Ŋiyataŋak 22 - Uwumbɔr aagbaŋ

¹ Bi yaa bui si ke aa lee mbimbinyaan ni liwangol kan, lee mbimbinyaan ki di cha liwangol.

² Uwankpadaan ni ugiin mɔk kpaan tiwan nibaa nee la; nima le ye ke Uwumbɔr le naan bi mɔmɔk.

³ Bilandam waa tibɔr aah choo pu na le ki minn ti, le ujɔr ma ga koo ti ni, le ki nan ki bi wii.

⁴ Li san Uwumbɔr ijawaan ki pak u, ki sunn aabaa taab, le ki kan liwangol, ni kipak, ni limɔfal li fɔk na.

⁵ Aa yaa gee saamɔfal kan, taa koo gaawɔb tiib bi chur bibiindam isan ni na ni.

⁶ Mɔk ubo waah ga li bi mbimbin mu na, aan u ga li teer mu ki ti saa waamɔfal aadoon.

⁷ Bigiim le ye biwankpadam aanaagbiib. Pinn unii chee ŋimombil ki kpaln udaan aanaagbiija.

⁸ Aa yaa di titunwanbir bun kan, kinimbɔŋ le ga punn, le saah muk biken pu na ga doo.

⁹ Li ye ubulchinn daan ki yakr saajikaar tii bigiim. Aa ga kan tinyoor ni pu.

¹⁰ Chuu nyan man unii u kpa kigaak na nikaasisik ni, aan kinikpakpak, ni kijaak, ni ŋisiibil doo.

¹¹ Aa yaa kpa lipobinyaan ni iliinyaan kan, aajɔ le ga li ye ubɔr.

¹² Uwumbɔr nyani binyamɔndam baanyamɔn ni, le ibamɔn fuur.

¹³ Ugbanyakdaan ka linampal la, le ki bui ke u yaa nyan kan, uchinn ga chuu u.

¹⁴ Kidagook ye gaawɔb la, ki chur Uwumbɔr aaŋuul aah fiir bijab bi pu na la.

¹⁵ Mbim ma po ŋani kijɔrk, ni tiwan ni kaa ŋan na, le aa yaa tii bi kiŋaataŋ kibaa kan, bi ga kpeln baabimbin.

¹⁶ Aa yaa tii biwankpadam ipiin, bee aa yaa muk bigiim ke aa kpaln uwankpadaan kan, aa ga kpaln ugiin le aabaa.

Nlan aaliin piitaa na

¹⁷ Li pel aan m tuk si bilandam aah len pu na. Bae baah mɔk pu na,

¹⁸ le ki li kpa mpopiin buyoonn aa teer baamɔkm ngbaan ki ŋmaa len mu na.

¹⁹ M ban ke aa ŋa Uwumbɔr naadii, kina pu le m ban m tuk si mu dandana wee.

²⁰ M ŋmee nlan aabɔr piitaa le bil si. Mu kpa nlan ni nsurm,

²¹ ki ga mɔk si mbamɔn aah sil ye pu na. Le bi yaa tun si ke aa ti joo ni mu kan, aa ga ti joo ni kinyaan.

‑1‑

²² Taa lik ubaa ke u ye ugiin aa ŋa u saageehn, taa lik binib bi si libɔjil ni kaa kpa nterm na ke aa pii bi ki ji.

²³ Uwumbɔr le ga len baabɔr tii bi, ki ga ku binib bi ban bi ku bi na.

‑2‑

²⁴ Taa jɔnn binib bi aasui fiir yɔl yɔl na kijɔtiik.

²⁵ Nibaakan aa ga nan gaa baabimbin mu kaa ŋan na, ki mu aan ki ŋmaa kpeln.

‑3‑

²⁶ Taa puu ke aa ga pa aaŋeen aatɔ aapɔln.

²⁷ Aa yaa kaa nan ŋmaa pa kan, bi ga nan kpaan yoor saawandookaan mu.

‑4‑

²⁸ Aayaajatiib aah baan upɔnja u na, taa foor u waah si nin chee na.

‑5‑

²⁹ Unii u bi ki tun waatuln mbamɔm na jer binib biken, le ki ga li ye bibɔrb aajɔ.