Mpiin 8 - Uwumbɔr aagbaŋ

Nwam ngbaan aah nan foor pu na

¹ Uwumbɔr aa nan suln Nowa, ni ipeel, ni tiwakor timɔk bi u chee buŋɔb ni na aabɔr, le ki cha libuln daar, le nnyun nin piin ki foor.

² Le utaal sil kaa ki nu, le nnyun aa ki nya ni paacham, ni kitiŋ.

³ Le libuln mu aah daar pu na, le nnyun foor siisii cha, ki ti saa iwiin nkub ni piiŋmu ngbaan.

⁴ Nnyun aah foor na, le buŋɔb ngbaan buen ki ti sil lijool libaa aapaacham, ŋmalole aawiin kipiik ni ilole daal, Ararat aajoo ni.

⁵ Nnyun ngbaan nan foor siisii, le ŋijoo aapaacham kpiir, ŋmapiik aajan aawiin daal.

⁶ Iwiin imonko ilee aah jer na, le Nowa piir takolu,

⁷ le ki nyan ni likakaal libaa, ki di lii ni lipaal, ke li ti lik ke nnyun foor aan mu aa foor. Le laa ki gir ni. Li nan bi laani paacham le nnyun ngbaan ti foor pel pel.

⁸ Le Nowa ki nyan ni linanjel, ki di lii ni lipaal, ke li ti lik ke nnyun foor aan mu aa foor, le li fii, ki laani ni kookoo,

⁹ le nnyun aah nan beenin dɔ kitiŋ, ni kookoo na, laa nan kan laah ga lir nin chee na, le ki ki gir ni buŋɔb chee, le Nowa laan chuu li ŋa bu ni.

¹⁰ Iwiin ilole aah jer na, le Nowa ki tun linanjel,

¹¹ le linanjel ngbaan buen ki ti kab ni olif aasub aafasɔŋ kibaa, ki joo ni Nowa chee kijook wɔb, le Nowa bee ke nnyun ngbaan foor cha.

¹² Iwiin ilole ki jer, le Nowa ki tun linanjel ngbaan, n‑yoonn mumina ma, linanjel ngbaan aa nan ki gir ni.

¹³ Nowa aah nan ti saa ŋibin ikui iloob ni libaa, njan aawiin, njan aaŋmal ni na, le nnyun foor. Le Nowa chuu piir buŋɔb ngbaan, le ki lik mann goln, ki kan ke kitiŋ bi kuur.

¹⁴ Ŋmalee aawiin moninko ni ilole daal, le kitiŋ kuur ni kookoo.

¹⁵ Le Uwumbɔr bui Nowa ke,

¹⁶ “Aa ni aapuu, ni aajapɔtiib, ni aabipuutiib mɔmɔk nyan ni buŋɔb ponn ni.”

¹⁷ Uwumbɔr nan ki bui Nowa ke u nyan tiwakor, ni ipeel, ni inyoon mɔmɔk, ni tiwan nimɔk fu na bu ponn ni, aan ni pɔr gbiin dulnyaa wee ni.

¹⁸ Le Nowa nan nyan upuu, ni ujapɔtiib, ni ubipuutiib bu ponn ni.

¹⁹ Le tiwakor, ni ipeel, ni inyoon mɔmɔk aabɔŋ nyan ki dii tɔb.

Nowa aah nan pak Uwumbɔr, ki toor kitork tii u pu na

²⁰ Nowa nan maa libimbiln tii Uwumbɔr le ki di tiwakor, ni inyoon i bi chain na ibaabaa, ki di i toor kitork, ki see i mmii ni, libimbiln ngbaan paab, tii Uwumbɔr.

²¹ Uwumbɔr aah ŋun kitork ngbaan aanun na, le ni piir usui, le u bui ubaa ke, “Maan ki puun lii kitiŋ pu kina daalbaadaal, ki joo cha unibɔn aah ŋa pu na. M nyi ke unibɔn aah laa diin ki joo cha na, waalandak ye titunwanbir la. Din ki joo cha, maan ki bii tiwanfuurkaan mɔmɔk, ke maah ŋa pu n‑yoonn mue na.

²² Dulnyaa aah ga li bi cha na, liwanbuul ni liwancheel aayoonn ga li bi la. Le tiwoor, ni kitotoŋ, ni unaalan, ni kitakuuk, ni nwiin pu, ni kinyeek ga li bi.”