Mpiin 47 - Uwumbɔr aagbaŋ

¹ Josef nan nyan ukpetiib ponn ni biŋmu, le bi buen ubɔrkpaan Faro chee. Le u ti bui ubɔr ke, “Nte ni nkpetiib fuu ni a. Bi nyan ni Kanaann, ki joo ni baawakor ni baawangol li bi kpa na mɔmɔk. Dandana wee, bi bi Gosenn aapepel ni.”

² Le u di ukpetiib mɔk ubɔrkpaan Faro.

³ Le ubɔr ngbaan baa bi ke, “Ni tun ba aatuln?” Le bi giin bui u ke, “Uninkpel, ti lik tiwakor ke tiyaajatiib aah nan tun pu na la.

⁴ Ti dan ke ti nan li bi kitiŋ kee ni, ba pu? nkon ngbaan pɔɔ Kanaann aatiŋ ni sakpen a, le timoor aa ki bi tiwakor ŋmɔ. Ubɔr, tii timi nsan ti li bi Gosenn aapepel, saatiŋ kee ni.”

⁵ Le ubɔr ngbaan bui Josef ke, “Aate ni aakpetiib aah fuu ni Ijipt aatiŋ ponn ni na,

⁶ kitiŋ ngbaan mu ye biyaan la. Cha bi ti kal Gosenn aapepel ni, nin chee ŋan sakpen na. Binib bi nyi lituln ngbaan na bibaa yaa bi bi ponn ni kan, nyan bi aan bi li lik maawakor tii mi.”

⁷ Le Josef di ute Jakob mu buen ubɔr chee u ti doon u. Jakob nan mee tinyoor ŋa ubɔr ngbaan pu.

⁸ Le ubɔr ngbaan baa u ke, “Aa ye ŋibin ŋiŋa?”

⁹ Le Jakob bui u ke, “Maah chuun ki mann gonni pu na, m saa ŋibin nkub ni piitaa la. Ŋibin ngbaan aa wiir, ki mu ye linimaln la, kaa wiir ke n‑yaajatiib aabin aah nan wiir pu na.”

¹⁰ Le Jakob chɔi ubɔr, ki ki ŋa tinyoor ŋa u pu, le ki gir buen waamaal chee.

¹¹ Le Josef ŋa ubɔr ngbaan aah nan bui u ke u ŋa pu na, ki di ute ni ukpetiib kaan kitinyaan ki bi Rameses aatiŋ chee na.

¹² Le Josef ban tijikaar tii ute, ni ukpetiib, ni ute aamaal aanib mɔmɔk, hali ki kpee biwaatiib mu.

Nkon mu nan lir na aabɔr

¹³ Nkon ngbaan nan pɔɔ ki ti nyaŋ, le tijikaar aa nan ki bi nibaa chee, le Ijipt ni Kanaann yaab aa nan ki kpa mpɔɔn bi ŋa nibaa, nkon ngbaan pu.

¹⁴ Bi nan joo baamombil daa tijikaar Josef chee, le Josef ti gaa ŋimombil ngbaan mɔmɔk buen ubɔr do.

¹⁵ N‑yoonn mu Ijipt ni Kanaann yaab nan di baamombil kookoo daa tijikaar na, le Ijipt yaab buen Josef chee ki ti bui u ke, “Tii timi tijikaar ti ji. Taa cha ti kpo nkon. Timi aamombil doo a, pɔɔn aabaa ki ter timi.”

¹⁶ Le Josef bui bi ke, “Li joo ni nimi aawakor man. Nimi aamombil yaa doo kan, m ga di tijikaar kpeln nimi tiwakor la.”

¹⁷ Nima pu na, bi nan joo ni baawakor ti bi kpa na Josef chee, le u di tijikaar kpeln bi baataan, ni ipiih, ni iŋoob, ni inaa, ni ibon. U nan di tijikaar le ki di kpeln baawakor mɔmɔk libiln ngbaan ni.

¹⁸ Naah gɔr libiln na, bi ki buen u chee ki ti bui u ke, “Uninkpel, taan ŋmaa di tibɔr tee bɔr si, taa ki kpa ŋimombil, le timi aawakor mu doo a. Nibaa aa ki bi ti chee, see tibaa, ni timi aakpaakon le gur.

¹⁹ Taa cha ti kpo nkon, aan timi aakpaakon doon nkuun. Ter timi. Ti ga di tibaa ni timi aakpaakon ki di kpeln si tijikaar. Ti kii ke ti ga ŋa ubɔr aanaagbiib aan u li yeh timi aakpaakon. Tii timi tijikaar ti ji aan ki taa kpo nkon, ki tii timi njikaabim ti bu.”

²⁰ Le Josef nan daa tikpaasar mɔmɔk tii ubɔr. Ijipt yaab mɔmɔk nan di baakpaakon mɔmɔk ki di kooh, le Josef daa tii ubɔr ngbaan, ba pu? nkon ngbaan nan pɔɔ ti nyaŋ.

²¹ Josef nan cha Ijipt aatiŋ aanib mɔmɔk ŋa ubɔr aanaagbiib.

²² Bitotoorb aakpaakon baanja le waa nan daa. Ba pu? ubɔr le nan luu bi.

²³ Le Josef bui Ijipt yaab ke, “Ni kan ke dandana wee m daa nimi, ni nimi aakpaakon mɔmɔk, ki di tii ubɔr a. Ni gaa njikaabim ki ti bu ikpaakon ni man.

²⁴ Buyoonn ni nan chee tijikaar ngbaan na kan, see ni mɔmɔk yakr nimi aajikaar nfum muŋmu pu, ki nyan nibaabaa tii ubɔr. Le tijikaar ti gur na, ni ni nimi aamaal li ji, ki di ngem mu ŋa libuul.”

²⁵ Le bi mɔmɔk bui u ke, “Uninkpel, ti ga ŋa ubɔr aanaagbiib, sin pu le ti jin ŋmar, aa ŋa timi tiŋann pam.”

²⁶ Nima pu na, Josef nan siin nkaal Ijipt aatiŋ mɔmɔk ni, ke bimɔk yaa yakr baajikaar nfum muŋmu pu kan, mubaa li yeh ubɔr yaan. Le nkaal ngbaan beenin bi kina ki nan saa din, see bitotoorb aakpaakon baanja le baa di ŋa ubɔr yaan.

Jakob aah nan tuk ujapɔɔn pu na aabɔr

²⁷ Israel yaab nan bi Gosenn aapepel ni, Ijipt aatiŋ ni, le bi ma mbim pam, ki kan liwangol mu pam.

²⁸ Jakob nan bi Ijipt aatiŋ ni ki ti saa ŋibin kipiik ni ŋilole, le waabin nin saa nkub ni imonko ilee ni ŋilole.

²⁹ N‑yoonn mu u bee ke naan ki yunn u ga kpo na, le u yin ujapɔɔn Josef, le ki nan bui u ke, “Di aaŋaal ŋa ntaapaln taab ki puu tipuur ke saan cha maawon bee Ijipt aatiŋ ni do.

³⁰ M ban ke aa di maawon ti sub ntetiib chee la; nyan maawon Ijipt aatiŋ ni ki ti di sub bi chee.” Le Josef bui u ke, “M ga ŋa saah len pu na.”

³¹ Le Jakob ki bui u ke, “Puu ke aa ga ŋa kina.” Le Josef puu tipuur. Le Jakob doon Uwumbɔr waawandookaan ngbaan pu.