Nehemia 12 - Uwumbɔr aagbaŋ

Bitotoorb ni Liifai aamaal yaab aayimbil sɔ

¹ Bitotoorb bimina, ni Liifai yaab bee le nan nyan ni tinaagbiir ponn ni ki dii ni Sealtiel aajapɔɔn Serubabel ni Utotoorninkpel Josua:

Bitotoorb ngbaan aayimbil sɔ:

^2-7 Seraya, ni Jeremia, ni Esra, ni Amaria, ni Maluk, ni Hatus, ni Sekania, ni Rehum, ni Meremof, ni Ido, ni Ginetoi, ni Abija, ni Mijaminn, ni Maadia, ni Bilga, ni Semaya, ni Joyarib, ni Jedaya, ni Salu, ni Amok, ni Hilkia, ni Jedaya. Bijab bee le nan ye bitotoorb biken na aayidam, utotoorninkpel Josua aayoonn.

Liifai yaab aayimbil sɔ:

⁸ Jesua, ni Binui, ni Kadmiel, ni Serebia, ni Juda, ni Matania, le nan ye binib bi gaa ilahn ki dooni Uwumbɔr na aayidam.

⁹ Le Bakbukia, ni Uno, ni Liifai yaab biken na nan keei bi.

Utotoorninkpel Josua aamaal

¹⁰ Josua le nan ma Joyakim; le Joyakim mu ma Eliasib; le Eliasib mu ma Joyada;

¹¹ le Joyada mu ma Jonatann; le Jonatann mu ma Jadua.

Bitotoorb aamaal ponn ni aayidam

^12-21 Joyakim aah nan ye Utotoorninkpel buyoonn na, bitotoorb bee le nan ye baamaal aayidam: Seraya aamaal ponn ni aayidaan nan ye Meraya; Jeremia aamaal ponn ni aayidaan nan ye Hanania; Esra aamaal ponn ni aayidaan nan ye Mesulam; Amaria aamaal ponn ni aayidaan nan ye Jehohanann; Maluki aamaal ponn ni aayidaan nan ye Jonatann; Sebania aamaal ponn ni aayidaan nan ye Josef; Harim aamaal ponn ni aayidaan nan ye Adna; Merayof aamaal ponn ni aayidaan nan ye Helkai; Ido aamaal ponn ni aayidaan nan ye Sekaria; Ginetonn aamaal ponn ni aayidaan nan ye Mesulam; Abija aamaal ponn ni aayidaan nan ye Sikri; Miniaminn aamaal ponn ni aayidaan aayimbil aa nan bi Moadia aamaal ponn ni aayidaan nan ye Piltai; Bilga aamaal ponn ni aayidaan nan ye Samua; Semaya aamaal ponn ni aayidaan nan ye Jehonatann; Joyarib aamaal ponn ni aayidaan nan ye Matenai; Jedaya aamaal ponn ni aayidaan nan ye Usi; Salai aamaal ponn ni aayidaan nan ye Kalai; Amok aamaal ponn ni aayidaan nan ye Eber; Hilkia aamaal ponn ni aayidaan nan ye Hasabia; Jedaya aamaal ponn ni aayidaan nan ye Netanel.

Baah nan ŋmee bitotoorb ni Liifai yaab aamaal aayimbil kigbaŋ ponn ni pu na

²² Buyoonn Eliasib, ni Joyada, ni Jonatann, ni Jadua nan bi limɔfal ni ki ye bitotoorninkpiib na, le bi nan ŋmee Liifai yaab aamaal aadichadam ni bitotoorb aamaal aadichadam aayimbil. N‑yoonn ngbaan le Darius nan ye Pesia aabɔrkpaan.

²³ Liifai yaab aamaal aadichadam ma nan ŋmee baayimbil kigbaŋ ponn ni, ki ti saa buyoonn Eliasib aayaabil Jonatann nan bi na la.

