Ŋiyataŋak 11 - Uwumbɔr aagbaŋ

¹ Uwumbɔr nan binib bi joo beebee aawaŋaŋkaan ŋaŋni tiwan na. Usui piin tiwaŋaŋkaan ni ye nibamɔnn na pu.

² Naan yunn le binib bi mak sakpen na ji inimɔɔn. Ni ye nlan ke aa li bi suuna.

³ Aa yaa ye unii u ŋan na kan, saabimbinyaan le kii si. Binib bi kpa beebee na aabeebee le kuln bi.

⁴ Nwiin mundaal aa ni nkun ga kan tɔb na, liwankpal aan ŋmaa gaa si lii, le saabamɔn ma ga gaa si lii.

⁵ Ibamɔn le tii uninyaan lifuur, le mbiindaan ma ga joo ni ubaa aalirm.

⁶ Mbimbinyaan le gaal ubamɔndaan lir, le saah kaan ŋmaa nyu unii u pu baala na aakumɔŋ chur u ŋani tibɔr ni.

⁷ Ubiindaan yaa kpo kan, waah ba kpa limakl li na mu kpoi diir u la. Unii u di waamakl mɔmɔk ŋa liwankpal ni na ga nan lir la.

⁸ Binib bi aabimbin ŋan na nya tibɔbir ni la; le ti tee choo bibiindam ma chee.

⁹ Binib bi kaa nyi Uwumbɔr na aabɔlen ga ŋmaa kuln saamɔfal, le binib bi aabimbin ŋan na aalan ga ŋmaa nyan si tibɔr ni.

¹⁰ Binib bi aabimbin ŋan na yaa kan nkam kan, kitiŋ ponn ni kpa mpopiin la, le bibiindam yaa kpo kan, mpopiin aafuuk fiir mpɔɔn pu.

¹¹ Binib bi aabimbin ŋan na yaa mee Uwumbɔr aanyoor ŋa kitiŋ pu kan, ki kani liyimbikpaan la; le bibiindam ma aamɔbon joo ni kitiŋ aadoon.

¹² Aa yaa bii aaŋeen aatɔtiib aayimbil kan, ni ye kijɔrk la. Aa yaa kpa nlan kan, li ŋmin suuna.

¹³ Ubaa aan di tibɔbɔrkaan tuk ubɔmbɔtukr, tɔ, aa ga ŋmaa mak unii u ŋmaa joo tibɔbɔrkaan na pu.

¹⁴ Litimbol yaa kaa kpa ujojoor u kpa nlan kan, li ga lir la. Bisusurb yaa wiir kan, ni mɔk ke ŋŋmarm bi le na.

¹⁵ Aa yaa puu ke aa ga pa uchaan aapɔln kan, aa ga nan wii nwiin pu. Aa yaa kaa di aabaa koon kina aabɔr ni kan, ni ŋan tii si.

¹⁶ Upii u aabimbin ŋan na kpa kipak binib chee, le binib bi aabimbin pɔɔ na kan liwankpal.

¹⁷ Aa yaa kpa tiŋann kan, aa tii aabaa le tiŋann. Aa yaa kpa mbiin kan, aa tii aabaa le titotonn.

¹⁸ Bibiindam aa sil kani tinyoor tibaa, tɔ, aa yaa ŋani tiwan ni ŋan na kan, aa ga sil kan kina aaŋann.

¹⁹ Unii umɔk aanimbil man ke u ŋa tiwan ni ŋan na ga li kpa limɔfal, tɔ, unii umɔk aanimbil man ke u tun titunwanbir na ga kpo.

²⁰ Uwumbɔr aa gee binib bi kpa tilandakwanbir na, le ki tee gee binib bi ŋani ni ŋan na.

²¹ Li nyi gbin gbin ke titunwanbirdam ga kan ntafadaan, le binib bi aabimbin ŋan na ma ga ŋmar.

²² Upii u kpa kinyaan kaa kɔ nibaa na aanyaan naahn salmaa aabɔmbik ki too ugbeer aamɔfajuln pu na la.

²³ Bininyaam aah ban tiwan ni na nya n‑yoonn mɔmɔk ki ŋan la, le bibiindam ma yaa kan baah ban pu na kan, ni wu unii mɔmɔk.

²⁴ Binib bibaa tii baamombil bisui mɔmɔk, le ki moo kani liwankpal. Bibaa mu tii ki chur bibaa le ki moo ŋani bigiim.

²⁵ Li kpa tiŋann sakpen aan ki moo kan liwangol. Ter biken aan ki mu kan nterm.

²⁶ Binib puuni lir unii u joo njikaabim siini ke mu moo ŋa kidaak na pu, le ki pak unii u nyan waajikaabim siin kinyaŋ ni ke binib daa na.

²⁷ Unii umɔk ban ke ni li ŋan na ga kan kipak, le umɔk ban tibɔr na ga kan kina.

²⁸ Binib bi di baanaadii tii liwangol na ga lir ke lipeel aafar na, le binib bi kpa mbimbinyaan na ga kan liwangol ke kiseek ni aafar na.

²⁹ Unii u ban tibɔr tii waadichal na ga nan lann tiwan mɔmɔk. Bijɔrb le ga li ye bilandam aanaagbiib n‑yoonn mɔmɔk.

³⁰ Mbimbinyaan tii limɔfal la, le mbiin ma junni li.

³¹ Bininyaam kani baapar dulnyaa ni do la, kina pu na, li nyi gbin gbin ke mbiindam ni titunwanbirdam ga kan ntafadaan.