Nahum 3 - Uwumbɔr aagbaŋ

¹ Kitiŋ ki gbii inyamɔn, ni linikul, ni liwangol li bidim ga gaa li mpɔɔn na aadoon le na.

² Li pel ŋinaalab aah wii pu na man, ni itaan aatɔroku tiib aah san pu na.

³ Baataan berni la, le kijaak aajum moor lak lak, le tikpaatunn mu moor. Bi kuun ŋinikpol paan tɔb pu paacham, ŋinikpol ŋi baa nyi ŋaakahm na, bijab gbeer ŋi le ki lir.

⁴ Uwumbɔr daa pateer Ninefa aatiŋ aatafal la. Ki nan ŋan sakpen, le ki kpa ibɔnyɔk i bir na, ki nan ŋmal ŋitimbol ŋiken ibɔnyɔk, ki di mu ŋa tinaagbiir ni.

⁵ Uwumbɔr Mpɔɔnsakpiindaan bui ke, “M ga daa sin Ninefa aatiŋ aanib aatafal. M ga gbabr si ki cha si aaŋmeen ki cha ŋitimbol ŋiken kan si, ŋi ga kan si saanimɔɔn ngbaan ni.

⁶ M ga lik si fam, ki di tijɔŋ biin aa pu. Binib ga lik si ki san ijawaan la.

⁷ Binib bimɔk kan si na ga sur bipuwɔb. Bi ga len ke, ‘Ninefa aatiŋ kpaln tilangbenn le ki dɔ. Ubaa aan san ki kinimbaak. Ubaa mu aan li ban ke u sɔŋ kisui.’”

⁸ Ninefa aatiŋ, aa jer Ijipt aatiyil Tebes aa? Ki mu nan kpa limɔɔl li kii ki ke ligoln na. Nail aamɔɔl le nan ye kaakikiir.

⁹ Kima le nan joo Kus ni Ijipt aanib, le ubaa aa nan nyi kaapɔɔn mɔk. Kimaantɔ le nan ye Libia aatiŋ.

¹⁰ Le bi nan yoor Tebes aanib buen tinaagbiir ni. Bi nan gbaa ku baabim bil kitiŋ ngbaan aalɔlɔnn mɔmɔk ni. Bi nan di tikululn le gbin binib bi ye baasalolm na, le ki yakr bi tii binib bi nan nyaŋ bi ki chur bi na.

¹¹ Sin Ninefa aatiŋ mu ga ŋa ke saah gbii ndaan le na. Aa mu ga pɔɔn aabaa ke aa san ŋmar saadim chee.

¹² Saah maa tidir ti fɔk ki pɔɔ kiir aabaa na ga li gur naahn ŋikakan aasui i aasubil puir na la: dam isui ngbaan le ŋikakan ga gbar lir ni aamɔb ni.

¹³ Saajab naahn bipiib la, le ubaa aa kii saatiŋ ke saadim taa nyaŋ ki. Mmii le ga wu idɔ i aa di laŋ saabisamɔi na.

¹⁴ Lu nnyun ki gor kiir baah ban bi gob si pu na, ki moo pɔɔk saadir ti fɔk na. Taa titan ti ni ga di ŋa ŋitambil na man, ki gor tiwan ni ni joo ŋani ŋitambil na man.

¹⁵ Ni po gee ni ŋa pu na kan, mmii le ga wu nimi, bee ni bee butɔb ponn ni. Bi ga ŋar nimi ŋŋaan ke itoon aah ŋmɔ tijikaar pu na la. Ni pɔr ke itoon na la.

¹⁶ Nimi aanib bi tiir kitiirk na wiir jer iŋmabi aah wiir kitaapaak pu na. Le dandana ma kan, bi mɔmɔk buen ke itoon i taln ifeen ki fii buen na la.

¹⁷ Saaninkpiib naahn itoon i koo ŋigon ni nwiin mundaal soon na la, le nwiin yaa nyan ni kan, i fii buen, le ubaa aa ki nyi yaa buen nin chee na.

¹⁸ Asiria aabɔrkpaan, saayidam kpoi a, le saanib bi kpa ŋiyimbil na mu geen kaan ki finn kpala. Saanib yaa, ki bi ŋijoo paab, le ubaa aa bi ki ga giin bi kunn ni linampal.

¹⁹ Nnyɔk aa bi ki ga sɔŋ saatotonn ti aa kan na, le saabuun ngbaan aan yann. Binib bi mɔmɔk ŋun saah bii doo pu na gbaa tinyɔpur mpopiin pu la. Unii ubaa nan ŋmaa ŋmar saabiin mu kaa nan kpa ndoon na ni ii?