Baah yakr Uwumbɔr Aadichal ponn ni aatuln pu na

²⁴ Hasabia, ni Serebia, ni Jesua, ni Binui, ni Kadmiel le nan yakr Liifai yaab ŋigetek, ŋigetek, le bi tun Uwumbɔr Aadichal ponn ni aatuln. Ŋigetek ŋilelee le nan kpaani ki pak Uwumbɔr ki dooni u, ke Uwumbɔr aanii, Ubɔrkpaan David aah nan mɔk ke bi li dooni u pu na.

²⁵ Matania, ni Bakbukia, ni Obadia, ni Mesulam, ni Talmonn, ni Akub, bi ye Uwumbɔr Aadichal aakikiib na le nan kii tidir ti ponn ni bi joo tiwan siini aan ti bi Uwumbɔr Aadichal aabisamɔi chee na.

²⁶ Binib bee nan bi limɔfal ni buyoonn Josua aajapɔɔn Joyakim, u aayaaja nan ye Jehosadak na, ni n‑yoonn mu uyidaan Nehemia, ni utotoor Esra, u nan bee Nkaal mbamɔm na, nan laa bi limɔfal ponn ni na la.

Nehemia aah di Jerusalem aatiŋ aagoln ŋa Uwumbɔr aaŋaal ni pu na

²⁷ Buyoonn bi nan di Jerusalem aatiŋ aagoln ŋa Uwumbɔr aaŋaal ni na, bi nan yin ni Liifai yaab baah bi nin chee na mɔmɔk, ke bi nan kpaan kitork ngbaan, ki li gaa ilahn ki dooni Uwumbɔr, ki gbaa tibar ni ichayakrtuun.

²⁸ Liifai yaab aalahngaab ngbaan nan nyan ni baah nan ka ka nin chee ki mann goln Jerusalem na, ni ntim mu bi Netofa chee,

²⁹ ni Bef Gilgal, ni Geba, ni Asmafef aatim ni ki nan kpaan Jerusalem ni.

³⁰ Bitotoorb ni Liifai yaab nan toor kitork ki nyan bibaa ni binib ngbaan aatunwanbir, le ki ŋa ibisamɔi ni kitiŋ aagoln ngbaan chain.

³¹ M nan kuun Juda aayidam ki ti tɔŋ ligoln ngbaan paab, ki di ŋigetek sakpiin ŋilee ŋa biŋaal ni ke bi di bi chuun mann ligoln ngbaan, ki li joo idoon tii Uwumbɔr. Njan aagetekr nan di toŋ ŋŋangii wɔb ligoln ngbaan paab ki cha Litapuln Aabisamɔb wɔb.

³² Hosaya le nan paa bilahngaab pu, le Juda aayidam ligetekr libaa di paan u pu.

^33-35 Le Asaria, ni Esra, ni Mesulam, ni Juda, ni Benjaminn, ni Semaya, ni Jeremia bi nan ye bitotoorb ki nan pii kakaan tiib na mu nan paan bi pu, le ki di Jonatann aajapɔɔn Sekaria, u aayaaja nan ye Semaya nan paan. Uyaajatiib biken le nan ye Matania, ni Mikaya, ni Sakur, bi ye Asaf aamaal yaab na.

³⁶ Udo yaab Semaya, ni Asarel, ni Milalai, ni Gilalai, ni Maai, ni Netanel, ni Juda, ni Hanani le nan paa u pu; bi mɔmɔk nan joo tiwangbaakaan ni bi ke tiwangbaakaan ni Uwumbɔr aanii Ubɔrkpaan David nan gbaa na. Le Esra u nyi Uwumbɔr aakaal mbamɔm na nan loln ligetekr ngbaan pu nsan.

³⁷ Baah nan ti fuu mbisamɔb mu bi yin mu ke Uyayak Aabisamɔb chee na, le bi jon ŋibimbin ŋi cha David Aatiŋ ni na, ki jer David aabɔrnaakook, le ki ti ki tɔŋ ligoln ngbaan paab Nnyun Aabisamɔb chee, mu bi liwipuul wɔb kitiŋ ngbaan pu na.

