Ŋiyataŋak 1 - Uwumbɔr aagbaŋ

Ŋiyataŋak aanyoor

¹ Israel yaab aabɔr David aajapɔɔn Solomonn u mu nan ye ubɔr na aayataŋak.

² Ŋiyataŋak ŋimina le ga cha aa bee nlan ni nsurm mu ŋan na, ki bee imɔliin i kpa tataa na.

³ Ŋi ga mɔk si saah ga ŋa pu ki li bi mbimbin mu ŋan, ki tok, ki bi chob na ni.

⁴ Ŋi ga ŋmaa ŋa unii u kaa kpa ichiin na ulandaan, ki mɔk binib bi laa diin na baah ga li bi mbimbin mu na.

⁵ Ŋiyataŋak ŋee ga ŋmaa kpee bilandam nlan, ki ga mɔk binib bi bae mbaem na nsan,

⁶ aan bi moo bee ŋiyataŋak ŋi bilandam ŋakl na aatataa.

Binib bi laa diin na aasurm

⁷ Waahr aan aa nin kan nlan na, see aa kpa kipak ni ijawaan ki tii Uwumbɔr. Bijɔrb ma aa ban nlan, ki yii ke baan bae mu.

⁸ Maabo, li pel aate ni aana aah tuk si pu na.

⁹ Baamɔkm ga toor saabimbin, ke kiyikpupuk nyaan, ni nleenyaan aah ga kpee si kinyaan pu na.

¹⁰ Maabo, kinimbɔŋdam yaa ŋmann si kan, taa kii tii bi.

¹¹ Bi gaa bui si ke, “Cha ti buen ki ti ban unii ki ku u. Cha ti buen ti keln binib bi kaa kpa taani na, aan ki gbaa bi, aan ni li mɔ timi.

¹² Ti yaa ti kan bi kan, bi ga li fu ki pɔɔ, le ti ti doo na, bi ga kpo.

¹³ Ti ga kan liwankpal mɔmɔk aabɔŋ, ki gbiin timi aadichal.

¹⁴ Dan nan ti kpee ti pu, aan ti yakr taah ga sun tiwan ni na.”

¹⁵ Maabo, taa dii binib bimina aaboln. Taa duun bi chee.

¹⁶ Baan ŋmaa kal kaa tun titunwanbir. N‑yoonn mɔmɔk kan, bi bi ban bi ku ubaa la.

¹⁷ Naa ŋan ke aa di gaawɔb pen uchakpee aanimbil ni,

¹⁸ tɔ, kina aanii bi pen ubaa aagaawɔb la, gaawɔb u u pen na ni le u ga kpo.

¹⁹ Unii umɔk su nnaayupɔɔn na aamɔfal door la. Unii umɔk aabimbin bir na aadoon le ye nkun.

Nlan aah yin si pu na

²⁰ Li pel man. Nlan le yin ntim, ni kinyaŋ ponn ni,

²¹ ki tar mpɔɔn pu ntikpaam aabisamɔi chee, ni binib aah kuuni nin chee na ke:

²² “Bijɔrb, ni ban ni yunn kijɔrk ni kinye? Ni ban ke ni laa nlan ki ti saa bayoonn? Ni ga sil bae mbaem aa?

²³ Li pel man maasurm, m ga tii nimi nsurm mu ŋan na, ki yakr maalan tii nimi.

²⁴ M yin nimi, ki mee nimi ke ni dan m chee, le naa ŋun. Naa gar mi kpala.

²⁵ Ni yii maasurm, kaa gee ke m mɔk nimi mbamɔn.

²⁶ Kina pu na, ni yaa koo tibɔr ni kan, m ga laa nimi. M ga ŋa nimi mbɔnyun, buyoonn ijawaan fuu ni nimi na,

²⁷ m ga ŋa nimi mbɔnyun, buyoonn i fuu ni nimi ke kitaabuŋ, ki joo ni nimi tibɔbir, aan ni bi iween sakpiin ni na.

²⁸ N‑yoonn ngbaan le ni ga yin mi, le maan gar nimi. Ni ga tee mban ki ban mi nwiin pu, ni kinyeek, kaan kan mi.

²⁹ N‑yoonn mɔmɔk naa di nlan yin nibaa, ki yii, naan kii tii Uwumbɔr.

³⁰ Ni yii maasurm n‑yoonn mɔmɔk, kaa ŋun tii mi buyoonn m mɔk nimi mbamɔn na.

³¹ Kina pu le ni ga kan naah ban pu na, le nimi nibaa aabimbin ga cha ni buŋ.

³² Bijɔrb aah yii nlan na le cha bi kpoi. Bijɔrb aah yii, kaan ŋun pu na le ku bi.

³³ Unii umɔk ŋun tii mi na aan kan tibɔbir tibaa. U ga li kpa lifuur, kaan li san ijawaan.”