Nehemia 7 - Uwumbɔr aagbaŋ

¹ Taah maa ligoln ngbaan doo na, le ti di ibisamɔi aajaaleŋ tiib piin, le ki ban Uwumbɔr Aadichal aakikiib kaan, ki kan Lidichal ngbaan ni aalahngaab mu, ki tii Liifai yaab mu baatun.

² M nan ban bijab bilee le ki di siin ke bi li ye Jerusalem aayidam; bima le nan ye nna aabo Hanani, ni Hanania u ye bikikiib aaninkpel na. Hanania nan ye unii u aa ga ŋmaa mak u pu na la, ki ye unii u san Uwumbɔr naah ti sɔ na.

³ M nan bui bi ke bi li nyi ki taa piir ibisamɔi ngbaan kichakpinaanyeek ni see nwiin ti puu ki pɔɔk, aan ki ki piin ki laŋ i waahr aan bikikiib nin fii baatuln ni, kijook wɔb. M nan ki bui bi ke bi ban bikikiib, binib bi koo Jerusalem ponn ni na ni, ki tii bi ŋipepel ŋibaa bi li kii; ki ki ban biken mu bi li manni baadichal chee.

Binib bi nan nyan ni tinaagbiir ni ki gir ni na sɔ

⁴ Jerusalem nan ye kitiŋ ki wiir na la, le binib bi nan koo ki ponn ni na aa tee wiir, le kaadichal mu aa nan kee wiir.

⁵ Uwumbɔr nan cha m ŋa nlandak ke m kuun binib ngbaan, ni baayidam, ni baaninkpiib ki bee baamaal aah ye pu na. M nan kan binib bi nan puen nyan tinaagbiir ni ki kun ni na aayimbil aagbaŋ. Maah nan kan pu na sɔ:

⁶ Baah nan chuu bi buen tinaagbiir ni na pam le nan nyan ni Babiloŋ ki gir ni Jerusalem, ni Juda aatiŋ pu, bi mɔmɔk nan kun baatiyil ponn ni. Baamaal nan koo Babiloŋ ni buyoonn ubɔrkpaan Nebukadnesar nan chur bi tinaagbiir ki di buen nima na la.

⁷ Binib bimina le nan ye baayidam: Serubabel, ni Josua, ni Nehemia, ni Asaria, ni Raamia, ni Nahamani, ni Modekai, ni Bilsann, ni Misperef, ni Bigfai, ni Nehum, ni Baana.

^8-25 Binib bi nan ye Israel yaab ki gir ni na aayimbil sɔ, mmaal mɔk ni ŋaanib bi nyan tinaagbiir ngbaan ni ki gir ni na: Paros aamaal ponn ni—binib ŋichur ŋilee ni binib nkub ni imonko itaa ni kipiik ni bilee; Sefatia aamaal ponn ni—binib ikui itaa ni imonko itaa ni kipiik ni bilee; Ara aamaal ponn ni—binib ikui iloob ni piiŋmu ni binib bilee; Pahaf Moab, u nan ye Jesua ni Joab aayaabil na aamaal ponn ni—binib ŋichur ŋilee ni ikui iniin ni kipiik ni biniin; Elam aamaal ponn ni—binib lichur ni ikui ilee ni piiŋmu ni binaa; Satu aamaal ponn ni—binib ikui iniin ni imonko ilee ni biŋmu; Sakai aamaal ponn ni—binib ikui ilole ni imonko itaa; Binui aamaal ponn ni—binib ikui iloob ni imonko ilee ni biniin; Bebai aamaal ponn ni—binib ikui iloob ni moninko ni biniin; Asgad aamaal ponn ni—binib ŋichur ŋilee ni ikui itaa ni moninko ni bilee; Adonikam aamaal ponn ni—binib ikui iloob ni imonko itaa ni bilole; Bigfai aamaal ponn ni—binib ŋichur ŋilee ni imonko itaa ni bilole; Adinn aamaal ponn ni—binib ikui iloob ni piiŋmu ni biŋmu; Ater, u bi nan ki yin u ke Hesekia na, aamaal ponn ni—binib imonko inaa ni kipiik ni biniin; Hasum aamaal ponn ni—binib ikui itaa ni moninko ni biniin; Besai aamaal ponn ni—binib ikui itaa ni moninko ni binaa; Harif aamaal ponn ni—binib nkub ni kipiik ni bilee; Gibeonn aamaal ponn ni—binib imonko inaa ni kipiik ni biŋmu.

