Mpiin 6 - Uwumbɔr aagbaŋ

Unibɔn aah tun titunwanbir pu na

¹ N‑yoonn mu binib nan too pɔr gbiin dulnyaa wee ni na, bi nan ma mpiibim bi ŋan sakpen na,

² le ŋiniwɔk nan yoor baah gee bi na, ki di ŋa bipuutiib.

³ Le Uwumbɔr bui ke, “Binib aah tun titunwanbir pu na, maan ki cha bi li bi ki yunn sakpen. N‑yoonn mue ki joo cha, maan ki cha unibɔn yunn ki ti jer ŋibin nkub ni moninko.”

⁴ N‑yoonn ngbaan, ni nee aapuwɔb, le ŋiniwɔk, ni mpɔɔndam, ni bininyuum le nan bi dulnyaa ni. Ŋiniwɔk ngbaan aah nan yoor baah gee bipiib bi na le nan ma bi.

⁵ Uwumbɔr nan kan ke unibɔn aatunwanbir wiir ki ti nyaŋ, baalandak nan ye bakaa aalandak ŋmeen,

⁶ nima pu le usui bii sakpen, waah naan unibɔn u na pu.

⁷ Le u bui ke, “M ga kuln unibɔn, ni ipeel, ni tiwakor, ni inyoon, ni tiwan ni fu na mɔmɔk; ba pu? nsui bii maah naan unibɔn aan u tun titunwanbir ti na pu.”

⁸ Tɔ, Uwumbɔr aasui nan gbiin Nowa aatunyaan pu.

Nowa aabɔr

^9-10 Nowa nan dii Uwumbɔr mbamɔm. U nan ma mbijabim mutaa, ki nan yin bi ke Sem, ni Ham, ni Jafef. Nowa baanja le nan ye uninyaan n‑yoonn ngbaan. Uma le nan dii Uwumbɔr mbamɔm.

¹¹ Binib bi gur na nan tun titunwanbir Uwumbɔr chee la, le ki gbaa ki ku tɔb.

¹² Uwumbɔr nan lik dulnyaa, ki kan ke unibɔn aatunwanbir wiir ti nyaŋ.

¹³ Uwumbɔr nan bui Nowa ke, “M ga kuln unibɔn. M ga bii tiwan mɔmɔk doo, ba pu? baatunwanbir le gbii dulnyaa mɔmɔk ni.

¹⁴ M ban ke aa di ŋikpan ŋi ŋan na ki kpaa buŋɔsakpem, aan ki ŋmar. Ŋa tidir bu ponn ni, aan ki di kootaal boon ponn ni, ni lipaal.

¹⁵ Bu aah ga li fɔk kitiŋ pu na li ye ŋitaa ikui inaa ni ŋiŋmu, bu aah ga li waa pu na li ye ŋitaa imonko itaa ni kipiik ni ŋiŋmu, bu aah ga li fɔk paacham pu na li ye ŋitaa imonko ilee ni ŋiŋmu.

¹⁶ Di ŋikpan kpaa buŋɔb ngbaan aapaacham, ki cha mpaan li bi buŋɔb ngbaan aapaacham aataab, ni li ye ŋisaŋ ŋitaa aawawaan, aan ni li wiin bu ponn ni ki ŋa bu ŋiker ŋitaa tɔŋ tɔb pu, aan ki ŋa mbisamɔb busikakl.

¹⁷ M ga tun ni nwam dulnyaa wee ni, mu nan bii tiwanfuurkaan mɔmɔk. Tiwan nimɔk bi dulnyaa wee ni na ga kpo.

¹⁸ Tɔ, m ga puu tipuur tii si. Aa ni aapuu, ni saabim, ni bipuutiib koo buŋɔb ngbaan ni.

^19-20 Aa di tiwakor, ni ipeel, ni inyoon mɔmɔk aabɔŋ, ni tiwan ni fu na mɔmɔk, nija ni nipii, ki di ŋa buŋɔb ngbaan ni. Ni mɔmɔk ga dan aa chee aan ni mu ŋmar ki taa kpo.

²¹ Ban tijikaar mɔmɔk aabɔŋ, aan aa ni tiwakor, ni ipeel, ni inyoon mɔmɔk li ji.”

²² Le Nowa ŋa Uwumbɔr aah bui u pu na mɔmɔk.