Ŋiyataŋak 16 - Uwumbɔr aagbaŋ

¹ Unibɔn aalandak nyani usui ni la, le yaadoon tee bi Uwumbɔr chee.

² Unibɔn ma dak ke waabimbin mɔmɔk ŋan la, Uwumbɔr baanja mu le nyi unibɔn aabimbin aah bi pu na.

³ Di saalandak mɔmɔk ŋa Uwumbɔr aaŋaal ni, le ki kan tinyoor saalandak ngbaan ni.

⁴ Uwumbɔr aah ŋa tiwan ni mɔmɔk na kpa naah ga ti doo pu na, hali bibiindam aatafadaan aawiin daal bi la.

⁵ Uwumbɔr aa gee unii u yoor ubaa paacham na; waan cha u nya ntafadaan ni kpala.

⁶ Li dii mbamɔm ki li si chob aan Uwumbɔr di saatunwanbir cha pinn si. Kii tii Uwumbɔr ki taa kan tibɔbir tibaa.

⁷ Uwumbɔr aasui yaa piin aa pu kan, saadim ga kpaln aajɔtiib la.

⁸ Aa yaa di ibamɔn kan siib kina kan, ni ŋan jer ke aa di inyamɔn kan liwangol li wiir na.

⁹ Unibɔn ga ŋmaa ŋa waalandak usui ni, Uwumbɔr mu le ga tee mɔk u waah ga ŋa pu na.

¹⁰ Ubɔr aamɔbon nyan ni Uwumbɔr chee la, kina pu na, umɔb ni taa li kpa inyamɔn.

¹¹ Tiwaŋaŋkaan ni ye nibamɔnn na nyan ni Uwumbɔr chee la. Uma le ŋa tiwaŋaŋkaan mɔmɔk naah bi pu na.

¹² Bibɔrb aa gee titunwanbir, ba pu? ibamɔn pu le nnaan mɔmɔk kpa mpɔɔn.

¹³ Bibɔrb ban binib bi len ibamɔn na la, le ki lik faar binib bi len ibamɔn na.

¹⁴ Ulandaan pɔɔni ubaa ki tii ubɔr mpopiin la; ubɔr aaŋuul ga ŋmaa joo ni nkun.

¹⁵ Ubɔr yaa lik faar unii kan, ni naahn ntaalangbam mu joo ni utaal kiseek ni na la, limɔfal bi nima chee.

¹⁶ Ni ŋan ki ti nyaŋ ke aa li kpa nlan ni ichiin, ki jer salmaa ni ŋimombil.

¹⁷ Binib bi aabimbin ŋan na chuun isan i kaa kpa titunwanbir na pu la; kina pu na, li nyi saah chuun nin chee na, nibaakan, ni ga ŋmaa gaa saamɔfal lii.

¹⁸ Kipupuk joo ni libiil la, le kigaak joo ni nkun.

¹⁹ Ni ŋan ke aa sunn aabaa taab ki li ye ugiin, ki jer ke aa li ŋmal binib bi yoor bibaa paacham na ni, ki yakr bi chee baah sun biken aawan ni na.

²⁰ Li pel mmɔkm mbamɔm, ki kan tinyoor saatuln ni; kii tii Uwumbɔr aan ki li kpa mpopiin.

²¹ Bi nyi unii u kpa nlan ki muun mu ni na bɔr waaŋuntii pu na. Waamɔliin mɔ, le binib keei tii u.

²² Nlan le ye limɔfal aanyunbun ki tii bilandam, le aa yaa pɔɔni aabaa ki mɔk bigbaam kan, ni bii n‑yoonn.

²³ Binib bi kpa ichiin na dakl lik waahr le ki nin len; le baah len pu na mu moo tii nnyuum.

²⁴ Imɔliinyaan naahn tisiir la, i mɔ ki tii si laafee.

²⁵ Saah dak ke nsan mu ŋan na ga ŋmaa di si buen nkun ni.

²⁶ Nkon aah joo ututunn na le cha u moo tun sakpen, ba pu? u ban ke u lee waakpeek la.

²⁷ Titunwanbirdam ban isan i bi ga di bii biken na la; hali baamɔbon ga ŋmaa see si ke mmii aah seer pu na la.

²⁸ Bibiindam le ye bibɔmbɔtukb; bi ban tibɔr, le ki bii kijɔtiik.

²⁹ Binib bi aabimbin pɔɔ na ŋmanni bijɔtiib le ki joo bi kooni tibɔbir ni.

³⁰ Li nyi binib bi yaa kan si kan, bi laa mulmul ki kae si ŋinimbil na bɔr; kina aanib kpa aa pu ilandak i kaa ŋan na.

³¹ Binib bi aabimbin ŋan na aapar le ye limɔfal li fɔk na, iyikpipiin ye tiwan ni ŋan ki kpa kipak na la.

³² Aa yaa kpa limɔr kan, ni ŋan jer mpɔɔnsakpiin. Aa yaa ŋmaa chur aabaa tibɔr yoonn kan, ni ŋan jer ke aa nyaŋ ntim mu wiir na.

³³ Unibɔn too inaan ke u di bee Uwumbɔr aageehn, tɔ, Uwumbɔr ubaa le nyi waah ga gar pu na.