Nehemia 11 - Uwumbɔr aagbaŋ

Binib bi nan koo Jerusalem ponn ni na aayimbil

¹ Binib bi nan ye biyidam na nan kal Jerusalem ponn ni, le binib bi gur na too inaan ke bi lee lidichal libaa ŋidichal kipiik mɔk ponn ni ke bi buen ti li koo Jerusalem aatiŋ ki bi chain na ponn ni, le bi gur na ti li koo ntisakpem ni muwaatiir na ponn ni.

² Binib ngbaan nan pak unii umɔk nan nyan sil ke u ga li bi Jerusalem ponn ni na.

³ Israel aanib ngbaan, bitotoorb, ni Liifai yaab, ni Uwumbɔr Aadichal ponn ni aatutum, ni Solomonn aatutum aayaabitiib nan ti kal baatim pu, ntisakpem ni muwaatiir mu gur na ponn ni la, le ki kpa bibaa aasar ni ŋidichal. Juda aatiŋ aamaal aaninkpiib bi nan bi Jerusalem ponn ni na sɔ:

Juda aamaal yaab aayimbil sɔ:

⁴ Usia aajapɔɔn Ataya u aayaaja nan ye Sakaria na; uyaajatiib biken le nan ye Amaria, ni Sefatia, ni Mahalalel. Biyaaja le nan ye Juda aajapɔɔn Peres.

⁵ Baruk aajapɔɔn Maaseya u aayaaja nan ye Kolhose na. Maaseya aayaajatiib biken le nan ye Hasaya, ni Adaya, ni Joyarib, ni Sakaria. Biyaaja le nan ye Juda aajapɔɔn Sela.

⁶ Peres aayaabitiib bi nan ye binikpaam ki koo Jerusalem ponn ni na nan ye binib ikui inaa ni imonko itaa ni biniin la.

Benjaminn aamaal yaab mu aayimbil sɔ:

⁷ Mesulam aajapɔɔn Salu, u aayaaja nan ye Joed na. Salu aayaajatiib biken le nan ye Pedaya, ni Kolaya, ni Maaseya, ni Itiel, ni Jesaya.

⁸ Gabai ni Salai, bi ye Salu aanaabitiib na. Benjaminn aamaal aanib bi nan koo Jerusalem ponn ni na, nan ye binib ikui iwae ni moninko ni biniin la.

⁹ Sikri aajapɔɔn Joel le nan ye baayidaan, le Hasenua aajapɔɔn Juda nan ye u paa kitiŋ ngbaan aatutum aaninkpel pu na.

Bitotoorb bi mu nan koo Jerusalem ponn ni na aayimbil sɔ:

¹⁰ Joyarib aajapɔɔn Jedaya, ni Jakinn.

¹¹ Hilkia aajapɔɔn Seraya, u aayaaja nan ye Mesulam na. Seraya aayaajatiib biken le nan ye Sadok, ni Merayof, ni Ahitub u nan ye Utotoorninkpel na.

¹² Mmaal mue aanib bi nan tun Uwumbɔr Aadichal ponn ni na, nan ye binib ikui iniin ni moninko ni bilee la. Jeroham aajapɔɔn Adaya, u aayaaja nan ye Pelalia na; uyaabitiib biken le nan ye Amsi, ni Sakaria, ni Pasur, ni Malkija.

¹³ Mmaal mue ponn ni aanib ikui ilee ni imonko ilee ni bilee le nan ye bidichadam. Asarel aajapɔɔn Amasai, u aayaaja nan ye Asai na; uyaajatiib biken le nan ye Mesilemof ni Imer.

¹⁴ Mmaal mue ponn ni aanib nkub ni moninko ni biniin le nan ye bijakpaam. Baayidaan le nan ye Sabdiel, u nan ye Hagedolim aajapɔɔn na.

Liifai yaab bi mu nan koo Jerusalem ponn ni na aayimbil sɔ:

¹⁵ Hasub aajapɔɔn Semaya, u aayaaja nan ye Asrikam na. Uyaajatiib biken le nan ye Hasabia ni Buni.

¹⁶ Sabetai ni Josabad nan ye Liifai yaab aanikpaam bi nan lik binib bi tun lituln li bi lipaal Uwumbɔr Aadichal chee na la.

