Mpiin 50 - Uwumbɔr aagbaŋ

¹ Jakob aah nan kpo na, le Josef ti bub u, ki moor utakpiln, le ki wii.

² Le Josef cha Ijipt yaab aadɔkta tiib ŋa uwon baah ŋani pu aan linikpol aan bur na.

³ Bi joo iwiin imonko ilee le ŋani kina aatuln. Le Ijipt yaab mɔmɔk nan di iwiin imonko itaa ni kipiik ŋa waajan aakpuul.

⁴ N‑yoonn mu bi ŋa njan aakpuul doo na, le Josef tun ubɔrkpaan aaninkpiib u chee ki bui bi ke, “Li cha ki ti bui ubɔrkpaan ke,

⁵ ‘N‑yoonn mu nte nan ban u kpo na, u nan cha m puu tipuur ke u yaa kpo kan, m di waawon ti sub Kanaann aatiŋ ni, likaakul li u nan toor siin ubaa na ponn ni. Kina pu na, maaninkpel, tii mi nsan m di u buen ti sub nima chee aan ki gir ni.’”

⁶ Le ubɔrkpaan bui u ke, “Saah nan puu tii aate ke aa ga ŋa pu na, di aate ki ti sub.”

⁷ Le Josef nan di ute buen u ti sub. Le ubɔrkpaan aaninkpiib bi paa u pu na, ni bininkpiib bimɔk nan bi ubɔrkpaan do lichiln ni na, ni binib bi ye bininyuum Ijipt aatiŋ ni na mu nan dii u buen.

⁸ Josef ni waamaal, ni ukpetiib, ni ute aamaal bi gur na nan dii u buen. See mbim, ni tiwakor le nan gur bi linampal Gosenn aatiŋ ni lipepel ngbaan wɔb.

⁹ Binib bi nan dii u buen na nan wiir pam, bibaa nan bi itaan aatɔroku tiib ponn ni, le bibaa mu dik itaan pu ki buen.

¹⁰ N‑yoonn mu bi nan ti fuu Atad aadipoipaal pu, Jɔɔdann aamɔɔl aawipuul wɔb na, le bi nan ki toor waakpuul nima chee. Josef nan ki ŋa likpuul ngbaan iwiin ilole le nima chee.

¹¹ N‑yoonn mu Kanaann aatiŋ ni aanib kan kinipaak ngbaan aah bi ŋani likpuul ngbaan Atad aapaal chee pu na, le bi bui ke, “Mbamɔn, Ijipt yaab bi ŋani likpuul kpaan la.” Nima pu le bi yin nima chee ke Abel Misraim.

¹² Kina le Jakob aajapɔtiib nan ŋa waah nan bui bi ke bi ŋa pu na;

¹³ bi nan yoor uwon ki di buen Kanaann aatiŋ ni, ki ti di u sub likaakul li bi Makpela ni, Mamre aawipuul wɔb, bukpaab bu Abraham nan daa Efronn u ye Hef aanii na chee ke nima chee li ye waamaal aacheek na.

¹⁴ Josef aah sub ute ki doo na, le u ni waamaal ni binib bimɔk nan dii u buen na nan gir kun Ijipt aatiŋ ni.

Josef ki bui ukpetiib ke u di cha pinn bi

¹⁵ Bite aah kpo jer na, le Josef aakpetiib bui tɔb ke, “Nibaakan Josef ga li beenin nan timi, ki giin timi aabakaa u ti nan ŋa u na ki pa timi.”

¹⁶ Nima pu na, bi nan tun tichandann Josef chee le ki bui ke, “Tite aah nan ban u kpo na,

¹⁷ u nan bui timi ke ti tun aa chee tichandann, ke aa di cha pinn timi aabakaa u ti nan ŋa si na. Nima le dandana wee ti tun ke aa di cha pinn timi bi ye aatetiib Aawumbɔr aanaagbiib na aabakaa.” Josef aah ŋun ukpetiib aachandann ngbaan aabɔr na, le u wii.

¹⁸ Le ukpetiib buen u chee ki ti gbaan unimbiin ni, le ki bui u ke, “Ti ye saanaagbiib le ki bi do.”

¹⁹ Le Josef nan bui bi ke, “Taa san ijawaan man. Maan ŋmaa di mbaa ŋaŋ Uwumbɔr.

²⁰ Nimi le dak tibɔbir m pu, le Uwumbɔr cha ni kpaln ni ŋan na, ki toor nsan u gaa binib pam aamɔfal lii, tiwan ni ŋa mi na pu.

²¹ Taa li san ijawaan ibaa man. M ga lik nimi, ni nimi aamaal mɔmɔk.” Nima chee le u nan gir bui bi iliinyaan ni, le tibɔr ngbaan koo bisui ni.

Josef aakun

²² Josef ni ute aamaal mɔmɔk nan beenin bi Ijipt aatiŋ ni, le u ti saa ŋibin nkub ni kipiik, le ki kpo.

²³ U nan bi ki kan ujapɔɔn Efraim aabim ni uyaabisɔsɔk. U nan ki kan uyaabil Makir, u ye Manase aajapɔɔn na aabim mu.

²⁴ Le u bui ukpetiib ke, “Ni ŋeer m kpo; Uwumbɔr mu ga sil li joo nimi, ki nyan nimi Ijipt aatiŋ kee ni, ki giin nimi buen kitiŋ ki u nan puu ke u ga di ki tii titetiib Abraham, ni Aisak, ni Jakob na.”

²⁵ Josef nan bui waanib ke, “Puu tii mi man, ke n‑yoonn mu Uwumbɔr nyan nimi Ijipt aatiŋ kee ni, aan ni chaa kun Kanaann aatiŋ ni na, ni ga yoor maawon mu buen nima chee.”

²⁶ Nima na, Josef nan saa ŋibin nkub ni kipiik, le ki kpo Ijipt aatiŋ ponn ni. Bi nan ŋa uwon baah ŋani pu aan linikpol aan bur na, le ki di u ŋa linikpol aadakaa ni, le ki sub.