Ŋiyataŋak 24 - Uwumbɔr aagbaŋ

‑19‑

¹ Taa dak ke bibiindam aawan ba li ye saawan, ki taa jɔnn bi kijɔtiik.

² Baalandak le ye tibɔr aaŋam, n‑yoonn mumɔk bi waar bimɔi na, bi ban bi sii unii la.

‑20‑

³ Nlan pu le unii ga maa lidichal tɔŋ.

⁴ Tidir ti ponn ni nlan bi na, tiwanyaan, ni liyimbil aawan le bi ti ponn ni.

‑21‑

⁵ Unii u kpa nlan na ŋan jer u kpa mpɔɔn na; mbamɔn, nlan ŋan jer mpɔɔn,

⁶ ba pu? see aa dakl lik mbamɔm waahr le ki nin ban butɔb, le nsurm nyaan mu aa kan na ga cha aa nyaŋ saadim.

‑22‑

⁷ Unii u kaa kpa nlan na aa beer nlan aabɔr aatataa. Bi yaa bi kpokl tibɔkpaan kan, u ka ŋmin la.

‑23‑

⁸ Aa yaa chuun ban tibɔr n‑yoonn mɔmɔk kan, saayimbil ga nan li ye utunwanbirdaan la.

⁹ Ujɔr aalandak mɔk ye kinimbɔŋ la. Binib aa gee unii u lik seeni uŋeen aatɔtiib na la.

‑24‑

¹⁰ Aa yaa kaa kpa mpɔɔn buyoonn tibɔr muk si na kan, aa sil ye ugiin la.

‑25‑

¹¹ Unii yaa kaa tun taani aan bi ban bi ku u kan, ŋa mala ki ti gaa u lii.

¹² Nibaakan aa ga bui ke naa ye saabɔr, le Uwumbɔr ma nyi ki lik saabimbin. U lik saabimbin, ki nyi ni mɔmɔk. Le u ga pa si saatuln aah ŋeer pu na.

‑26‑

¹³ Maabo, ji tisiir, ti ŋan ki mɔ. Tisiir aah mirk aalambil pu pu na,

¹⁴ kina le nlan mu ŋan tii aasui. Aa yaa kpa nlan kan, aa ga li kpa limɔfal li ŋan na.

‑27‑

¹⁵ Taa li bi ke ubiindaan u ŋa waalandak ke u ti su unibamɔnn ubaa aawan na, bee u ti yoor waadichal mɔmɔk na.

¹⁶ Unibamɔnn yaa lir sakpen pu na kan, u ga ki fii sil; le tibɔbir ga ku ubiindaan ma.

‑28‑

¹⁷ Saadin yaa kan tibɔr kan, taa cha aasui piir u pu; u yaa gbeer kan, taa li mɔɔni.

¹⁸ Aasui yaa piir u pu kan, Uwumbɔr nyi, kaan li gee kina; nibaakan waan daa utafal.

‑29‑

¹⁹ Taa cha kinimbɔŋdam aabɔr li muk si; ki taa li kpa lipiipoln bi pu.

²⁰ Ubiindaan aa kpa fen aamakl, waan kan tiwanyaan nibaa.

‑30‑

²¹ Maabo, li san Uwumbɔr ijawaan ki pak u, ki li pak saabɔrkpaan. Taa dii binib bi yii baamɔi na aabɔr;

²² kina aanib aamɔfal aa cha mɔb pu. Uwumbɔr ni ubɔrkpaan ga ŋmaa tii si tibɔr.

Nlan aaliin iken

²³ Bilandam le ki len tibɔr timina mu: Naa ŋan ke ubɔjir li kpa imaagann.

²⁴ U yaa di mbamɔn tii unii u aabɔr aa ŋan na kan, binib mɔmɔk ga li nan u, le ki puuni lir u pu.

²⁵ Ubɔjir u dar binib bi aabɔr aa ŋan na aatafal na ga kan tinyoor ni liyimbinyaan.

²⁶ Aa yaa baa unii mbaan, u giin kii si mbamɔm kan, ni mɔk kijɔtiik ki ŋan na la.

²⁷ Aa yaa kaa kee chee saajikaar ki bee ke aa ga ŋmaa joo lidichal kan, taa maa lidichal ki yoor upii.

²⁸ Taa ŋa seeraadaan tii unii kaa nyi tibɔr ngbaan aabamɔn. Taa gii inyamɔn paan unii ubaa.

²⁹ Taa bui ke; “M ga ŋa u waah ŋa mi pu na. M ga teen u.”

³⁰ M nan chuun kpak ugbanyakdaan u ye ujɔr na aasaak la.

³¹ Ikokon ni timoor le nan muun gaa ki ni. Waah di idɔ i gob ki na nan lir dɔ kitiŋ.

³² M nan lik nima, ki dakl lik, le ki bae mbaem kisaak ngbaan chee.

³³ Aa yaa gee kan, li cha ki ti doon geen, doon ki geen. Di aaŋaal bɔɔb aabaa ki li dɔ fuur,

³⁴ le buyoonn aa dɔ geen na, igiin ga dan nan bib chuu si ke unaayuk na.