋiyataŋak 25 - Uwumbɔr aagbaŋ

Solomonn aayataŋak ŋiken

¹ Juda aabɔrkpaan Hesekia aatutum nan ŋmee Solomonn aayataŋak ŋimina.

² Ti pak Uwumbɔr, waah joo tibɔr ti bɔrni timi na pu, ki pak bibɔrkpaam mu, baah kpiir ni mɔk timi na pu.

³ Saan ŋmaa bee ubɔrkpaan aah dak pu na; waalandak daa ti chee ke kitaapaak aah daa kitiŋ pu na, ki nyoo ke nnyusakpem aah nyoo pu na la.

⁴ Chuu nyan tijɔŋ ti bi tikunabr ni na aan unii u naani tiwan na di ti ŋa tiwanyaan tii si.

⁵ Chuu nyan titunwanbirdam ubɔrkpaan chee aan bi li nyi waanaan bɔr ibamɔn pu.

⁶ Taa gii nnyamɔn ke aa ye uninyuun, buyoonn aa si ubɔrkpaan aanimbiin ni na.

⁷ Bi yaa tii si uninyuun aajal ke aa kal kan, ni ŋan jer ke bi gaa saajal tii uninyuun.

⁸ Taa di kijejek buen libɔjil ni, tibɔr ti aa kan ti na pu. Useeraadaan ubaa yaa nan len nyaŋ si kan, aa ga ki ŋa kinye?

⁹ Aa ni aaŋeen aatɔ yaa kpak kinikpakpak kan, toor man tii nibaa ki taa kpiir tɔb pu.

¹⁰ Naa ye kina kan, binib mɔmɔk ga bee ke naan ŋmaa joo tibɔbɔrkaan tibaa, le nimi aanimɔɔn aan doo.

¹¹ Nlandak mu unii len mu ŋan na naahn ke salmaa le baah di tam tikunabr pu na.

¹² Ulandaan yaa sur unii u kpa ŋuntii na kan, ni kpa tinyoor ki jer salmaa ni ileenyaan i bi di salmaa ŋa i na.

¹³ Ntuundaan u gbaa ibamɔn na naahn nnyunsoom aah bi pu kitotoŋ aayoonn na la.

¹⁴ Binib bi puuni tipuur kaa gbiini ti na naahn ntaalangbam ni libuln li kaa joo ni utaal na la.

¹⁵ Limɔr aasurm ŋmaa nyaŋni mbimbin mu pɔɔ na, ki ga ŋmaa nyaŋ binib bi joo kitiŋ na mu.

¹⁶ Taa ji tisiir ki ti nyaŋ aabaa; ti ga ŋmaa cha aa wuln.

¹⁷ Taa mann aaŋeen aatɔ sakpen; u ga ti nur si ki nann si.

¹⁸ Unii yaa gii inyamɔn paan si kan, ni ga ŋmaa ku si ke kijukaan, ni lichakukul, ni nlapiin aah ku pu na la.

¹⁹ Aa yaa nyu unyamɔndaan pu baala limukl aayoonn kan, ni naahn ke aanyiln le aah ban li fenn aan aa joo ŋmɔ tiwan, bee aataal le aah kpir aan aa joo chuun na.

²⁰ Unii aasui yaa bii aan aa bi gaa ilahn u chee, ni aa chuu peer unii aawanpeenkaan tiwoor aah bi bundaln na ye tiwan nibaa la; ki wu ke saah di n‑yaan ŋa mbuun ni kan, ni wu pu na.

²¹ Nkon yaa joo saadin kan, kpiin u; nnyunyuu yaa joo u kan, tii u nnyun u nyu.

²² N‑yoonn ngbaan le inimɔɔn ga ku u, le Uwumbɔr ga ŋa waanyoor ŋa aa pu.

²³ Linibiil joo ni liŋuul ke ntaanjon wɔb aabuln aah joo ni utaal pu na.

²⁴ Aa yaa koo kikaafiik ni kan, ni ŋan jer ke aa ni upii u kpa bumɔb sakpen na li kpaan koo.

²⁵ Aa yaa ŋun tibɔnyaan ti nyan ni dandar na kan, ni naahn ke saah kan nnyunsoom n‑yoonn mu nnyunyuu joo si na la.

²⁶ Uninyaan yaa ti kii utunwanbirdaan aamɔb kan, ni naahn baah di nnyɔk ŋa liboln aanyun ni, bee nnyunbun mu kpa tijɔŋ na la.

²⁷ Aa yaa ji tisiir sakpen kan, naa ŋan; aa ti ki ban kipak mu sakpen kan, ni mu aa ki ŋan.

²⁸ Aa yaa kaa ŋmaa chur saaŋuul kan, aa naahn lidichal li bi maa li kaa maa ŋigon gob li na la.