Ŋiyataŋak 21 - Uwumbɔr aagbaŋ

¹ Uwumbɔr aah mɔk ubɔr aalandak ke i tun pu na, ni waah mɔk nkpen mu aah ga dii pu na aa pɔɔ u chee kpala.

² Teer ke Uwumbɔr lik ki nyi saabimbin mɔmɔk, kina pu na, taa dak ke saah ŋani tiwan nimɔk na ŋan la.

³ Ŋa ni ŋan ki tok na. Nima le piir Uwumbɔr aasui ki jer saah kɔr tiwakor ti ke aa toor kitork tii u na.

⁴ Bibiindam aagaak ni baanimpoo le joo bi, nima ngbaan mu ye titunwanbir la.

⁵ Dakl lik mbamɔm ki li kpa sakpen, aa yaa tun bil bil kan, saan kan ni ga ŋeer si na.

⁶ Liwangol li aa di inyamɔn kan li na aan yunn, le ki mu ki ga di si ŋa nkun aamɔkpaween ni.

⁷ Bibiindam aabimbin mu kaa ŋan na le ku bi, bi yii kaan ŋa ni ŋan na.

⁸ Binib bi aabɔr aa ŋan na chuun nsan mu kaa tok na ni la; le binib bi aabɔr ŋan na ma ŋani ni ŋan na.

⁹ Aa yaa nyan ti dɔ kikaafiik ni kan, ni ŋan jer ke aa ni upii u kpa bumɔb sakpen na li kpaan koo lidichal libaa ni.

¹⁰ Bibiindam aajikaar le ye titunwanbir, baa san ubaa kinimbaak.

¹¹ Unii u kpa kigaak na yaa kan ntafadaan kan, nima chee le bigbaam mu bae nlan. Ulandaan ma ga bae nlan baah mɔk u tiwan ni na chee la.

¹² Uwumbɔr u bi chain na nyi tiwan nimɔk ŋani bibiindam do na, u ga junn baamɔfal.

¹³ Aa yaa yii saan ŋun ugiin aah wii pu na kan, buyoonn aa mu nan bi wii ki ban nterm na, ubaa aan ŋun.

¹⁴ Ubaa yaa gee aa pu liŋuul, aan aa bɔr ki tii u ipiin kan, i ga sɔŋ waaŋuul.

¹⁵ Buyoonn ibamɔn ti ŋa na, bininyaam aasui piir la; le ni tee wu bibiindam ma.

¹⁶ Unii umɔk yenn nyan nlan chee na, nkun dɔ kii udaan ngbaan.

¹⁷ Aa yaa di aabaa tii mmɔɔn, ni ndaan, ni tijikaar ti ŋan na kan, naan ŋmaa ŋa si uwankpadaan.

¹⁸ Mbiin mu bibiindam joo ŋani bininyaam na gir choo bi chee la.

¹⁹ Aa yaa koo timoor ni nin chee nnyun, ni tijikaar aa bi na kan, ni soor ni aa ni upii u kpa bumɔb na li kpaan koo lidichal ni.

²⁰ Bilandam bi liwankpal ni mmɔɔn ni la, le bijɔrb ma ji baamombil mala mala buyoonn bi kan ŋi na.

²¹ Li kpa tiŋann ni tibulchinn, ki li kpa limɔfal li fɔk na; biken ga li pak si ki ŋani si tiŋann.

²² Butɔb aajab aaninkpel u kpa nlan na ga ŋmaa nyaŋ kitiŋ ki binib bi pɔɔ na kiir ki na, ki tur kaagon ŋi bi maa mann goln ki, ki kpa limakl ŋi pu na lii kitiŋ.

²³ Aa yaa kaa ban aa koo tibɔr ni kan, li nyi saabɔlen.

²⁴ Mɔk mi kalmbaanidaan aan m mɔk si ke u ye nnimpoodaan, ni balaadaan, ni maa‑lik‑faar‑daan la.

²⁵ Ugbanyakdaan u yii lituln na bi ku ubaa la.

²⁶ Waalandak mɔk ye le ke u ba li kpa tiwan. Le unibamɔnn ma kan, u ga tii sakpen sakpen.

²⁷ Uwumbɔr aa gee titunwanbirdam aah toor kitork ki tii u na la. Waah nan ki sakpen na le ye kitork ki bi kpa tilandakwanbir bisui ni ki toor na.

²⁸ Ubaa aa tii unyamɔndaan aaseeraa naadii, ulandakdaan ma aaseeraa kan, bi mɔmɔk tii u naadii la.

²⁹ Bininyaam nyi bibaa aabɔr; le bibiindam ma pɔɔni bibaa ki ŋmanni baah kaa ye pu na.

³⁰ Unibɔn aalan ni ichiin aan ŋmaa nyaŋ Uwumbɔr.

³¹ Aa ga ŋmaa gor saataan ki kiir butɔb, Uwumbɔr mu baanja le tii linyaŋ.