Nehemia 10 - Uwumbɔr aagbaŋ

¹ Unii u nan puen ki ŋmee waayimbil na le nan ye Hakalia aajapɔɔn Nehemia, le Sedekia paan u pu ki ŋmee. Bimina mu le nan paan ki ŋmee:

Bitotoorb:

^2-8 Seraya, ni Asaria, ni Jeremia, ni Pasur, ni Amaria, ni Malkija, ni Hatus, ni Sebania, ni Maluk, ni Harim, ni Meremof, ni Obadia, ni Daniel, ni Ginetonn, ni Baruk, ni Mesulam, ni Abija, ni Mijaminn, ni Maasia, ni Bilgai, ni Semaya.

Liifai yaab bi mu nan ŋmee baayimbil na sɔ:

^9-13 Asania aajapɔɔn Jesua, ni Binui u nyan ni Henadad aamaal ponn ni na, ni Kadmiel, ni Sebania, ni Hodia, ni Kelita, ni Pelaya, ni Hanann, ni Maika, ni Rehob, ni Hasabia, ni Sakur, ni Serebia, ni Sebania, ni Hodia, ni Bani, ni Beninu.

Binib ngbaan aayidam bi mu nan ŋmee baayimbil na sɔ:

^14-27 Paros, ni Pahaf Moab, ni Elam, ni Satu, ni Bani, ni Buni, ni Asgad, ni Bebai, ni Adonija, ni Bigfai, ni Adinn, ni Ater, ni Hesekia, ni Asur, ni Hodia, ni Hasum, ni Besai, ni Harif, ni Anatof, ni Nebai, ni Magpias, ni Mesulam, ni Hesir, ni Mesesabel, ni Sadok, ni Jadua, ni Pelatia, ni Hanann, ni Anaya, ni Hosea, ni Hanania, ni Hasub, ni Halohes, ni Pilha, ni Sobek, ni Rehum, ni Hasabna, ni Maaseya, ni Ahia, ni Hanann, ni Anann, ni Maluk, ni Harim, ni Baana.

Kimɔbaan ngbaan

²⁸ Timi Israel aanib, bitotoorb, ni Liifai yaab, ni Uwumbɔr Aadichal aakikiib, ni Lidichal ngbaan ponn ni aalahngaab ni biwangbaab, ni laatutum, ni binib biken bi gaa Uwumbɔr Aakaal ki kii, ki yakr bibaa, ki nyan biwɔwɔm bi koo timi aatiŋ ponn ni na chee na, timi, ni tipuutiib, ni timi aabim bi chikr ki ga ŋmaa bee tiwan aatataa na,

²⁹ sil do ki kpaan timi aayidam chee ki puu tipuur timina, ke ti ga gaa Uwumbɔr Aakaal mu u nan di tii ni waatutunn Moses na; ti ki puu tipuur ke ti ga kii Tidindaan Uwumbɔr aamɔb mbamɔm, ki ga li joo waakaal ni waah ban pu na mɔmɔk.

³⁰ Taan joo biwɔwɔm bi koo timi aatiŋ ponn ni na aapiib, kaan di tibisatiib mu tii bi.

³¹ Biwɔwɔm yaa joo tijikaar bee tiwan nimɔk Likpaakool daal, bee nwiin mumɔk bi chain na, ke bi nan kooh ti pu na kan, taan daa ni. Libiln lolole mɔk ni kan, ti ga di timi aasar aatim lii ki taa ko mu, ki di cha pinn bi mɔmɔk joo timi aapɔn na mu, bi taa ki pa timi.

³² Libiln mɔk kan, ti mɔmɔk ga tii tikunabr siib baah nan siin pu na ki di ter Uwumbɔr Aadichal aatoorn pu.

³³ Uwumbɔr Aadichal ponn ni aadoon pu, ti ga tii tiwan nimina: boroboro u bi joo tii Uwumbɔr na, ni iwiin mɔmɔk aajikaabim aapiin, ni tiwakor ti bi ga di toor kitork ki see mmii ponn ni na, ni Ŋikpaakoo daal aatork ki bi chain na, ni Uŋmapɔɔn daal aatork aajim, ni njim mu gur na, ni ntoorm mɔmɔk mu gur ki bi chain na, ni kitork ki bi toor Israel yaab aatunwanbir pu na pu, ki kpee tiwan nimɔk bi ban Uwumbɔr Aadichal ponn ni na.

³⁴ Ti mɔmɔk, bitotoorb, ni Liifai yaab, ni binib mɔmɔk ga too inaan libiln mɔmɔk ponn ni, ki nyan imaal i ga tii idɔ aan bi li joo seer tiwakor ti bi joo toor tii Tidindaan Uwumbɔr, Nkaal aah mɔk pu na.

³⁵ Libiln mɔk ponn ni kan, ti ga di taah puen chee njikaabim mu na, ŋisubil ŋi puen puir timi aasui pu na buen Uwumbɔr Aadichal ponn ni ki ti di tii Uwumbɔr.

³⁶ Ti ga di taah puen ma njan aabijabo umɔk na buen Uwumbɔr Aadichal ponn ni, bitotoorb chee, aan bi di u tii Uwumbɔr, Nkaal aah mɔk pu na. Ti ga ki di timi aanaa aah puen ma unaabo u na; ni timi aapiih, ni timi aaŋoob aah puen ma ipihbi ni iŋobi i na mu tii Uwumbɔr, Nkaal aah mɔk pu na.

³⁷ Libiln mɔk ponn ni kan, ti ga di taah puen chee njikaabim mu na aayon, ni ŋisubil aadaan, ni olif aakpan, ni ŋisubil mɔmɔk aapiin buen bitotoorb chee Uwumbɔr Aadichal ponn ni aan bi di tii Uwumbɔr, Nkaal aah mɔk pu na. Ti ga di ni ye Uwumbɔr yaan ki nyan ni timi aasar mu ponn ni na ki di tii Liifai yaab bi gaal kina aawan itingbaan ponn ni na.

³⁸ Bitotoorb bi ye Aaronn aayaabitiib na ga li bi Liifai yaab ngbaan chee n‑yoonn mu bi bi gaal tisar aawan ngbaan na, le Liifai yaab ngbaan ga yakr tijikaar ngbaan nfum kipiik kipiik, ki di ligeln libaabaa ŋa Uwumbɔr Aadichal aapil ponn ni, aan ti li ye Lidichal ngbaan aajikaar.

³⁹ Liifai yaab, ni Israel aanib biken le ga di baah too too tijikaar ti na mɔmɔk, njikaabim, ni ndaan, ni olif aakpan, ki di buen nin chee bitotoorb bi bi lituln pu na, ni Uwumbɔr Aadichal aakikiib, ni bilahngaab kpa baadir na, Lidichal ngbaan ponn ni aasambil ni tiyir aah bi nin chee na. Taan suln timi Aawumbɔr Aadichal bɔr.