Nehemia 2 - Uwumbɔr aagbaŋ

Nehemia aah buen Jerusalem pu na

¹ Iŋmal inaa aah jer na aawiin mubaa daal, le Ubɔrkpaan Ataksekes nan bi ji tijikaar, le m di ndaan buen ti tii u. Waa nan kee kan nsui aah bii pu aan nnimbil wɔb ŋa gbilngbiln pu na,

² le u baa mi ke, “Ba ŋa aa lik gbilngbiln din kina? Saa bun, kina pu na, aasui le ga li bii.” Ijawaan nan chuu mi,

³ le m bui ke, “Uwumbɔr tii sin mpɔɔndaan limɔfal li fɔk na. M ga ŋa kinye ki taa li lik gbilngbiln buyoonn n‑yaajatiib aakpab aah dɔ nin chee na ber doo aan kitiŋ ngbaan aabisamɔi aajaaleŋ tiib wun mmii doo na?”

⁴ Le ubɔrkpaan ngbaan ki baa mi ke, “Ni ye ba le aa ban?” Le m mee Uwumbɔr u bi Paacham na,

⁵ le ki bui ubɔrkpaan ngbaan ke, “Ni yaa mɔ sin mpɔɔndaan aan aa ga tii mi maah ban pu na kan, aa cha m buen Juda aatiŋ pu, kitiŋ ki ponn ni n‑yaajatiib aakpab dɔ na, aan m ti ki gir maa kitiŋ ngbaan.”

⁶ N‑yoonn ngbaan na ubɔrpii mu nan ka gbɔk u; le u nan kii tii mi. U nan baa mi maah ga yunn pu na, ni buyoonn mu m ga ki gir ni na; le m bui u.

⁷ Le m ki gaŋ u ke u tii mi tigbann m ti tii biyidam bi bi Yufrates aamɔɔl aawilir wɔb aapepel na ke bi tii mi nsan m ti fuu Juda aatiŋ pu.

⁸ M nan ki bui u ke u tii mi kigbaŋ m ti tii Asaf u kii ubɔr aachook na kigbaŋ ki ga cha u tii mi idɔ m ti toor kidifɔfɔk ki kii Uwumbɔr Aadichal na aajaaleŋ tiib, ni ligoln li mann goln kitiŋ ngbaan na aabisamɔi, ni mbaa aadichal li ponn ni m ga li koo na. Uwumbɔr aaŋaal aah nan paa m pu na, ubɔrkpaan ngbaan nan tii mi maah ban pu na mɔmɔk.

⁹ Ubɔrkpaan ngbaan nan cha waajab aaninkpiib ni bitandam bibaa cheen mi, le m buen Yufrates aamɔɔl aawilir wɔb Juda aatiŋ pu. Nima chee le m ti di ubɔrkpaan aagbann ngbaan tii biyidam ngbaan.

¹⁰ Le Sanbalat, u nyan ni Bef Horonn na, ni Tobia, u ye uninkpel ubaa ki bi Amonn aapepel na, ŋun ke unii ubaa dan u nan ter Israel aanib, le baaŋuul fii sakpen.

¹¹ M nan nyan nima le ki buen Jerusalem aatiŋ, ki ti bi nima ti saa iwiin itaa,

¹² kaa bui unii ubaa Uwumbɔr aah bui mi ke m nan tun pu ki tii Jerusalem aatiŋ na. Le m nan fii kinyeek kibaa kitaasiik, ki ban njɔtiib siib kpee mbaa pu. Maah nan dik ubon u pu na baanja le nan ye kiwakork ki dii timi na.

¹³ Ni nan beenin ye kinyeek le m dii mbisamɔb mu bi yin mu ke Kifataŋ Aabisamɔb na, ki nyan kitiŋ ngbaan ponn ni, ki di toŋ liwilir wɔb, ki fenn toŋ ŋŋangii wɔb ki ti nyan nnyunbun mu bi yin mu ke Kipeewanbiik aanyunbun na chee, ki ti saa mbisamɔb mu bi yin mu ke Litapuln Aabisamɔb na chee. Maah cha na, le m moo lik ŋigon ngbaan nin chee wii wii na, ni ibisamɔi aajaaleŋ tiib bi mmii wun bi na.

¹⁴ Maah ti fuu liwipuul wɔb na, le m fenn toŋ ŋŋangan wɔb ki ti saa Nnyunbun Aabisamɔb chee, ni kibukpiik ki bi yin ki ke Ubɔr Aabukpiik na chee. Le ŋigon aah nan lir ki gaa nsan pu na, ubon u m nan dik u pu na aa nan ki kan nsan u jer nima;

¹⁵ kina pu le m sunn koo Kidronn aafataŋ ni ki cha, ki lik ligoln ngbaan, le ki ki gir dii maah ba nyan niwɔb na, ki dii Kifataŋ Aabisamɔb na ki koo kitiŋ ponn ni.

¹⁶ Lituln aaninkpiib bi bi Jerusalem ni na aa nan nyi ke m buen nibaa chee, kaa ki nyi maah bi tun pu na mu. Ki ti saa liyaadaal ngbaan maa bui Juu yaab biken tibaa, bitotoorb, ni kitiŋ ni aaninkpiib, ni ŋitun aaninkpiib, ni unii umɔk nan bi tun lituln ngbaan na, maa nan bui ubaa tibaa.

¹⁷ Le m nin bui bi ke, “Jerusalem aah bii doo pu na, ni mɔmɔk kan taah bi tibɔr ti ponn ni na. Cha man ti ki gir maa kitiŋ ngbaan aagon man, aan timi aanimɔɔn yee doo.”

¹⁸ Le m bui bi Uwumbɔr aah bi m chee ki ter mi pu na, ni ubɔrkpaan na mu aah bui mi pu na. Le bi kii ke, “Cha ti piin ki li maa man.” Le bi gor bibaa ke bi piin lituln ngbaan.

¹⁹ Le Sanbalat, ni Tobia, ni Arab aanii u bi yin u ke Gesem na aah ŋun taah bi kpokl ke ti ŋa pu na, bi nan laa timi, le ki bui ke, “Ni dak ke ni bi ŋani ba na? Ni ban ni fii sil ubɔrkpaan pu la aa?”

²⁰ Le m gar bi ke, “Uwumbɔr u bi paacham na ga tii timi taah ban pu na. Timi le ye waanaagbiib, le ki ga piin ki maa. Le nimi aa kpa nsan ni ji Jerusalem aafaal libaa, kaa bi kaakaal mu ni.”