Nehemia 13 - Uwumbɔr aagbaŋ

Israel yaab aah yakr biwɔwɔm chee pu na

¹ Bi nan karn Moses Aakaal mpɔɔn pu binib ngbaan aanimbiin ni, ki ti saa nin chee len ke Amonn yaab, ni Moab yaab taa kpaan Uwumbɔr aanib Israel yaab chee daalbaadaal na.

² Naah nan ye pu na le ye ke Amonn ni Moab yaab nan yii kaa tii Israel yaab tijikaar ni nnyun n‑yoonn mu bi nan nyan ni Ijipt ni ki choo kuni na. Bi nan tee labr pan ŋimombil tii ubɔɔ Balaam ke u puun lii Israel yaab pu, le timi Aawumbɔr cha tipuur ngbaan kpaln tinyoor ki tii Israel yaab.

³ Israel yaab aanib aah ŋun bi karn nkaal ngbaan na, le bi yakr biwɔwɔm mɔmɔk nyan bikaasisik ni.

Nehemia aah giin tiwan mɔmɔk siin chob pu na

⁴ Eliasib u ye utotoor, ki nan ye Uwumbɔr Aadichal aadir ti bi joo tijikaar ni tiwan niken siini na aaninkpel na, ni Tobia nan ye tɔb jɔtiib la. Baajɔtiik nan yunn.

⁵ U nan di kidiik ki wiir na tii Tobia. Kidiik ngbaan nan ye kidiik ki ponn ni bi nan siini tijikaar ti binib tii Uwumbɔr na, ni Uwumbɔr aatulalee aayon, ni Uwumbɔr Aadichal ponn ni aawan, ni ipiin i binib nan tii bitotoorb na; ni njikaabim, ni ŋisubil aadaan, ni olif aakpan aapiin i bi joo tii Liifai yaab, ni bilahngaab, ni biwangbaab, ni Uwumbɔr Aadichal aakikiib na.

⁶ Nimina aah nan bi ŋani kina na, maa nan bi Jerusalem aatiŋ ni; Babiloŋ aabɔr Ataksekes aanaan aabiln piitaa ni ŋilee ponn ni na, m nan gir buen u chee ke m ti bui u maah tun pu na. N‑yoonn siib aah jer na, le m nan ki mee u nsan

⁷ ki gir ni Jerusalem. Maah nan ti kan ke Eliasib tii Tobia nsan u li koo Uwumbɔr Aadichal aadiik kibaa ponn ni na, ni nan gar mi sakpen.

⁸ Liŋuul nan chuu mi sakpen, le m yoor Tobia aawan mɔmɔk mae lipaal.

⁹ M nan cha bi toor kitork ki ŋa tidir ngbaan chain, ki di Uwumbɔr Aadichal ponn ni aawan, ni njikaabim aapiin, ni Uwumbɔr aatulalee aayon ki ki giin ni siin tidir ngbaan ponn ni.

¹⁰ M nan ki ŋun ke Uwumbɔr Aadichal ponn ni aalahngaab, ni biwangbaab, ni Liifai yaab biken fii Jerusalem ki gir buen baasar ponn ni, ba pu? binib aa nan ki tii bi ni ga ŋeer bi bi kpiin bibaa na.

¹¹ M nan galn binib ngbaan aaninkpiib pam, baah nan cha Uwumbɔr Aadichal aatuln bee fam pu na. Le m nan ki giini Liifai yaab ni bilahngaab ni biwangbaab ngbaan baatuln ponn ni, Uwumbɔr Aadichal ni.

¹² Le Israel aanib mɔmɔk ki piin ki joo ni baajikaabim, ni ŋisubil aadaan, ni olif aakpan aapiin nan siini tidir ti ponn ni bi joo kina aawan siini na Uwumbɔr Aadichal chee.

¹³ M nan di utotoor Selemia, ni Sadok, u nyi Nkaal mbamɔm na, ni Liifai aanii Padaya le kaan kiir tidir ngbaan, ki lee Sakur aajapɔɔn Hanann, u aayaaja nan ye Matania na ke u li ter bi. M nan kpa gaakii ke bijab ngbaan ga di ibamɔn yakr tiwan tii baatutuŋeertiib.

¹⁴ Maawumbɔr, teer mbɔr, ki taa suln tiwan nimɔk m ŋa Saadichal ni aan aa kan idoon mbamɔm ki ponn ni na.

