Ŋiyataŋak 2 - Uwumbɔr aagbaŋ

Nlan aanyoor

¹ Maabo, bae maah mɔk si tiwan ni na, ki taa suln maah tuk si ke aa ŋa pu na daalbaadaal.

² Li ŋun tiwan ni mɔk nlan na, ki pɔɔk aabaa ki bee naatataa.

³ Mbamɔn, li mee ban nlan; ki li gaŋni ban tiwan aatataa aabeem.

⁴ Li ban kina aawan, ke saah ban tikunabr ni liwankpal li bɔr na pu na.

⁵ Aa yaa ŋani kina kan, aa beer naah ŋan sakpen pu ke aa li san Uwumbɔr ijawaan, aan ki bee waabɔr na.

⁶ Uwumbɔr le tii nlan; uma chee le nlan, ni ichiin, ni tiwan aatataa aabeem nyani.

⁷ U ter binib bi aabimbin ŋan na, le ki kii bi.

⁸ U kiir binib bi gee biŋeen aatɔtiib na, ni binib bi di bibaa tii u na.

⁹ Aa yaa ŋun tii mi kan, aa ga bee tiwan ni ye mbamɔn, ki tok, ki ŋan na. Aa ga bee saah ga tun pu na.

¹⁰ Aa ga ŋa nlan, le saalan ngbaan ga tii si mmɔɔn.

¹¹ Saalan mu cha aa beer tiwan aatataa na ga li kii si,

¹² ki nyan si kinimbɔŋ ni. Mu ga nyan si binib bi aamɔliin ban tibɔr,

¹³ aan bi di nsanyaan di lii, ki ye kinimbɔŋdam,

¹⁴ ki ye binib bi kani mmɔɔn, baatunwanbir, ni kijɔrk aatunwanbir pu,

¹⁵ ki ye binib bi unii aan ŋmaa puk kipupuk bi pu na.

^16-17 Aa ga ŋmaa nyaŋ upiidagoor u suln u ni uchal aah puu tipuur ti na bɔr, ki nyan uchal aapuwɔb, ki pɔɔni ubaa ke u di kimɔmɔɔn nyaŋ si na.

¹⁸ Aa yaa dii u buen udo kan, aa dii nsan mu cha nkun ni na la. Aa yaa chaa nima kan, aa duun kitekpiitiŋ a.

¹⁹ Unii ubaa aa kee buen ti mann u ki ki gir ni. Udaan aa ki gir ni limɔfal aasan ni.

²⁰ Kina pu na, aa li dii binib bi aabimbin ŋan na aah dii nsan mu na.

²¹ Binib bi aabimbin ŋan na, ni binib bi kaa kpa beebee na ga li bi timi aatiŋ kee pu,

²² le Uwumbɔr ga chuu nyan bibiindam ni titunwanbirdam kitiŋ ngbaan pu, ke baah ŋɔi tisufabir lir pu na la.