^26-38 Binib bi aayaajatiib nan koo ntim mue ponn ni na mu nan gir ni: Betlehem ni Netofa aatim ponn ni—binib nkub ni imonko inaa ni biniin; Anatof aatiŋ ponn ni—binib nkub ni moninko ni biniin; Bef Asmafef aatiŋ ponn ni—binib imonko ilee ni bilee; Kiriaf Jearim, ni Kefira, ni Beerof aatim ponn ni—binib ikui ilole ni imonko ilee ni bitaa; Rama ni Geba aatim ponn ni—binib ikui iloob ni moninko ni ubaa; Mikmas aatiŋ ponn ni—binib nkub ni moninko ni bilee; Betel ni Ai aatim ponn ni—binib nkub ni moninko ni bitaa; Nebo aatiŋ kiken na ponn ni—binib piiŋmu ni bilee; Elam aatiŋ kiken na ponn ni—binib lichur ni ikui ilee ni piiŋmu ni binaa; Harim aatiŋ ponn ni—binib ikui itaa ni moninko; Jeriko aatiŋ ponn ni—binib ikui itaa ni imonko ilee ni biŋmu; Lod, ni Hadid, ni Ono aatim ponn ni—binib ikui ilole ni moninko ni ubaa; Senaa aatiŋ ponn ni—binib ŋichur ŋitaa ni ikui iwae ni piitaa.

^39-42 Bitotoorb aamaal ponn ni aanib bi nan nyan ni tinaagbiir ni ki gir ni na sɔ: Jedaya, u nan ye Jesua aayaabil na aamaal ponn ni—binib ikui iwae ni imonko itaa ni kipiik ni bitaa; Imer aamaal ponn ni—binib lichur ni piiŋmu ni bilee; Pasur aamaal ponn ni—binib lichur ni ikui ilee ni imonko ilee ni bilole; Harim aamaal ponn ni—binib lichur ni kipiik ni bilole

^43-45 Liifai yaab aamaal bi nan nyan tinaagbiir ponn ni ki gir ni na sɔ: Hodafia aayaabitiib Jesua ni Kadmiel aamaal ponn ni—binib imonko itaa ni kipiik ni binaa; Uwumbɔr Aadichal ni aalahngaab ni biwangbaab, Asaf aayaabitiib,—binib nkub ni imonko ilee ni biniin; Uwumbɔr Aadichal ponn ni aakikiib, biyaajatiib le nan ye Salum, ni Ater, ni Talmonn, ni Akub, ni Hatita ni Sobai,—binib nkub ni piitaa ni biniin.

^46-56 Uwumbɔr Aadichal ponn ni aatutum aamaal bi nan nyan tinaagbiir ponn ni ki gir ni na mu sɔ: Siha, ni Hasufa, ni Tabaof, ni Keros, ni Sia, ni Padonn, ni Lebana, ni Hagaba, ni Salmai, ni Hanann, ni Gidel, ni Gahar, ni Reaya, ni Resinn, ni Nekoda, ni Gasam, ni Usa, ni Pasea, ni Besai, ni Meunim, ni Nefusesim, ni Bakbuk, ni Hakufa, ni Hahur, ni Baslif, ni Mehida, ni Hasa, ni Bakos, ni Sisera, ni Tema, ni Nesia, ni Hatifa.

