Nehemia 5 - Uwumbɔr aagbaŋ

Mpɔɔndam aah nan muk bigiim pu na

¹ Naah ŋa iwiin ilee na le binib pam, bijab ni bipiib mɔmɔk, piin ki ŋulni Juu yaab biken aah ŋani bi pu na.

² Bibaa nan len ke, “Ti kpa ŋidichal ŋi wiir na la, le ki ban tijikaar ti kpiin tibaa.”

³ Le biken mu len ke, “Ti gur joo timi aakpaakon, ni ŋisubil aasar, ni timi aadichal le siini lipɔln pu ki kani tijikaar ti ga nyan timi likpasiil ponn ni na.”

⁴ Le biken mu ki len ke, “Ti pinni ŋimombil le ki pa timi aakpaakon, ni ŋisubil aasar aalampoo pu.

⁵ Ti mu ye Juu yaab ke tiŋeen aatɔtiib na la. Tijapɔtiib mu bi ke bi yaab na la. Le tima joo timi aabim kooh ŋani tinaagbiir ni. Ti puun di tibisatiib bibaa kooh ŋa tinaagbiir ni a. Baah chuu gaa timi aakpaakon ni ŋisubil aasar pu na, ti bee fam a.”

⁶ Maah ŋun tibɔr ngbaan kina na, le maaŋuul fii,

⁷ le m fii ki sil ti pu. M nan len binib ngbaan aaninkpiib ni baayidam chee kaa di bɔr, le ki bui bi ke, “Nimi le bi muk nibaa aana aabim.” M nan kuun binib mɔmɔk ke m lik tibɔr ngbaan,

⁸ le ki len ke, “Ti pɔɔk tibaa le ki ki bi daa tinaabitiib Juu yaab bi nan di bibaa kooh tii biwɔwɔm na la. Le nimi le ki muk nimi nibaa aanaabitiib Juu yaab, ke bi di bibaa kooh tii nimi.” Biyidam ngbaan nan ka ŋmin chii, kaa ŋmaa gar tibaa.

⁹ Le m ki bui bi ke, “Naah ŋani pu na aa ŋan. Ni ba ga li san Uwumbɔr ki ŋa ni ŋan na. Nima kan, timi aadim bi kaa ye Juu yaab na aan ŋmaa kan nsan ki ŋa timi mbɔnyun.

¹⁰ M cha binib pinn m chee ŋimombil ni tijikaar, le ŋŋeen aatɔtiib ni bijab bi tun m chee lituln na mu ŋa kina. Kina pu na, ti taa ki gaa taah pinn bi tiwan ni na man.

¹¹ Bi yaa pinn nimi ŋimombil, bee tijikaar, bee olif aakpan kan, ni di ni mɔmɔk tii bi; ki giin baakpaakon, ni ŋisubil aasar, ni nkpan aasui aasar, ni baadichal dandana wee tii bi.”

¹² Le biyidam ngbaan gar ke, “Ti ga ŋa saah len pu na. Ti ga giin baawangol tii bi, kaan ki cha bi teen timi baah pinn nimɔk na.” Le m yin ni bitotoorb le ki cha biyidam ngbaan puu binimbil ni, ke bi ga sil ŋa baah len ke bi ga ŋa pu na.

¹³ N‑yoonn ngbaan le m chuu gbabr maawundo u m nan gbab nchaŋ ni na ki yɔk yɔk u, ki bui ke, “Kina le Uwumbɔr ga yɔk yɔk unii umɔk kaa joo waah puu pu na. Uwumbɔr ga gaa nimi aadichal, ni naah kpa tiwan nimɔk na, ki cha nimi niŋmeen.” Le binib bimɔk nan bi nima na kii ke, “Amii,” ki nyuŋ Uwumbɔr. Le biyidam ngbaan nan joo baah puu tipuur ti na.

Nehemia aah nan ye ubulchinn pu na

¹⁴ Ŋibin kipiik ni ŋilee ŋi ponn ni m nan ye Juda aatiŋ aayidaan, ki nyan Ataksekes aanaan aabiln moninko ki ti saa waabin piitaa ni ŋilee ponn ni na, m ni maadichal aa nan ji tijikaar ti bi nan siin ke ti li ye uyidaan aajikaar na.

¹⁵ Biyidam bi mɔmɔk nan kal aan m nan paan bi pu na, nan ye limukl le ki tii binib ngbaan, ki nan gaal tikur aamombil imonko ilee le nwiin mubaa, ke baajikaar ni ndaan le na. Hali baatutum mu nan muk binib ngbaan la. Le mma aa nan ŋani kina; ba pu? m san Uwumbɔr la.

¹⁶ M nan di maapɔɔn mɔmɔk di ŋa ligoln ngbaan aamaam ponn ni la, kaa ban liwangol libaa. Maatutum mu mɔmɔk nan kpee m pu ligoln ngbaan aamaam ni.

¹⁷ N‑yoonn mɔmɔk m nan kpiini Juu yaab nkub ni piiŋmu, ni baaninkpiib mu, ni binib bibaa bi nyan ni ŋitimbol ŋi bi ki mann goln Jerusalem na mu ki kpee.

¹⁸ Iwiin mɔmɔk m nan kɔr unaaja ubaa, ni ipiih i ye ipiih na iloob, ni ikɔla i wiir na la, le iwiin kipiik mɔk kan see m tii bi ndapɔm. Maah nan nyi binib ngbaan aafalaa aah wiir pu na, maa nan gaal lipal li biyidam gaal na.

¹⁹ Le m mee Uwumbɔr ke, “Uwumbɔr, teer mbɔr, ki ŋa tinyoor ŋa m pu, maah tun nimɔk tii binib bee na.”