Nehemia 9 - Uwumbɔr aagbaŋ

Binib ngbaan aah nan kpiir baatunwanbir pu na

^1-2 Uŋmabaan ngbaan ponn ni aawiin moninko ni inaa daal le Israel yaab nan kuun ke bi lul bumɔb ki mɔk baapombiin baatunwanbir pu. N‑yoonn mue na bi nan yakr biwɔwɔm bi ŋmal bi ponn ni na chee. Bi nan pee tiwanpeenkaan ni saak kuub na, le ki di titan puŋ biyil, bisui aah bii pu na pu. Le bi sil ki kpiir baatunwanbir, ni biyaajatiib mu aatunwanbir pu.

³ Bi nan karn Bidindaan Uwumbɔr Aakaal tii bi ki ti saa tikur titaa aah ga yunn pu na, ki ki yoor tikur titaa aah ga yunn pu na le ki di kpiir baatunwanbir pu ki doon Bidindaan Uwumbɔr.

⁴ Bi nan ŋa paangara tii Liifai yaab; le Jesua, ni Bani, ni Kadmiel, ni Sebania, ni Buni, ni Serebia, ni Bani, ni Kenani, si tɔk u pu. Bi nan teen mpɔɔn pu ki mee Bidindaan Uwumbɔr.

⁵ Liifai yaab bimina le nan bui binib ngbaan ke bi doon Uwumbɔr: bima le ye Jesua, ni Kadmiel, ni Bani, ni Hasabneya, ni Serebia, ni Hodia, ni Sebania, ni Petahia. Bi nan len ke: “Fii sil man ki pak Nidindaan Uwumbɔr. Pak u ki ti saa n‑yoonn mu kaa kpa ndoon na man. Cha unii mɔmɔk pak waayimbil li kpa kipak na, unibɔn mu aapak aa tee nyuun ki ga ŋeer u.”

Titunwanbir aakpiirn aameel

⁶ Le Israel aanib mee limeel limina: “Uwumbɔr, sin baanja le ye Uwumbɔr. Sin le naan paacham ni iŋmabi i bi kitaapaak na. Sin le naan kitiŋ, ni nnyusakpem, ni tiwan ni mɔmɔk bi ni ponn ni na; sin le tii ni mɔmɔk limɔfal. Paacham aawan mɔmɔk gbaani le ki dooni si.

⁷ Sin Tidindaan Uwumbɔr le nan lee Abram ki di u nyan ni Ur aatiŋ ki bi Babiloŋ ni na. Sin le nan kpeln waayimbil ki yin u ke Abraham.

⁸ Aa nan kan ke u kpa gaakii tii si, le aa nan puu tipuur tii u. Aa nan puu ke aa ga di Kanaann yaab aatiŋ tii u, ki kpee Hef yaab, ni Amor yaab aatim, ni Peris yaab, ni Jebus yaab, ni Girgas yaab aatim ke mu li ye uyaabitiib aatim. Saah ŋani saah len pu na n‑yoonn mɔmɔk na, aa joo saah puu pu na mbamɔm.

⁹ Aa nan kan tiyaajatiib aah jin falaa sakpen pu Ijipt aatiŋ ponn ni na. Baah nan yin si ke aa ter bi buyoonn bi nan bi Nnyusakpem Mamam na chee na, aa nan kii.

¹⁰ Aa nan tun iwaan aatun ki kiir Ijipt aabɔrkpaan, ni waaninkpiib, ni waanib bi bi kitiŋ ngbaan pu na, ba pu? aa nan nyi baah nan muk saanib pu na. Aa nan jin liyimbil li aa beenin kpa dandana wee na.

¹¹ Aa nan naan nsan nnyusakpem ponn ni ki tii saanib, ki cheen bi puur kitikuun pu. Binib bi nan san dii bi na ma nan bee nnyun mu nyoo na ponn ni, ke litakpal aah muini nnyusakpem ponn ni pu na.

