Ŋiyataŋak 18 - Uwumbɔr aagbaŋ

¹ Binib bi kaa gee kaa biken chee na aatafal aa bi biken aabɔr ni; bi ga yii tiwan ni binib biken nyi ke ni ye tiwanyaan na.

² Ujɔr yaa bee tiwan aatataa, bee waa bee kan, utafal aa bi ni ni; waah ban pu na le ye ke u mɔk waah nyi sakpen pu na.

³ Titunwanbir ni inimɔɔn dii tɔb la. Bii saayimbil, ki gaa ŋisiibil teen laabuul ni.

⁴ Unii aamɔbon ga ŋmaa li kpa nlan, ki nyoo ke nnyusakpem aah nyoo pu na, ki bi chain ke nkpen mu puu na.

⁵ Naa ŋan ke aa kpee unii u jin libɔkpol na pu, ki cha unii u aabɔr ŋan na lann waabamɔn.

⁶ Ujɔr yaa piin kinikpakpak kan, u bi ban tigbar la.

⁷ Ujɔr yaa len tibɔr kan, u bi kulni waamɔfal la; ubaa aamɔliin le chur u.

⁸ Libɔmbɔtukl mɔ sakpen, ti neen sakpen ke ti pel li.

⁹ Ugbanyakdaan aa ŋan ke unii u bii tiwan na aah kaa ŋan pu na la.

¹⁰ Uwumbɔr naahn lidichal li bi maa aan li pɔɔ ki fɔk na la, nima chee le binib bi aabimbin ŋan na ga buen ki ti kan ŋŋmarm.

¹¹ Biwankpadam ma dak le ke baawangol kii bi ke ŋigon ŋi bi maa gob kitisakpeŋ aan ŋi fɔk ki pɔɔ na la.

¹² Unii yaa kaa sunn ubaa taab kan, waan ŋmaa kan kipak; binib bi yoor bibaa paacham sakpen na bi nkun aasan ni la.

¹³ Pel waahr ki nin gar tibɔr. Aa yaa kaa ŋa kina kan, aa ye ujɔr, ki ga kan inimɔɔn la.

¹⁴ Aa yaa bun ki kpa limakl ke aa ga pɔɔk kan, aa ga sil ŋmar, tɔ, aa yaa makr lii ke saan pɔɔk kan, ni doo aa pu le na.

¹⁵ Binib bi kpa ichiin na aanimbil man, le bi gor n‑yoonn mɔmɔk ke bi bae tiwan niken.

¹⁶ Aa ban ke aa kan uninyuun aa? Tii u ipiin, le naan ki li pɔɔ.

¹⁷ Unii u puen len tibɔr libɔjil ni na aabɔr bi le ke taah ŋan le na, tɔ, u ni unii u kpa tibɔr na yaa piin ki bi baa u mbaan kan, njirm fuur ni la.

¹⁸ Bipɔɔndam bilee yaa kpak tɔb libɔjil ni kan, too inaan ki cha Uwumbɔr kuln tibɔr ngbaan.

¹⁹ Ter aana aabo aan u li kii si ke ligoln li kii kitisakpeŋ na. Tɔ, aa ni uma yaa jaa kan, waan ki cha aa koo ni waadichal ni.

²⁰ Saamɔliin mɔmɔk le ye saamɔfal.

²¹ Saamɔliin le ga ŋmaa gaa si lii, le ki ga ŋmaa junn saamɔfal mu; kina pu na, li nyi ki gaa saamɔliin aah joo ni si tiwan ni na.

²² Kan upii ki bee ke aa kan tiwanyaan la; ni mɔk ke Uwumbɔr gee si la.

²³ Ugiin yaa len kan, ni ŋan ke u sunn ubaa taab mbamɔm, le uwankpadaan ma yaa gar kan, ni ye kigaak ŋmeen la.

²⁴ Kijɔtiik kibaa aa yunni, le jɔtiib bibaa mu jer unii ni una aabo.