¹⁷ Maika aajapɔɔn Matania, u aayaaja nan ye Sabdi, u ye Asaf aamaal ponn ni na. Uma le nan ye bilahngaab ni biwangbaab bi gaa ilahn ki dooni Uwumbɔr na aaninkpel. Bakbukia le nan ye u paa Matania pu na. Samua aajapɔɔn Abda, u aayaaja nan ye Galal u nyan ni Jedutunn aamaal ponn ni na.

¹⁸ Liifai yaab bi nan koo Uwumbɔr aatiŋ Jerusalem ponn ni na nan ye binib ikui ilee ni imonko inaa ni binaa la.

Uwumbɔr Aadichal aakikiib bi mu nan koo Jerusalem ponn ni na aayimbil sɔ:

¹⁹ Akub, ni Talmonn, ni baamaal nan ti kpaan binib nkub ni imonko itaa ni kipiik ni bilee, le ki koo Jerusalem ponn ni.

²⁰ Israel yaab bi gur na, ni bitotoorb bi gur na, ni Liifai yaab bi gur na, nan ti kal baalangben pu baatisakpem ni muwaatiir ponn ni Juda aatiŋ pu la.

²¹ Uwumbɔr Aadichal ponn ni aatutum nan koo Jerusalem aapepel li bi yin li ke Ofel na ponn ni la; le Siha ni Gispa nan ye baaninkpiib.

²² Uja u nan lik Liifai yaab bi nan koo Jerusalem ponn ni na le nan ye Bani aajapɔɔn Usi, u aayaaja nan ye Hasabia na. Uyaajatiib biken le nan ye Matania ni Maika, le ki ye Asaf aamaal ponn ni aanii. Mmaal ngbaan le nan ye Uwumbɔr Aadichal ponn ni aalahngaab ni biwangbaab, n‑yoonn mu bi dooni Uwumbɔr na.

²³ Nnaan aakaal nan bi, ki mɔk imaal ngbaan aah ga li gaa ilahn ki gbaa tiwan Uwumbɔr Aadichal ponn ni, iwiin mɔmɔk pu na.

²⁴ Mesesabel aajapɔɔn Petahia, u ye Sera aamaal ponn ni aanii ki ye Juda aanibol aanii na, le nan si Israel yaab aasisii Pesia aabɔr aadichal ni.

Binib bi nan bi ntim mu gur na ponn ni na aayimbil

²⁵ Binib ngbaan ponn ni pam le nan kal ntim mu bi gbɔk baasar na. Binib bi nan ye Juda yaab na nan kal Kiriaf Aba, ni Dibonn, ni Jekabseel, ni itingbaan i bi gbɔk ntisakpem mue na ni la.

²⁶ Bi nan ki kal Jesua, ni Molada, ni Bef Pelet,

²⁷ ni Hasar Sual aatim, ni Beerseba ponn ni, ni itingbaan i mann goln ki na mu ni.

²⁸ Bi nan kal Siklag aatikpaan ponn ni, ni Mekona ponn ni, ni kaatingbaan,

²⁹ ni Enn Rimonn ponn ni, ni Sora, ni Jamuf ponn ni,

³⁰ ni Sanoa, ni Adulam, ni itingbaan i bi gbɔk ntim mue na. Bi nan kal Lakis ni tisar ti bi gbɔk nima na, ni Aseka ponn ni, ni kaatingbaan ni. Naah bi pu na, Juda aanib nan kal lipepel li bi Beerseba aatiŋ ki bi liwipuul aaŋangii wɔb na, ni Hinom Aafataŋ ki bi liwipuul aaŋangan wɔb na aakaasisik ni la.

³¹ Binib bi nan ye Benjaminn aanibol yaab na nan kal Geba, ni Mikmas, ni Ai, ni Betel, ni itingbaan i bi gbɔk nima na,

³² ni Anatof, ni Nob, ni Anania,

³³ ni Hasor, ni Rama, ni Gitayim,

³⁴ ni Hadid, ni Seboyim, ni Nebalat,

³⁵ ni Lod, ni Ono, ni Bikpikpiib Aafataŋ ni la.

³⁶ Bi nan cha Liifai yaab bi nan ka Juda yaab aatiŋ pu na buen ti kal Benjaminn yaab chee la.