Nahum 2 - Uwumbɔr aagbaŋ

Ninefa aatiŋ aah kuln pu na

¹ Ninefa aatiŋ, bi gob si a. Mpɔɔn mu ga wii si yuk yuk na fuu ni a. Ban bijab sil saatiŋ aagon paab. Cha bi kiir nsan ngbaan. Gor ki kiir butɔb.

² Uwumbɔr ban u ki giin Israel aatiŋ aapak ki ki nan kpa, aan kaadim nan gaa kaawangol butɔb ni na tii ki la.

³ Bidim aajab joo kijaak aapeln ti man na la, le ki pee tiwanpeenkaan mamann mu. Bi bi gor ke bi nan tak la. Baataan aatɔroku tiib moor ke mmii na la, baataan bi yuk la.

⁴ Itaan aatɔroku tiib san kitiŋ ponn ni ke baah waar le na, ki san ti nya do ki di nan nya do kitiŋ ngbaan aapaan ni. Bi moor ke limotaafil aamii na la, ki moor ni mɔmɔk ke utaal na.

⁵ Bi kuun bijab aayidam; le baah tur cha mɔb pu na, bi gbeer. Bidim chii ki buen kitiŋ ngbaan aagoln chee ki gor baajaak aapeln ke baah ga li joo yur tɔb le na.

⁶ Ibisamɔi i bi limɔɔl wɔb na chuu piir a; le ijawaan gbiin libɔrdichal ni.

⁷ Bi chuu ubɔrpii a; le waatutum wii ke ŋinanjel na ki joo biŋaal gbaa bibiŋ mpombiin pu.

⁸ Binib san nyan Ninefa aatiŋ ni ke limɔɔl aah kar kan, laanyun puu nya pu na la. Iwiil nya ni ke, “Sil man. Sil man.” Le ubaa aa fenni upuwɔb ke u lik.

⁹ Gaa tikunabr ngbaan mpɔɔn man. Gaa salmaa ngbaan mpɔɔn man. Kitiŋ ngbaan ponn ni gbii liwangol la.

¹⁰ Ninefa aatiŋ bii a, ki ber a, le ki gur dɔ nkuun. Ijawaan cha binib aapobil donn a; mpɔɔn doo a, le ŋitaaŋaayil gbaa tɔtɔk, le ŋinimbil wɔb ŋa yɔl yɔl.

¹¹ Tɔ, kitiŋ ki nan bi ke ichinn aabuu na ki bi la chee? nin chee ichinn aabim ji, aan uchinnja ni uchinnpii nan chaa, aan yaabim bi lifuur ni na, bi la chee?

¹² Uchinn nan chuu tinann le ki daa par par ti ki tii upuu ni waabim; u nan di tinankaab le gbiin waabuu ni.

¹³ Uwumbɔr Mpɔɔnsakpiindaan bui ke, “Saadin ye min la. M ga see saataan aatɔroku tiib mmii. Bi ga ku saajab butɔb ni la, le m ga yoor saah nan gaa tiwan ni biken chee na ki di buen. Ubaa aan ki ŋun saah nan kpa mpɔɔn mu dulnyaa wee ni na pu.”