³⁸ Ligetekr li mu nan ki joo idoon tii Uwumbɔr na mu nan di toŋ ŋŋangan wɔb ligoln ngbaan paab, le m di binib ligetekr liken di paan bi pu. Ti nan chuun ti jer kidifɔfɔk ki chee bi ŋani boroboro na, ki ti saa Ligowawaal na chee,

³⁹ ki nyan nima ki ti jer Efraim Aabisamɔb, ni Jesana Aabisamɔb, ni Ijan Aabisamɔb, ni Hananel Aadifɔfɔk, ni Nkub Aadifɔfɔk, ki ti saa Ipiih Aabisamɔb. Ti nan ti doo timi aasachuln ngbaan Uwumbɔr Aadichal aabisamɔb chee la.

^40-41 Kina pu na, ŋigetek ŋilee ngbaan ŋi nan joo idoon tii Uwumbɔr na, nan ti fuu Uwumbɔr Aadichal aapaan ni la. Le bitotoorb Eliakim, ni Maaseya, ni Miniaminn, ni Mikaya, ni Eliwenai, ni Sekaria, ni Hanania nan bi maagetekr ngbaan ni, ki kpee biyidam bi nan bi m chee na pu, ki pii ikpiin.

⁴² Le Maaseya, ni Semaya, ni Eleasar, ni Usi, ni Jehohanann, ni Malkija, ni Elam, ni Eser nan paa. Jesrahia, u nan ye bilahngaab aaninkpel na, ni waalahngaab nan gaa ilahn mpɔɔn pu.

⁴³ Bi nan toor titoor pam liyaadaal ngbaan, le binib ngbaan nan kpa mpopiin sakpen, Uwumbɔr aah nan tii bi mmɔɔn pu na. Bipiib ni mbim mu nan bi njim ngbaan ponn ni, le kifuuk ki bi mɔmɔk nan ŋani na nan buen dandar.

Baah tii Uwumbɔr ipiin pu na

⁴⁴ N‑yoonn ngbaan le bi nan ban bijab kaan kiir tidir ti bi joo tijikaar, ni tiwan niken siini na, ni baah di Uwumbɔr Aadichal aajikaar ti bi too too na di ŋa ti ponn ni na; bi nan di ukpaal mɔmɔk aah tii waajikaar aapiin i na, ni libiln mɔk aajikaabim mu puen biir na, ni ŋisubil ŋi mu puen puir na mu di kpee ti pu. Bijab ngbaan le nan ye bi ga li gaal ikpaakon i bi duun ntim mɔmɔk na, bitotoorb ni Liifai yaab aajikaar ti bi too tii bi, Nkaal aah mɔk pu na nan tii bi. Binib mɔmɔk nan kpa mpopiin bitotoorb ni Liifai yaab ngbaan pu;

⁴⁵ ba pu? bi nan toor titunwanbir aachapinn ni titoor timɔk gur na, Uwumbɔr aah mɔk pu na. Uwumbɔr Aadichal ponn ni aalahngaab, ni biwangbaab ni bikikiib mu nan tun baatun ki dii ikaal i Ubɔrkpaan David ni ujapɔɔn Solomonn nan siin na.

⁴⁶ Ki nyan Ubɔrkpaan David ni ulahngaar Asaf aayoonn mu jer na, bilahngaab ni biwangbaab ngbaan le lolni nsan ki pak ki joo idoon tii Uwumbɔr.

⁴⁷ Serubabel aayoonn, ni Nehemia aayoonn na, Israel aanib nan tii iwiin mɔmɔk aajikaar ki joo ter Uwumbɔr Aadichal ponn ni aalahngaab, ni biwangbaab, ni Uwumbɔr Aadichal aakikiib. Binib ngbaan nan ki di tijikaar tii Uwumbɔr, ti li ye Liifai yaab yaan, le bi mu ki lee tii bitotoorb, nkaal aah mɔk pu na.