¹⁵ N‑yoonn ngbaan le m kan Juda aanib bibaa mueni nyani ŋisubil aanyun Likpaakool daal. Biken mu joo njikaabim, ni ŋisubil aadaan, ni ŋisubil aabɔŋ, ni tiwan niken paani baabon pu ki joo cha Jerusalem ponn ni, le m sak bi ke bi taa ki kooh tiwan nibaa Likpaakool daal.

¹⁶ Taya aajab bibaa nan koo Jerusalem ponn ni, le bi mu joo ni ijan ni tiwan mɔmɔk aabɔŋ ki di koo ni Jerusalem aatiŋ ponn ni ke bi nan kooh tii timi aanib Likpaakool daal.

¹⁷ M nan galn Juu yaab aayidam le ki bui bi ke, “Lik man naah bi tun titunwanbir ti na. Ni bi koor Likpaakool daal aakoobil la.

¹⁸ Tiwanbaan nee pu le Uwumbɔr nan daa niyaajatiib aatafal ki bii kitiŋ kee. Naah bi koor Likpaakool daal aakoobil kina na, le ni beenin ban ke ni moo di Uwumbɔr aaŋuul lii ni Israel pu.”

¹⁹ Nima pu le m nan siin ke bi laŋ Jerusalem aabisamɔi nwiin mu ga woln Likpaakool daal na, buyoonn bi kan nwiin ban mu lir na, ki taa ki piir i, see Likpaakool daal ti jer. M nan di maajab bibaa le siin ibisamɔi ngbaan chee, ke bi taa cha unii ubaa joo ni tiwan nibaa koo ni Jerusalem aatiŋ ponn ni, Likpaakool daal.

²⁰ N‑yoonn n‑yoonn biwankoob bi kooh tiwan mɔmɔk aabɔŋ na, nan doo kitiŋ ngbaan aagoln aapuwɔb kinyeek ki ga woln Likpaakool daal na la.

²¹ Le m nan sak bi ke, “Naah ka nima kii ke ni woln na ye fam la. Ni yaa ki ŋa kina daalbaadaal kan, m ga di mpɔɔn le di mɔk nimi.” Ki nyan n‑yoonn ngbaan, baa ki gir ni Likpaakool daal.

²² M nan cha Liifai yaab toor kitork ki ŋa bibaa chain ki buen ti kii ibisamɔi ngbaan ke bi taa cha unii ubaa koor Likpaakool daal aakoobil. Uwumbɔr, teer mbɔr nimina mu pu, ki san mi kinimbaak, saageehm sakpem pu.

²³ N‑yoonn ngbaan le m nan ki kan ke Juu yaab aajab pam nan yoor Asdod, ni Amonn, ni Moab aapiib.

²⁴ Baabim ligetekr libaa nan len Asdod aatiŋ aanib aaliin, bee iliin yayan la, kaa nyi timi aaliin.

²⁵ M nan galn bijab ngbaan, ki puun lii bi pu, ki gbaa bi, ki dar gui biyikpir; le ki cha bi puu Uwumbɔr aayimbil pu ke bi ni baabim ni biwɔwɔm aan ki mɔn tɔb.

²⁶ M nan bui bi ke, “Biwɔwɔmpiib pu le Ubɔrkpaan Solomonn nan tun titunwanbir. U nan ye uja u pɔɔ jer ŋitimbol ŋiken aabɔrb na la, le Uwumbɔr nan gee u ki di u ŋa ubɔr Israel mɔmɔk pu, le u nan ti ki koo kinimbɔŋ kee ponn ni.

²⁷ Ni ban ke ti dii nimi ki yii timi Aawumbɔr aamɔb ki yoor biwɔwɔmpiib la aa?”

²⁸ Joyada aate le nan ye utotoorninkpel Eliasib, le Joyada aajapɔɔn ubaa nan tee yoor Sanbalat, u nyan Bef Horonn aatiŋ ponn ni na aabisal. Nima pu le m jenn nyan Joyada Jerusalem ponn ni.

²⁹ Uwumbɔr, teer binib ngbaan aah nan bii bitotoorb aatuln, ni tipuur ti aa nan puu ki tii bitotoorb ni Liifai yaab na.

³⁰ M nan nyan binib ngbaan tiwan nimɔk ye biwɔwɔm aawan na ponn ni; ki nan ŋa ikaal tii bitotoorb ni Liifai yaab ke unii mɔk li nyi waatuln;

³¹ ki nan ban isan i ga cha idɔ i bi joo pu kitork aanann na aah ga fuu ni n‑yoonn mu na, ni binib mu aah ga li joo ni baajan aajikaabim aapiin ni njan aasubil ŋi puen puir na pu na. Uwumbɔr, teer mbɔr, ki ŋa tinyoor ŋa m pu.