¹² Aa nan cha ntaalangbam loln saanib pu nsan nwiin pu, ki cha mmii wiihn ki loln bi pu nsan kinyeek.

¹³ Aa nan sunn ni bi chee Sainai Aajool chee; nima chee le aa nan len bi chee tibɔr ki tii bi ikaal i ŋan na, ni mbaem mu kpa ntataa na.

¹⁴ Aa nan mɔk bi ke bi li joo Saakpaakool daal mbamɔm; ki nan di saakaal tii saatutunn Moses le u di ŋum bi.

¹⁵ Nkon aah nan joo bi na, aa nan tii bi tijikaar ti nyan ni paacham na, ki tii bi nnyun mu nyan ni litakpal ponn ni na, bi nyun. Aa nan bui bi ke bi li joo kitiŋ ki aa nan puu ke aa ga di tii bi na.

¹⁶ Le tiyaajatiib nan ŋa gaankpela ni n‑yipɔɔn, ki yii, kaa kii tii saakaal.

¹⁷ Bi nan yii, kaa kii tii si; bi nan suln saah ŋa tiwan nimɔk na; bi nan suln saah ŋa iwaan aawan nimɔk na. Baanimpoo ni, bi nan nyan uyidaan ubaa ke u di bi giin tinaagbiir ponn ni, Ijipt aatiŋ ni. Le aa ye Uwumbɔr u joo cha pinni titunwanbir na; aa ŋan ti nyaŋ, ki gee binib, le saaŋuul aa fii mala mala. Saanimbaasaln aah nyaŋ sakpen pu na, le saa nan yii bi.

¹⁸ Bi nan naan liwaal li bi ke unaajabo na, ki bui ke liwaal ngbaan le nan nyan ni bi Ijipt aatiŋ ponn ni. Uwumbɔr, bi nan seei si ki ti nyaŋ.

¹⁹ Le saa nan san cha bi nteersakpiin ngbaan ni, ba pu? saanimbaasaln wiir sakpen. Saa nan cha ntaalangbam mu nan mɔk bi nsan nwiin pu, ni mmii mu nan mɔk bi nsan kinyeek na siir cha bi.

²⁰ Saah ŋan sakpen pu na, aa nan mɔk bi baah ga ŋa pu na; aa nan di tijikaar ti bi yin ti ke mana na le di kpiin bi, ki tii bi nnyun mu, bi nyun.

²¹ Aa nan tii bi baah ban pu na nteersakpiin ni, ki ti saa ŋibin imonko ilee. Baawanpeenkaan aa nan kpo, le bitaa mu aa nan duun, kaa wu mu.

²² Aa nan cha bi jan ki nyaŋ ŋinibol ni nnaan aabɔŋ mu bi baatiŋ aanaanmɔk na. Bi nan jan ki nyaŋ ubɔr Sihonn aatiŋ ki bi yin ki ke Hesbonn na, ni ubɔr Og aatiŋ, ki bi yin ki ke Basann na.

²³ Saah nan tii bi mbim mu na nan wiir ke iŋmabi i bi kitaapaak na la, le bi jan, ki gaa ki koo kitiŋ ki aa nan puu ke aa ga di tii biyaajatiib ni bima na ni.

²⁴ Bi nan jan ki gaa Kanaann aatiŋ; aa nan nyaŋ binib bi koo nima na tii bi. Aa nan tii saanib mpɔɔn ke bi ŋa Kanaann aatiŋ aanib, ni baabɔrb, baah gee pu na.

²⁵ Saanib nan nyaŋ ntim mu bi maa ŋigon gob mu, ki kii mu na, ni ikpaakon i nyuun na, ni ŋidichal ŋi kpa liwangol na, ni inyunbun i binib puen gbii i na, ni nkpan aasui, ni ŋisubil aasui, ni ndaan aasubil aakpaakon. Bi nan jin baah gee pu na ki filk; bi nan jin mmɔɔn mumɔk aa nan di tii bi na.

