Nehemia 3 - Uwumbɔr aagbaŋ

Baah ki gir maa Jerusalem aagoln pu na

¹ Kina le bi nan ki gir maa Jerusalem aagoln: Eliasib u ye utotoorninkpel na, ni bitotoorb biken le nan maa mbisamɔb mu bi yin mu ke Ipiih Aabisamɔb na, ki di mu tii Uwumbɔr, ki di mu aajaaleŋ laŋ. Bi nan di ligoln ngbaan mu ki nyan mbisamɔb ngbaan chee ki ti saa bikikiib aadifɔfɔk ki bi yin ki ke Nkub Aadifɔfɔk na, ni ki mu bi yin ki ke Hananel Aadifɔfɔk na mu tii Uwumbɔr.

² Jeriko aajab mu le nan maa ligeln li paa na. Imri aajapɔɔn Sakur mu le nan maa ligeln li paa Jeriko aajab pu na.

³ Hasenaa aamaal mu le nan maa mbisamɔb mu bi yin mu ke Ijan Aabisamɔb na. Bi nan ŋa jaaleŋ tiib aadɔ ki di jaaleŋ ŋa, le ki ŋa tikur ti mu bi ga li joo laŋni na.

⁴ Hakos aayaabil, Uria aajapɔɔn Meremof mu le nan maa ligeln li paa na. Mesesabel aayaabil, Berekia aajapɔɔn Mesulam mu le nan maa ligeln li paa na. Baana aajapɔɔn Sadok mu le nan paan ki maa ligeln li paa na.

⁵ Tekoa yaab le nan paan ki maa ligeln li paa na, le baatiŋ ni aaninkpiib ma nan yii, kaa tun lituln li bininkpiib bi chuun lik lituln ngbaan na nan di tii bi ke bi tun na.

⁶ Pasea aajapɔɔn Joyada, ni Besodeya aajapɔɔn Mesulam mu le nan maa Jesana Aabisamɔb. Bi nan di jaaleŋ aadɔ ŋum ki di jaaleŋ ŋa, le ki ŋa tikur ti bi ga li joo laŋni na.

⁷ Melatia u ye Gibeonn aatiŋ aanii na, ni Jadonn u mu ye Meronof aatiŋ aanii na, ni Gibeonn ni Mispa aajab mu le nan maa ligeln li paa na, ki ti saa Yufrates aamɔɔl aawilir wɔb aapepel aayidaan aadichal chee.

⁸ Hahaya aajapɔɔn Usiel, u ye salmaa aachaa na, mu le nan maa ligeln li paa na. Hanania, u ŋani tulalee tiib na mu le nan maa ligeln li paa na, ki ti saa ligoln li bi yin li ke Ligoln li Waa na chee.

⁹ Hur aajapɔɔn Refaya, u nan ye Jerusalem aageln libaa aaninkpel na, mu le nan maa ligeln li paa na.

¹⁰ Harumaf aajapɔɔn Jedaya mu le nan maa ligeln li bi duun udo na. Le Hasabneya aajapɔɔn Hatus mu maa ligeln li paa na.

¹¹ Harim aajapɔɔn Malkija ni Pahaf Moab aajapɔɔn Hasub mu nan maa ligeln li paa na, ni kidifɔfɔk ki chee bi ŋani boroboro na.

¹² Halohes aajapɔɔn Salum, u ye Jerusalem aageln li gur na aaninkpel na, mu le nan maa ligeln li paa na. Ubisatiib le nan ter u lituln ngbaan ni.

¹³ Le Sanoa aatiŋ yaab ni Hanunn mu ki gir toor mbisamɔb mu bi yin mu ke Kifataŋ Aabisamɔb na. Bi nan toor mbisamɔb ngbaan doo ki ŋa tikur ti bi ga li joo laŋni mu na ŋa, le ki gir maa ligoln ngbaan ki ti saa mbisamɔb mu bi yin mu ke Litapuln Aabisamɔb na.

¹⁴ Rekab aajapɔɔn Malkija, u ye Bef Hakerem aapepel aaninkpel na mu le nan toor Litapuln Aabisamɔb. U nan ŋa mu, le ki ŋa tikur ti bi ga li joo laŋni na mu.

¹⁵ Kolhose aajapɔɔn Salum, u ye Mispa Aapepel aaninkpel na, mu le nan ki gir maa mbisamɔb mu bi yin mu ke Nnyunbun Aabisamɔb na. U nan toor mbisamɔb ngbaan ki ŋa jaaleŋ, ni tikur ti bi ga li joo laŋni na. Waah ti fuu Sela Aabukpiik chee na, u nan maa ligoln li paa libɔrchiln aakpifar aasaak pu na, ki ti saa ŋibimbin ŋi sunn nyan ni David Aatiŋ ni na.

