Ŋiyataŋak 17 - Uwumbɔr aagbaŋ

¹ Aa yaa ŋman lisaaŋmiil ki kpa nsuudoon kan, ni ŋan jer ke aa ji njim sakpem lidichal li ponn ni ye tibɔr ŋmeen na.

² Unaagbiija u kpa nlan na ga gaa udindaan aajapɔɔn u kaa sɔ na chee ute aapɔɔn ki nan gaa waafaal ngem.

³ Mmii le bi joo tɔŋni salmaa ni tikunabr, Uwumbɔr mu le tɔŋni unibɔn aasui lik.

⁴ Titunwanbirdam le pel ilandak i kaa ŋan na, le binyamɔndam mu pel inyamɔn aabɔr.

⁵ Aa yaa laa bigiim kan, aa seei Uwumbɔr u naan bi na la. Aa yaa di aaŋeen aatɔ aafalaa ŋa saapopiin kan, Uwumbɔr ga daa aatafal.

⁶ Bijaninkpiib kpa biyaabitiib pu kipupuk ke bibilb aah kpa kipupuk bitetiib pu pu na la.

⁷ Bijɔrb aa kpa tinyoor aabɔr tibaa bi len, le biyidam ma aa geei inyamɔn.

⁸ Binib bibaa dak ke igaŋgaŋlik tun ke nnyɔk na la; bi kpa gaakii ke i ga ŋmaa ŋa tiwan mɔmɔk tii bi.

⁹ Aa yaa ban ke binib li neen si kan, di cha pinn bi buyoonn bi tun si taani na. Aa yaa teer taani bɔr kan, ni ga ŋmaa bii kijɔtiik.

¹⁰ Aa yaa sur ulandaan nfum mubaa kan, u bae mala ki jer saah ga gbaa ujɔr nfum nkub pu na.

¹¹ Nkun ga fuu ni bibiindam bi ban tibɔr n‑yoonn mɔmɔk na, ke ntuundaan u kpa mbiin na la.

¹² Aa yaa to takɔ u binib ku waabim mɔmɔk na nsan ni kan, ni ŋan jer ke aa ti kan ujɔr aah bi tun waajɔrk aatuln pu na.

¹³ Aa yaa di titunwanbir pan tiŋann kan, titunwanbir aan ki nya saadichal ni daalbaadaal.

¹⁴ Kinikpakpak aah ga piin pu na naahn mmɔgbaamii la; goo ki aan ki taa ki foor kpee.

¹⁵ Tiwan nilee nee mɔmɔk bir Uwumbɔr chee la: nima le ye ke aa bii unii u kaa kpa taani na, bee aa tii ubiindaan mbamɔn.

¹⁶ Ujɔr yaa ji waamombil tiwan aabaem pu kan, naa kpa u tinyoor tibaa, ba pu? waa kpa kpakpaln aalan.

¹⁷ Jɔtiib mɔk tɔb ngeehm n‑yoonn mɔmɔk la. Naabitiib ma yakr tibɔbir la.

¹⁸ Unii u kaa kpa nlan na le ga puu ke u ga gaa uken aapɔln ki pa.

¹⁹ Li gee kinimbɔŋ aatataa le ye ke aa li gee libɔbaln. Aa yaa kpa kipupuk n‑yoonn mɔmɔk kan, aa bi ban tibɔr la.

²⁰ Unii umɔk dakl lik ki ki len tibɔbir na aan kan tinyoor tibaa, kinimbɔŋ ŋmeen le u ga kan.

²¹ Ubo u tun kijɔrk aatuln na aate aanyoor le ye kinimbaak ni mpombiin.

²² Mpopiin tii si laafee la. Aa yaa kpa mpombiin n‑yoonn mɔmɔk kan, ni ye nkun mu kaan ku si mala na la.

²³ Bibɔjirb bi kpa beebee na looni gaal igaŋgaŋlik la, kina pu na, mbamɔn aan ŋmaa ŋa.

²⁴ Unii u chi na lik ban isanyaan la, le ujɔr ma piini waah gee lipepel li na.

²⁵ Japɔɔn u ye ujɔr na joo ni ute mpombiin la, le ki joo ni una yaa‑ba‑nyi u wu na.

²⁶ Naa ŋan ke aa cha unii u kaa kpa taani na pa libɔkpol aapɔln; aa yaa daa uninyaan aatafal kan, aa yii ibamɔn le na.

²⁷ Unii u nyi ubaa pu na aa len n‑yoonn mɔmɔk. Binib bi bi suuna na kpa nlan.

²⁸ Tɔ, ujɔr mu yaa ka ŋmin suuna, kaa waar umɔb len tibɔr kan, aa ga li nyi ke u kpa nlan ki chi la.