Mpiin 49 - Uwumbɔr aagbaŋ

Jakob aah nan di waakookoo aabɔr ti chɔi waabim na

¹ Jakob nan yin ujapɔtiib ki bui ke, “Tiŋ ni, ki mann goln mi man, aan m tuk nimi tiwan ni choo ni pu ki ga nan ŋa na.

² Nimi Jakob aajapɔtiib, tiŋ ni tɔb ki nan pel man. Ni li pel nite Israel aah ga len pu na.

³ Sin Rubenn, njapɔpol, maah nan kpa mpɔɔn buyoonn na le m nan ma si. Maah ŋa uja na, sin le m pue ma, sin le kpa kipak, ki kpa mpɔɔn maabim ngbaan mɔmɔk ni.

⁴ Aa bi ke nnyusakpem aah fii ki lir ki kpa kifuuk pu na la, saah koo doon mpuu chee, ki bii aate aawandookaan na, saan li ye uninyuun aanaatiib ponn ni.

⁵ Simeonn ni Liifai, ni ye naabitiib la. Ni joo nimi aajawan le ki tun mbiin aatuln.

⁶ Naah kpokl tibɔr libɔɔl ni pu na, maa bi ni chee, ki mu aa kii kina. Ni ku binib liŋuul ponn ni la. Le nimi aageehn ni, ni bii tiwakor.

⁷ M puun lii nimi aaŋuul ngbaan pu, ba pu? nimi aaŋuul ngbaan kpa ijawaan, Nimi aaŋuul ye mbiin aatuln le ni tun. M ga di nimi yaa Israel aatiŋ ni, le ki cha ni yaa Israel yaab mu ni.

⁸ Sin Juda, aate aabim ga nyuŋ si. Aa ga li joo aaŋaal le chur saadim aaneen ni. Aate aabim ga gbaan aanimbiin ni.

⁹ Juda, aa naahn uchinn u ku tinann, ki ki gir buen waadɔdooyaan na la. U yaa doon ke u naar ubaa kan, ubaa aan kaa ke u fiin u.

¹⁰ Sin Juda ga li joo libɔrdabil, le saamaal ga li ye bibɔrb n‑yoonn mu kaa kpa doon na. Ŋitimbol yayan aabɔrb ga joo ni ipiin nan tii si. Bi ga dan ki nan gbaan aanimbiin ni, ki kii saamɔb.

¹¹ Isui i lu na aah ga li wiir sakpen pu na, aatafal aan li bi ni ni, ke aa di saabon gbin isui ngbaan, hali bu ŋan sakpen na. Ŋisubil aadaan ponn ni, le aa ga li finni saawanpeenkaan.

¹² Tijikaar nyaan, ni ndanyaan aah ga li wiir pu na, le laafee ga li bi aa chee. Aanyin ga li piin ke nnaabiin na.

¹³ Sin Sebulunn, aa ga li bi nnyusakpem chee la. Le iŋɔi i bi nnyusakpem ni na ga li gee i dan aa chee ki nan peŋ. Le saanaan mɔk ga pii Saidonn aatiŋ ni.

¹⁴ Sin Isakar kpa mpɔɔn ke ubon u tu lituln li bal ŋipepel mɔmɔk ŋilee pu na.

¹⁵ U ga li gee kitiŋ ki ŋan ki nyuun na u ko ki jer lifuur ke ubon aah si aan bi di lituln paan u pu, aan u si ŋmin ke unaagbiija na pu na la.

¹⁶ Sin Dann, sin le ga li lik saamaal aanib ke Israel yaab aamaal biken aah ŋani pu na.

¹⁷ Sin Dann, aa ga ki li bi ke uwaa u dɔ lisikakpel na la, aa ga li bi ke uwaa u kpa liluul ki dɔ nsan aagbaan na, le ki ga gaa utaan aataagbeln, le unii u dik u pu na fii ti lir upuwɔb.

¹⁸ Uwumbɔr, m kii saah ga gaa mi lii pu na la.

¹⁹ Sin Gad, saadim ga lir aa pu, le ki joo cha na, sin le ga nyaŋ bi.

²⁰ Sin Aser, aa ga li kpa tijikaar pam. Saah ga ko ki kan tijikaar ti na, bibɔrb ga li gee ti pam.

²¹ Sin Naftali, aa ga li san aabaa pu ke upeeman aa san pu na, le aa ga li len tibɔnyaan.

²² Sin Josef, aa naahn busub bu si gbɔk nnyunbun ki lu ŋisubil sakpen na la, le aayaabitiib ga li wiir ki yaa buen ni mɔmɔk.

²³ Saadim aah nan si pu na, bi ŋa si falaa sakpen, le ki joo baatɔi ni ipiin ki san dii si.

²⁴ Saatɔm aa diŋni, le aaŋaal mu pɔɔ. Aate Jakob Aawumbɔr Mpɔɔnsakpiindaan, uma Uwumbɔr u lik Israel yaab na le tii si mpɔɔn.

²⁵ Mbamɔn, uma aate Aawumbɔr le ga ter si. Uwumbɔr Mpɔɔnsakpiindaan, uma le ga ŋa tinyoor ŋa aa pu, le ki tii si utaal u nyan ni paacham na, ki tii si nnyun mu nyan ni taab na, ki tii si tiwakor ni mbim pam,

²⁶ ki tii si tijikaar ni isui i lu ŋisubil mɔk aabɔŋ na, le ki tii si aayaajatiib aah nan kpa tiwan ni na mɔmɔk, ki tii si tiwan ni ga tii si mpopiin ki nyan ni n‑yaayoonn na aagongon na chee, Uwumbɔr cha tinyoor ngbaan li bi sin Josef pu, sin le Uwumbɔr nyan si aanaabitiib ponn ni ki di uŋaal paan aa pu.

²⁷ Sin Benjaminn, aa ga li naahn takɔ u ku tinann kichakpiik ni, ni kijook na la.”

²⁸ Israel yaab aanibol kipiik ni ŋilee ŋimina le nan ye Jakob aabim. Waah nan di tibɔr ti ŋeer bi mɔmɔk, ki di chɔi bi na, le na.

Jakob aah kpo, ni baah sub u pu na aabɔr

²⁹ Jakob nan sur ujapɔtiib ke, “Maah ban m kpo ki buen ntetiib chee na, ni taa suln ki di mi ti sub ntetiib chee, Kanaann aatiŋ ni, likaakul li bi Efronn u ye Hef aanii na aakpaab ni na.

³⁰ Li bi Makpela aatiŋ ni, Mamre aawipuul wɔb. Abraham nan daa bukpaab, ni likaakul ngbaan Efronn chee la.

³¹ Nima chee le bi nan sub Abraham ni upuu Sara, bi ki di Aisak ni upuu Rebeka mu di sub nima chee la, m mu nan di mpuu Lea sub nima chee la.

³² Abraham nan daa bukpaab, ni likaakul ngbaan Hef yaab chee la. Ni di m mu sub nima.”

³³ N‑yoonn mu Jakob sur waabim baah ga ŋa pu aan ki doo na, le u gir doon waawandookaan pu, le ki kpo.