¹⁶ Asbuk aajapɔɔn Nehemia u ye Bef Sur Aapepel libaa aaninkpel na, le nan maa ligeln li paa na, ki ti saa David aakaakul chee, ni kibukpiik, ni butɔb aajab do chee.

Liifai yaab bi nan maa ligoln ngbaan na sɔ

¹⁷ Binib bimina le nan ye Liifai yaab bi nan maa ligoln ngbaan aagen ŋibaa ŋi gur ki paa na: Bani aajapɔɔn Rehum le nan puen maa ligeln li paa na. Le Hasabia, u ye Keila Aapepel libaa aaninkpel na, mu nan maa ligeln li paa na tii waapepel aanib:

¹⁸ Henadad aajapɔɔn Bafai, u mu nan ye Keila Aapepel li gur na aaninkpel na mu le nan maa ligeln li paa na:

¹⁹ Jesua aajapɔɔn Eser, u ye Mispa aaninkpel na mu le nan maa ligeln li bi tijawan aadiik chee na, ki ti saa ligoln ngbaan aah fenn nin chee na:

²⁰ Sabai aajapɔɔn Baruk mu le nan maa ligeln li paa na, ki yoor ti saa Utotoorninkpel Eliasib aadichal aabisamɔb chee:

²¹ Hakos aayaabil Uria aajapɔɔn Meremof mu le nan maa ligeln li paa na, ki nyan nima ki ti saa Eliasib aadichal aah ti doo nin chee na.

Bitotoorb bi mu nan maa ligoln ngbaan na sɔ

²² Bitotoorb bi mu nan ki maa ligoln ngbaan aagen ŋi gur na sɔ: Bitotoorb bi bi ki maa goln Jerusalem aapepel na le nan maa ligeln li paa Liifai yaab pu na:

²³ Benjaminn ni Hasub mu le nan paan ki maa ligeln li bi baadichal chee na: Anania aayaabil, Maaseya aajapɔɔn Asaria mu le nan paan ki maa ligeln li bi udo chee na:

²⁴ Henadad aajapɔɔn Binui mu le nan piin Asaria do chee ki ti saa ligoln ngbaan aalɔlɔŋ ni:

^25-26 Le Usai aajapɔɔn Palal mu piin kilɔlɔŋ ngbaan ni, ni bikikiib aadifɔfɔk ki bi libɔrdichal li bi paacham wɔb, ki bi gbɔk ukikiir aachiln na ki maa: Paros aajapɔɔn Pedaya mu le nan paan ki maa ligeln li paa na, ki ti saa liwipuul wɔb, nin chee duun mbisamɔb mu bi yin mu ke Nnyun Aabisamɔb na, ni bikikiib aadifɔfɔk ki kii Uwumbɔr Aadichal na. Ligeln ngbaan nan bi gbɔk kitiŋ ngbaan nin chee bi yin ni ke Ofel na, nin chee Uwumbɔr Aadichal ni aatutum koo na.

Binib bi mu nan ki maa na sɔ

²⁷ Tekoa aajab le nan ki maa ligeln li paa na, lima le nan kpee baah maa pu na nlee, ki nyan bikikiib bi kii Uwumbɔr Aadichal na aadifɔfɔk chee ki ti saa ligoln ngbaan nin chee bi gbɔk Ofel na.

²⁸ Bitotoorb bibaa mu le nan maa ligeln li paa na, ki di toŋ ŋŋangan aasikakl wɔb, mbisamɔb mu bi yin mu ke Utaan Aabisamɔb na chee, bi mɔmɔk nan maa nin chee duun baadichal na la.

²⁹ Imer aajapɔɔn Sadok mu le nan maa ligeln li paa ki duun udo na. Sekania aajapɔɔn Semaya, u nan ye mbisamɔb mu bi yin mu ke Liwipuul Aabisamɔb aakikiir na, mu le nan maa li paa na.

³⁰ Selemia aajapɔɔn Hanania, ni Salaf aajapɔɔn uloloob Hanunn na, mu le nan maa ligeln li paa na, lima le nan ye lelee aageln li bi maa na. Berekia aajapɔɔn Mesulam mu le nan paan ki maa ligeln li paa na, li nan bi gbɔk udo la.

³¹ Malkija, u nan ye salmaa aachaa na, mu le nan maa ligeln li paa na, ki yoor ki ti saa lidichal li ponn ni Uwumbɔr Aadichal aatutum, ni binib bi tiir kitiirk na koo, aan li bi mbisamɔb mu bi yin mu ke Mifkad Aabisamɔb na chee, ki bi kidiik ki tɔk ligoln ngbaan aapaacham liwipuul ni ŋŋangan aalɔlɔŋ ni na chee.

³² Salmaa aachaab, ni binib bi tiir kitiirk na mu le nan maa ligeln li gur na, ki nyan kidiik ki bi kilɔlɔŋ ni na chee na ki di ti saa mbisamɔb mu bi yin mu ke Ipiih Aabisamɔb na.