Ŋiyataŋak 23 - Uwumbɔr aagbaŋ

¹ Aa yaa kal uninyuun chee aa ji tijikaar kan, li nyi waah ye unii u na.

² Aa yaa ŋmaa ji sakpen kan, gii saapuul pu lii.

³ Taa ji sakpen ke waah tii si tijikaar ti na ŋan ki mɔ; nibaakan u ban u lik saabimbin aah bi pu na ki ŋmann si la.

‑7‑

⁴ Li kpa nlan ki taa ku aabaa ke aa ŋa uwankpadaan.

⁵ Saamombil ga ŋmaa fii ke ŋaah kpa ifeen ke likaagiil na la, ki cha si.

‑8‑

⁶ Taa ji ukumɔndaan chee tijikaar. Taa li kpa lipuul waajikaar pu ke ti ŋan.

⁷ U ga bui si ke, “Dan nan ji kpee;” umɔb le len, usui aa kii. Waah dak pu na ye waabimbin aah bi pu na la.

⁸ Aa ga wuln saah jin ni na mɔmɔk, le saamɔmɔɔn na bee fam.

‑9‑

⁹ Taa pɔɔk aabaa ke aa tuk ujɔr nlan aabɔr; waan gaa ti.

‑10‑

¹⁰ Taa foor aayaaja aapɔnja aah si nin chee na. Taa gaa nkpobim aatiŋ.

¹¹ Uwumbɔr le ye mpɔɔndaan u kii bi na, le ki ga cha aa ni uma le ji tibɔr.

‑11‑

¹² Li ŋun saamɔmɔkr aah mɔk si pu na ki bae saah ga ŋman pu na.

‑12‑

¹³ Aa yaa ban aa sur ubo kan, taa taani. Kiŋaataŋ aan ku u.

¹⁴ Mbamɔn, ki ga gaa waamɔfal lii.

‑13‑

¹⁵ Maabo, aa yaa ŋa nlan kan, nsui ga li piin aa pu.

¹⁶ Buyoonn m ŋun aa bi len nlan aabɔr na kan, m ga li kpa limakl sakpen aa pu.

‑14‑

¹⁷ Taa li dak ke aa ba li yeh kinimbɔŋdaan aawan. Cha Uwumbɔr aapakm li ye saalandak.

¹⁸ Aa yaa ŋani kina kan, aa kpa limɔfal li fɔk ki ŋan na.

‑15‑

¹⁹ Maabo, li pel, ki li kpa nlan ki li lik saabimbin.

²⁰ Taa dii binib bi nyu ndaan sakpen na, ni bipusakpemdam.

²¹ Bidanyurb ni bipusakpemdam ga ŋa bigiim la. Saatuln le yaa ye ke aa ji ki doon geen kan, aa ga peen tikekekpir dandana wee.

‑16‑

²² Ŋun tii aate; ni yaa kaa ba ye u pu kan, saa ba bi. Aana yaa por kan, mɔk u saah neen u pu na.

²³ Mbamɔn, ni ichiin, ni mbaem, ni nlan mu ŋan na, le ye tiwan ni ŋan ke aa di saamombil pa ni pu na, le ki ye tiwan ni saan ŋmaa di kooh na.

²⁴ Mbimbinyaandaan aate nyi ni pu u kpa mpopiin na. Aajapɔɔn yaa kpa nlan kan, aa ga li kpa limakl u pu.

²⁵ Cha aate ni aana li kpa limakl aa pu; tii aana kina aapopiin.

‑17‑

²⁶ Maabo, pel mbamɔm ki cha maabimbin li ye limɔkl ki tii si.

²⁷ Bipiib bi gɔr na ye gaawɔb u ga ŋmaa ku unii na la.

²⁸ Bi dɔ kii si ke binaayukb na la, le ki cha bijab pam bii baasan.

‑18‑

^29-30 Mɔk mi unii u nyu ndaan sakpen na, ki ban u nyu ndapɔm mɔk aabɔŋ na, aan m mɔk si ke uma le ye unii u aasui bii ubaa pu na, ki ban tibɔr n‑yoonn mɔmɔk na. Unimbil man ke nsin na la, le u kpa tibuwar ti kaa ba ga li bi u pu na.

³¹ Taa cha ndaan ŋmann si; taa lik ke mu ŋan ki man, ki kpenn kidayikuuk ni, ki sunni aaneen ni suuna.

³² Kitaak yaa woln kan, aa ga li bi le ke uwaa u kpa liluul na le aah juu si na.

³³ Aa ga li ka ki waa wayɔlyɔl nibaa aanimbil wɔb, le saan ŋmaa dak, kaan ŋmaa len tibɔr mbamɔm.

³⁴ Ni ga li bi ke saah bi nnyusakpem ni, buŋɔb sakpem ponn ni na, le ki saa labr, ki nya do, ki ti saa do.

³⁵ Aa ga bui ke, “Nibaakan, m fe kan iween, nibaakan, bi fe gbaa mi la, le maa ki teer, ba ŋa maa ŋmaa fii sil? M ki ban ndaan la.”