Ŋiyataŋak 15 - Uwumbɔr aagbaŋ

¹ Ngarm mu bi suuna na sɔŋni liŋuul la, le mmɔpɔɔn aagarm fiini liŋuul.

² Binib bi kpa nlan na yaa len tibɔr kan, bi moo tii nlan kinyaan la, le bigbaam ma aabɔr punni kijɔrk.

³ Uwumbɔr waa tiwan ni ŋani ŋipepel mɔmɔk ni na; ti yaa ŋani tiwan ni ŋan na, bee ti yaa tun titunwanbir kan, u waa ti.

⁴ Lilambil li sɔŋni sui na tii limɔfal la, le mbiin aamɔbon ma kulni limɔfal.

⁵ Ni ye kijɔrk le ke aa yii aate aah mɔk si pu na; ni ŋan ke aa gaa waasurm.

⁶ Binib bi aabimbin ŋan na aawangol dɔ kii bi la, le limukl yoonn kan, bibiindam ma lann baawangol.

⁷ Binib bi kpa nlan na le joo nlan tii biken, naa ye bijɔrb.

⁸ Uwumbɔr aa gee bibiindam aatork, le usui piin bininyaam aameel pu.

⁹ Uwumbɔr aa gee titunwanbirdam aabimbin, le ki gee binib bi ŋani tiwan ni ŋan na aabimbin.

¹⁰ Aa yaa tun titunwanbir kan, aa ga kan ntafadaan mu bir ki pɔɔ na, sin u kaa gee nsurm na ga kpo la.

¹¹ Hali kitekpiitiŋ aan ŋmaa di tiwan ni bi ki ponn ni na bɔr Uwumbɔr; kina pu na, unibɔn ga ŋa kinye aan ki di waalandak bɔr Uwumbɔr?

¹² Binib bi yoor bibaa paacham sakpen na aa gee nsurm, baa kpaan baa bilandam ke bi mɔk bi nlan.

¹³ Binib aasui yaa piin kan, bi laa ŋimɔmumuk la, le bisui yaa bii kan, bi kpa kinimbaak.

¹⁴ Bilandam ban bi moo bae la, le bigbaam ma aasui piin maanyi pu.

¹⁵ Ugiin aabimbin ye u limukl la, le binib bi aasui piin na ji mmɔɔn n‑yoonn mɔmɔk.

¹⁶ Ni ŋan ke aa li ye ugiin ki san Uwumbɔr ki jer ke aa li kpa sakpen ki bi tibɔr ni.

¹⁷ Aa yaa ji tikpifar saah gee binib bi na chee kan, ni soor ni ke aa ŋmɔ unaamɔn nin chee kinanaŋ bi na.

¹⁸ Binib bi aasui fiir mala mala na joo ni kinikpakpak la, le limɔr ma joo ni nsuudoon.

¹⁹ Aa yaa ye ugbanyakdaan kan, aa kani limukl ŋipepel mɔmɔk pu la, tɔ, aa yaa si chob kan, saan kan tibɔr daalbaadaal.

²⁰ Ubolandaan aate aasui piin u pu la. Ujɔr baanja le lik una fam.

²¹ Bigbaam aasui piin baajɔrk aatuln pu la, le bilandam ma ŋani ni ŋan na.

²² Nsurm yaa kaa bi kan, ilandak beer fam la, le bisusurb yaa wiir kan, i toor.

²³ Aa yaa kan tibɔnyaan taayoonn kan, ni tii mmɔɔn la.

²⁴ Bilandam aasan cha paacham limɔfal chee la, naa ye nsan mu cha taab nkun ni na.

²⁵ Uwumbɔr ga kuln binib bi yoor bibaa paacham sakpen na aadichal, le ki tee ga li kii ukpopii aawangol ma.

²⁶ Uwumbɔr aa gee ilandak i kaa ŋan na, le ki neen kijɔtiik aamɔbon ma.

²⁷ Ukumɔndaan ban tibɔr tii waadichal la, le unii u yii igaŋgaŋlik na kpa limɔfal.

²⁸ Bininyaam dakl lik tibɔr aatataa waahr le ki nin gar. Titunwanbirdam ma gar mala le ki ban tibɔr.

²⁹ Uwumbɔr daa bibiindam chee, le ki ŋun binib bi aabimbin ŋan na ma aameel.

³⁰ Binib bi laa limɔmumukl na tii mpopiin la, le tibɔnyaan mu pɔɔk itaakpab.

³¹ Unii umɔk kpa ŋuntii nsurm chee na kpa nlan le na.

³² Unii umɔk yii nsurm na, aa gee ubaa. Aa yaa kpa ŋuntii nsurm chee kan, aa ga moo kan nlan.

³³ Aa yaa san Uwumbɔr kan, ni ye inimbiwoln la. Waahr aan aa kan bunyuŋ na, see aa suln aabaa taab.