^57-59 Solomonn aatutum aamaal ponn ni bi mu nan nyan tinaagbiir ponn ni ki gir ni na sɔ: Sotai, ni Soferef, ni Perida, ni Jaala, ni Dakonn, ni Gidel, ni Sefatia, ni Hatil, ni Pokeref‑Hasebaim, ni Amonn.

⁶⁰ Solomonn aatutum aamaal, ni Uwumbɔr Aadichal ponn ni aatutum aamaal ponn ni aanib bimɔk nan nyan tinaagbiir ponn ni ki gir ni na yaa kpaan kan, bi ye binib ikui itaa ni imonko inaa ni kipiik ni bilee la.

^61-62 Delaya, ni Tobia, ni Nekoda aamaal ponn ni aanib bi nan nyan ni Tel Mela, ni Tel Hasa, ni Kerub, ni Adonn, ni Imer aatim ponn ni ki mu nan gir ni na nan ti kpaan binib ikui iloob ni imonko ilee ni bilee la. Bi mu aa nan tee ŋmaa mɔk ke bi ye Israel aanib la.

^63-64 Bitotoorb aamaal i mu aa nan ŋmaa kan kigbaŋ ki ponn ni biyaajatiib aayimbil bi na: ima le ye Hobaya, ni Hakos, ni Basilai aamaal aanib. Basilai aamaal ngbaan aayaaja nan yoor Gilead aatiŋ aaja u bi nan yin u ke Basilai na aabisal, le ki gur joo uchool aayimbil yin ubaa. Imaal ngbaan ponn ni aanib aah kaa kan kigbaŋ ki ponn ni biyaajatiib aayimbil bi na, baa nan kan nsan ke bi li ye bitotoorb.

⁶⁵ Juu yaab aayidaan nan bui bi ke baan ŋmaa ji tijikaar ti bi di tii Uwumbɔr ipiin na, see utotoor u ga ŋmaa di Urim ni Tumim di ŋaŋ ti ki lik na.

^66-69 Binib bi nan nyan tinaagbiir ni ki gir ni na nan ti kpaan ŋichur imonko ilee ni ŋilee ni ikui itaa ni imonko itaa la. Baatutum, bijab ni bipiib mɔmɔk nan ye ŋichur ŋilole ni ikui itaa ni piitaa ni bilole la. Bi nan ye bilahngaab ni biwangbaab, bijab ni bipiib na mu nan ye binib ikui ilee ni imonko ilee ni biŋmu la. Itaan mu nan ye ikui ilole ni piitaa ni iloob la. Tiwakor ti naahn ubon na mu nan ye ikui ilee ni imonko ilee ni tiŋmu la. Laakumii tiib mu nan ye ikui inaa ni piitaa ni biŋmu la. Ibon mu nan ye ŋichur ŋiloob ni ikui ilole ni moninko la.

^70-72 Binib pam le nan too tiwan ki ter Uwumbɔr Aadichal aatoorn pu. Baah nan too pu na sɔ: Baayidaan nan tii salmaa kuruwaa biniin la, ni kitork aasambil piiŋmu, ni bitotoorb aawanpeenkaan mu ikui iŋmu ni piitaa. Mmaal mɔk aayidam mu nan tii salmaa kuruwaa nkub ni imonko itaa ni biniin la, ni tikunabr mu kuruwaa lichur ni ikui ilee ni piiŋmu la. Binib bi gur na mu nan tii salmaa kuruwaa nkub ni imonko itaa ni biniin la, ni tikunabr ti mu ga pii kuruwaa nkub ni imonko ilee na, ni bitotoorb aawanpeenkaan mu imonko itaa ni nilole.

⁷³ Bitotoorb, ni Liifai yaab, ni Uwumbɔr Aadichal aakikiib, ni bilahngaab, ni biwangbaab, ni Uwumbɔr Aadichal ponn ni aatutum, ni binib bibaa, ni Israel yaab bi gur na, nan kal itingbaan, ni ntisakpem mu bi Juda ponn ni na ni la.