Nehemia 8 - Uwumbɔr aagbaŋ

Esra aah karn Uwumbɔr aakaal tii binib ngbaan pu na

¹ Ki joo cha ni ŋmalole ponn ni na, Israel aanib mɔmɔk nan kal baatim ponn ni. Uŋmal ngbaan aajan aawiin daal le bi mɔmɔk nan kuun ni Jerusalem ponn ni, mbisamɔb mu bi yin mu ke Nnyun Aabisamɔb na chee. Bi nan bui Esra, u nan ye utotoor ki mu bae Nkaal mu Uwumbɔr nan di tii Moses ke u di tii Israel yaab na, ke u ti yoor ni Nkaal Aagbaŋ ngbaan.

² Kina pu na, Esra nan buen ti yoor ni Nkaal Aagbaŋ ngbaan, binib ngbaan aah kuun nin chee na, bijab, ni bipiib, ni mbim bi chikr ki ga ŋmaa bee tiwan aatataa na chee.

³ Mbisamɔb ngbaan chee le u nan karn Nkaal Aagbaŋ ngbaan ki nyan kichakpiik ni ki ti saa nwiin pu, le bi mɔmɔk si pel gbimm ke bi ŋun ti mɔmɔk.

⁴ Esra nan si tɔk paangara u bi nan paan u kina aatuln pu na pu la. Bijab bimina le nan si uŋangii wɔb: Matitia, ni Sema, ni Anaya, ni Uria, ni Hilkia, ni Maaseya. Le Pedaya, ni Misael, ni Malkija, ni Hasum, ni Hasbadana, ni Sekaria, ni Mesulam mu si uŋangan wɔb.

⁵ Esra aah nan si tɔk paangara ngbaan pu ki fɔk jer binib ngbaan mɔmɔk na, le bi mɔmɔk di binimbil kaan u pu. N‑yoonn mu u chuu kpar kigbaŋ ngbaan na, le bi mɔmɔk fii sil paacham.

⁶ Le Esra bui ke, “Pak Uwumbɔr man, u ye Uwumbɔr Sakpiin la.” Le binib ngbaan mɔmɔk yoor biŋaal paacham ki kii ke, “Amii, amii.” Bi mɔmɔk nan gbaan kitiŋ ki doon Uwumbɔr, le binimbil chik kitiŋ.

⁷ Le bi fii ki ki sil baasisiiyaan, le Liifai yaab bimina ŋeer Nkaal ngbaan aatataa tuk binib ngbaan: bima le ye Jesua, ni Bani, ni Serebia, ni Jaminn, ni Akub, ni Sabetai, ni Hodia, ni Maaseya, ni Kelita, ni Asaria, ni Josabad, ni Hanann, ni Pelaya.

⁸ Bi nan puen nabr Uwumbɔr Aakaal ngbaan waahr le ki nin bui bi mu aatataa, le binib ngbaan bee mbamɔm.

⁹ Binib ngbaan aah ŋun Nkaal ngbaan aah ban ke bi ŋa pu na, ni nan muk bi sakpen le bi piin ki bi wii. Kina pu na, Nehemia, u nan ye baayidaan na, ni Esra, u nan ye utotoor ki mu bee Nkaal ngbaan mbamɔm na, ni Liifai yaab bi nan tuk binib ngbaan mu aatataa na bui binib ngbaan ke, “Nwiin mumina ye nwiin mu bi chain ki tii Nidindaan Uwumbɔr na la, kina pu na, ni taa wii, ki taa kpeeni mu.

¹⁰ Kina pu na, li chaa kun man ki ti ŋa njim ki ji. Yakr man nimi aajikaar ni ndaan ki tii binib bi kaa kpa na. Din aawiin ye chain aawiin le ki tii Uwumbɔr, nima pu na, cha nisui li piin man. Mpopiin mu Uwumbɔr tii na ga tii nimi mpɔɔn.”

¹¹ Liifai yaab ngbaan nan pɔɔn bibaa ki chuun sɔŋni binib ngbaan aasui, ki tuk bi ke nwiin mundaal bi chain na, bi taa cha bisui bii.

¹² Kina pu le binib ngbaan mɔmɔk kun bido ki ti jin, ki nyun, ki kpa mpopiin, ki yakr baah kpa pu na tii biken; ba pu? bi bee baah karn pu tii bi na aatataa.

Tikakar Aajim

¹³ Kitaak aah ki woln na, le imaal ngbaan aaninkpiib, ni bitotoorb, ni Liifai yaab nan buen Esra chee ke bi ti bae Nkaal aabaem.

¹⁴ Bi nan ti kan ke Nkaal mu Uwumbɔr nan di tii Moses ke u di tii waanib Israel yaab na, nan siin ke bi ŋa tikakar ki li koo ti ponn ni n‑yoonn mu bi ban bi ji Tikakar Aajim na.

¹⁵ Kina pu le bi nan siin tibɔr timina ki di tii Jerusalem aatiŋ, ni ntikpaam, ni ntiwaatiir mu gur na ke, “Li cha man ŋigongon pu ki ti gaa tisufar, ni tibɔkpafar, ni isui i aafar nu mɔ na, ki nan ŋa tikakar ngbaan, nkaal ponn ni aah mɔk pu na.”

¹⁶ Le binib ngbaan ban tisufar ki nan ŋa tikakar baachin ponn ni, ni baadir aapaacham, ni Uwumbɔr Aadichal aachiln ponn ni, ni mpaan mu bi mbisamɔb mu bi yin mu ke Nnyun Aabisamɔb na, ni mu bi yin mu ke Efraim Aabisamɔb na chee.

¹⁷ Binib bimɔk nan nyan ni tinaagbiir ni na nan ŋa baakakar ki koo ti ponn ni. Ki nya Nunn aajapɔɔn Josua aayoonn ki nan saa liyaadaal ngbaan na, nwiin ngbaan daal le kina aajim nan ki ŋa, kina pu na, binib mɔmɔk aasui nan piin le ni mɔ bi mɔmɔk.

¹⁸ Ki nyan njim ngbaan aajan aawiin daal ki ti saa kookoo aawiin daal na, bi nan karni Uwumbɔr Aakaal ngbaan siisii le mu ti doo. Bi nan jin njim ngbaan ki ti saa iwiin ilole, le winiin daal na, bi mɔmɔk nan kuun ki doon Uwumbɔr, le ki ŋa kookoo aatork, Nkaal ngbaan aah mɔk pu na.