Nehemia 4 - Uwumbɔr aagbaŋ

Nehemia nyaŋ binib bi kiir u lituln ngbaan ni na

¹ Sanbalat aah ŋun ke timi Juu yaab ki bi maa ligoln ngbaan na, le liŋuul chuu u pam, le u piin ki bi ŋani timi mbɔnyun.

² U nan sil uŋeen aatɔtiib ni Samaria aajab aanimbiin ni ki len ke, “Juu yaab, bifalaadam bee, dak ke bi bi ŋani ba na? Bi ŋa nlandak ke bi ki gir maa kitiŋ ngbaan aa? Bi dak ke baah toor kitork ki na ga ŋmaa cha bi doo lituln ngbaan liwinbaal la aa? Bi ga ŋmaa di ŋilangbentanjal ŋi ber ki dɔ ki wun mmii na maa aa?”

³ Tobia nan si gbɔk u, le ki mu len ke, “Ba aagoln aan bi ga ŋmaa maa? Hali uŋɔk ga ŋmaa tur li lii kitiŋ.”

⁴ Le m mee Uwumbɔr ke, “Uwumbɔr, li pel baah ŋani timi mbɔnyun pu na. Cha baabɔnyun ngbaan gir kan bi. Cha bi lann baah kpa tiwan ni mɔmɔk na, ki cha bi kpaln biyom kitiyayaŋ ponn ni.

⁵ Taa suln baatunwanbir pu ki di cha pinn bi baataani; ba pu? bi sii timi bi bi maa na la.”

⁶ Le ti bi maa ligoln ngbaan. Binib ngbaan aah nan gee lituln ngbaan sakpen pu na, naa nan yunn le ti maa fuu sisik ni.

⁷ Sanbalat, ni Tobia, ni binib bi nyan ni Arabia, ni Amonn, ni Asdod aatim ni na aah ŋun ke ligoln ngbaan aamaam moo cha mɔb aan nimɔk nan war lir na bi ŋeeb na, le baaŋuul fii sakpen.

⁸ Kina pu le bi kpokl ke bi mɔmɔk kpaan ki nan tak Jerusalem aan ki cha timi aalan ŋmal.

⁹ Le ti mee timi Aawumbɔr, ki ban bijab kaan kiir kinyeek ni nwiin pu.

¹⁰ Juda aanib nan gaa nlahn ke: “Ti tun ŋitun ki ti bak. Tibir pam le dɔ ke ti yoor ti mee. Ti ga ŋa kinye aan ki maa ligoln ngbaan din wee?”

¹¹ Timi aadim nan dak ke bi yaa choo bi nan ku timi aan ki cha timi aatuln ngbaan sil kan, taan kan bi, kaan li nyi mu, aan bi nan kpaan gob timi.

¹² Le n‑yoonn mɔmɔk mu Juu yaab bi koo timi aadim ngbaan chee na choo ki nan tuk timi baah bi kpokl ti pu pu na.

¹³ Kina pu le m nan tii maanib kijaak aajum, ni tikpaatunn, ni itɔi ki yakr bi siin siin mmaal mmaal nin chee mɔk aa nan kee maa doo na.

¹⁴ M nan kan ke ilandak le joo maanib; le m bui bi ni baayidam, ni baaninkpiib ke, “Taa san man timi aadim ijawaan. Teer Uwumbɔr aah pɔɔ ki kpa ijawaan pu na, ki jan man nimi aanib ni nimi aabim, ni nipuutiib, ni nimi aadichal pu.”

¹⁵ Timi aadim nan ŋun ke ti ŋun baah bi kpokl ti pu pu na, le bi bee ke Uwumbɔr nyaŋ baalandak. Le ti mɔmɔk gir ti bi maa ligoln ngbaan.

¹⁶ Ki nyan n‑yoonn ngbaan ki joo cha m nan yakr maanib ngbaan nfum mulee pu la, bibaa bi tun, le bima na mu si kii, ki pee kijaak aabɔkul, ki joo tikpaatunn, ni kijaak aapen, ni itɔi. Le timi aayidam fii sil binib bi bi maa ligoln ngbaan na aachaŋ ni.

¹⁷ Hali binib bi nan tui titan ni tidimaawan na nan joo ŋŋaal mubaa le tun, le muken mu joo tijawan,

¹⁸ le bimɔk mu nan maa na nan maa le njum tab bichakpok. Uja u nan ga pii ukpiin na nan si gbɔk mi la.

¹⁹ Le m bui binib ngbaan ni baaninkpiib, ni baayidam ke, “Lituln ngbaan yaa, ki daa tɔb, kina le ti mu daa tɔb chee.

²⁰ Kina pu na, ni yaa ŋun ukpiin wii kan, ni mɔmɔk kuun dan m chee. Timi Aawumbɔr le ga jan tii timi.”

²¹ Kina pu na, iwiin mɔmɔk ki nya kichakpinaanyeek ni ki ti saa buyoonn iŋmabi ga nyan ni kinyeek na, timi bibaa bi maa la, le bima na mu si kii ki joo tikpaatunn.

²² N‑yoonn mumina le m nan bui bijab bi ye biyidam na, ni binib bi ter bi na, ke bi mɔmɔk gaar Jerusalem ponn ni kinyeek, aan ti ŋmaa kiir kitiŋ ngbaan kinyeek, ki tun lituln mu nwiin pu.

²³ Hali kinyeek kan, m ni ŋŋeen aatɔtiib, ni maatutum, ni uja u si kii mi na aa nan peer timi aawanpeenkaan bilni. Le ti mɔmɔk aajawan ŋub tiŋaal ni.