²⁶ Le saanib nan yii saamɔb, kaa kii tii si; bi nan fenn bipuwɔb tii saakaal, ki nan ku saabɔnabtiib bi nan sak bi ki bui bi ke bi gir ni aa chee na. N‑yoonn n‑yoonn bi nan seei si;

²⁷ kina pu le aa nan cha baadim nyaŋ bi ki joo bi. Baah nan bi limukl ponn ni na bi nan yin si ke aa ter bi, le aa nan bi paacham ki kii. Saanimbaasaln sakpeln ponn ni le aa tii bi biyidam bi nan gaa bi lii baadim chee na.

²⁸ Nsuudoon aah gir ni na, le bi ki tun titunwanbir, le aa ki cha baadim nyaŋ bi. Le baah ki yii baatunwanbir ki fenn gir ni aa chee ke aa ter bi na, aa bi paacham ki ŋun, ki joo saanimbaasaln gaal bi lir n‑yoonn mɔmɔk.

²⁹ Aa nan sur bi ke bi kii saah mɔk bi pu na, le bi di kigaak ŋmeen ki yii saakaal; le unii aah ga ŋa pu ki li kpa limɔfal na, le ye ke u li joo saakaal ngbaan. Bi nan di n‑yipɔɔn ki yaar biyil gar gar, ki yii kaa kii saamɔb.

³⁰ Le ŋibin mɔmɔk aa ji suklaa bi pu ki sak bi, ki cha Saafuur Nyaan gbiini saabɔnabtiib ke bi sak bi, le bi yii ki kpaa bitafal, kina pu le aa cha baadim nyaŋ bi.

³¹ Le saanimbaasaln aah ti nyaŋ sakpen pu na, saa nan yii bi, kaa ku doo bi. Aa sil ye unimbaasaln Aawumbɔr u kpa lineen sakpen na la.

³² Uwumbɔr, timi Aawumbɔr, saapɔɔn wiir sakpen; Unii mɔk san si ijawaan, le saapɔɔn ti nyaŋ. Aa joo saah nan puu tipuur ti na mbamɔm. Ki nyan buyoonn Asiria aatiŋ aabɔrb nan muk timi na, hali ki nan saa din, taah jin falaa u na nyaŋ a. Timi aabɔrb, ni timi aayidam, ni timi aatotoorb, ni saabɔnabtiib, ni tiyaajatiib, ni timi aanib mɔmɔk jin falaa la. Teer taah jin falaa sakpen pu na.

³³ Saah daa timi aatafal pu na, aa kpa mbamɔn; ti tun titunwanbir, le sin ma ŋani saah len pu na kaa joo cha.

³⁴ Tiyaajatiib, ni timi aabɔrb, ni timi aayidam, ni bitotoorb mɔmɔk yii saakaal. Bi yii kaa pel saah bui bi pu na, ni saah sak bi pu na.

³⁵ Saanyoor pu, le bibɔrb joo saanib buyoonn bi nan bi kitiŋ ki waa ki nyuun aan aa nan di tii bi na ponn ni, le bi beenin ŋani titunwanbir kaa dii si.

³⁶ Le ti kpaln binaagbiib kitiŋ ki ponn ni aa nan di tii timi na, kitiŋ ki nyuun ki tii timi tijikaar na.

³⁷ Bibɔrb bi aa cha bi joo timi, timi aatunwanbir pu na le gaal kitiŋ ngbaan aah ŋani tijikaar ti na. Bi ŋani timi, ni timi aawakor baah gee pu na la, le ni bii tisui sakpen.”

Binib ngbaan ni Uwumbɔr aah ŋa kimɔbaan pu na

³⁸ Tiwan ni mɔmɔk ŋa na pu, le timi Israel aanib sil do, ki ban ke ti di ibamɔn ŋmee kimɔbaan aakpaam aagbaŋ kimina; le timi aayidam, ni Liifai yaab, ni timi aatotoorb di biŋaal paan nkpaam ngbaan pu.