Nehemia 6 - Uwumbɔr aagbaŋ

Binib aah nan kpokl ke bi ŋa Nehemia pu na

¹ Sanbalat, ni Tobia, ni Gesem, ni timi aadim bi gur na ŋun ke ti ki gir maa ligoln ngbaan doo, le nibaa chee aa gur, ki mu aa nan kee di ibisamɔi aajaaleŋ tiib piin.

² Kina pu le Sanbalat ni Gesem tun ni ntuun m chee, ke m keln bi kitiwaatiir kibaa ni, Ono aateer pu. Bi nan ban bi ŋmann mi ki ti ku mi la.

³ Le m mu tun ti bui bi ke, “M bi tun lituln li ye litukpaan na la, kina pu na, maan ŋmaa buen nima. Maan ŋmaa di cha lituln ngbaan ke m dan nan kan nimi.”

⁴ Bi nan tun ni m chee tibɔr tichachaan ngbaan pu ŋitaa ŋinaa la, le m mu giin bi ngarm chachaan ngbaan.

⁵ Le Sanbalat nan ki tun ni waatutunn m chee litaaŋmuŋmur, n‑yoonn mue u nan joo ni kigbaŋ ki baa poo biin ki pu na la.

⁶ Ki ponn ni nan len ke: “Gesem bui mi ke u ŋun binib len ke sin ni Juu yaab bi kpokl ke ni ban kijaak la. Kina pu le ni ki gir bi maa ligoln ngbaan. U ki len ke aa ban ke aa di aabaa di ŋa ubɔrkpaan,

⁷ le ki ban bibɔnabr ke bi moon kina Jerusalem ponn ni ke sin le ye Juda aabɔrkpaan. Tibɔr ngbaan mu ga fuu mpɔɔndaan ubɔrkpaan chee, kina pu le m ban m kan si aan ti kpokl ti.”

⁸ Le m tun ti bui u ke: “Saah len tibɔr timɔk na tibaa aa gbii. Sin le naan kina aabɔr aabaa.”

⁹ Bi nan bi pɔɔni bibaa ke bi faan timi le ti di cha lituln ngbaan. Le m mee Uwumbɔr ke, “Tɔ, dandana wee, Uwumbɔr, moo tii mi mpɔɔn.”

¹⁰ N‑yoonn mue le m nan buen m ti mann Mehetabel aayaabil Semaya u aate ye Delaya na, aan ki bɔr waadichal ni na. Le u nan bui mi ke, “Ni ŋan ke m ni sin buen ti bɔr lipepel li bi chain na ni, Uwumbɔr Aadichal ponn ni, ki laŋ jaaleŋ tiib; ba pu? bi choo bi nan ku si la. Kinyeek kee ki joo cha bi ga dan nan ku si.”

¹¹ Le m gar u ke, “Maa ye uja u aaboln san ki ti bɔrni na. Aa dak ke m ga san ti bɔr Uwumbɔr Aadichal ponn ni ke m ŋmar aa? Maan ŋa kina kpala.”

¹² Maah kal ki dakl lik ti ponn ni na, m nan kan ke naa nan ye Uwumbɔr le bui Semaya ke u len kina. Ni nan ye le ke Tobia ni Sanbalat le tii u igaŋgaŋlik ke u bui mi kina.

¹³ Bi nan daa u le ke u nan faan mi aan m tun titunwanbir, le bi kan nsan ki bii maayimbil aan bi lik seen mi.

¹⁴ Le m mee Uwumbɔr ke, “Uwumbɔr, teer Tobia ni Sanbalat aah tun pu na ki daa bitafal. Teer upii u bi yin u ke Noadia na, ni bibɔnabr bi mɔmɔk pɔɔn bibaa ke bi faan mi na, ki daa bi mu aatafal.”

Lituln ngbaan aah doo pu na

¹⁵ Joo cha iwiin piiŋmu ni ilee ti jer, Elul aaŋmal aawiin moninko ni iŋmu daal na, ligoln ngbaan aatuln mɔmɔk nan doo.

¹⁶ Timi aadim bi bi ŋitimbol ŋi mann goln timi na aah ŋun kina na, le bi bee ke bi jin inimɔɔn a, ba pu? unii mɔmɔk nan bee ke Uwumbɔr aaterm le tun kina aatuln.

¹⁷ N‑yoonn mue mɔmɔk na, Juu yaab aaninkpiib nan tun ti bui Tobia tiwan ni mɔmɔk ŋani na.

¹⁸ Juda aanib pam le nan si upuwɔb, ba pu? uchool le nan ye Juu aanii Ara aajapɔɔn Sekania. Ki ki kpee na, ujapɔɔn Jehohanann mu le nan joo Berekia aajapɔɔn Mesulam aabisal.

¹⁹ Binib ga nan sil nnimbiin ni ki bui mi Tobia aah ye unii pu na, le ki ki gir ti bui u maah len pu na mɔmɔk. Le u beenin ŋmee tigbann tii ni mi ke u pɔɔk ubaa ki faan mi.