Nehemia 1 - Uwumbɔr aagbaŋ

Nehemia aatafal aah bi Jerusalem aatiŋ pu pu na

¹ Ataksekes aah nan ye Pesia aabɔrkpaan ki ti saa ŋibin moninko pu na aaŋmal u bi yin u ke Kislef na ponn ni, le min, Nehemia, nan bi litiyil Susa ponn ni.

² Le nna aabo ubaa, bi yin u ke Hanani, nan nyan ni Juda ki fuu ni, ki joo ni bijab bibaa, le m baa bi Jerusalem aatiŋ, ni ndo yaab, Juu yaab bi nyan ni tinaagbiir ni, Babiloŋ ponn ni, ki gir ni na aabɔr.

³ Le bi bui mi ke siib bi ŋmar ki bi linampal na bi limukl ni la, le biwɔwɔm bi bi ki duun bi na lik seen bi. Bi ki bui mi ke baah nan gbaa wii Jerusalem aagon ŋi na, baa kee ki maa ŋi, le ibisamɔi aajaaleŋ tiib bi mu bi nan see mmii na mu aa toor.

⁴ Maah ŋun tibɔr ngbaan mɔmɔk na le m kal ki wii pam. Iwiin pam nan jer le m bi wii ikpowiil, kaa ji nibaa. M nan mee Uwumbɔr ke,

⁵ “Uwumbɔr u ye Paacham Aadindaan na, aa ye unikpaan la, le ti san si ijawaan. Binib bi gee si ki ŋani saakaal aah len pu na, aa joo saah puu tipuur ti tii bi na mbamɔm.

⁶ Uwumbɔr, san mi kinimbaak, ki ŋun maameel, maah mee si pu nwiin pu ni kinyeek ki tii saanaagbiib, Israel yaab aanib, bi tun titunwanbir na pu na. M kii ke m ni n‑yaajatiib mɔmɔk tun titunwanbir la.

⁷ Ti ŋa si mbiin sakpen ki yii kaa ŋa saah bui timi pu na. Taa joo ikaal i aa nan di tii saatutunn Moses ke u di nabr tii timi na.

⁸ Teer saah nan bui Moses pu na ke: ‘Nimi Israel yaab yaa kaa kii tii mi kan, m ga cha ni yaa ki koo ŋinibol yayan ponn ni.

⁹ Le ni yaa fenn ki gir ni m chee ki ŋa maah bui nimi pu na kan, m ga giin ni nimi nin chee m lee ke ni li dooni mi na; le ni yaa po yaa yaa ki koo kitiŋ kee aadoon mɔk nin chee na kan, m ga giin ni nimi.’

¹⁰ “Uwumbɔr, binib bee ye saanaagbiib la, le ki ye sin aabaa aanib. Aa di saapɔɔn sakpiin gaa bi lii.

¹¹ Li pel maameel, ni saanaagbiib bimɔk ban ke bi nyuŋ si na mu aameen. Tii mi maah ban pu na din wee ki cha ubɔrkpaan ngbaan san mi kinimbaak.” N‑yoonn ngbaan, min le nan ye ubɔrkpaan ngbaan aadaan aaninkpel.