Mpiin 45 - Uwumbɔr aagbaŋ

Josef aah kpiir ubaa mɔk ukpetiib pu na aabɔr

¹ Le Josef aa ki ŋmaa chuu ubaa waanaagbiib aanimbil ni, nima pu le u cha bi mɔmɔk nyan kidiik ni, ki cha u ni ukpetiib. Ubaa aa nan ki bi bi chee, le Josef kpiir ubaa mɔk ukpetiib.

² U nan wii ki kaani sakpen, le Ijipt yaab ŋun waah kaani pu na, le tibɔr ngbaan fuu ubɔr do lichiln ni.

³ Le Josef bui ukpetiib ke, “Min Josef le na. Nte beenin bi ii?” N‑yoonn mu ukpetiib ŋun kina na, le ijawaan chuu bi, le baa ki nyi baah ga len pu na.

⁴ Le Josef bui bi ke, “Foor duun ni m chee man, ki taa san ijawaan.” Bi nan dan u chee, le u bui bi ke, “Min Josef, ninaal u ni nan di kooh tii Ijipt yaab na le na.

⁵ Tɔ, naah nan kooh mi na, ni taa cha nisui bii, ki taa galn nibaa naah ŋa pu na. Ni ye mbamɔn ke Uwumbɔr le nan cha m dan do, ke binib pam ŋmar m pu.

⁶ Nkon mue aabin ŋilee le na; ŋibin ŋiŋmu mu le paa ni, ki choo na, le ubaa aan ŋmaa ko, ki mu aan chee nibaa.

⁷ Uwumbɔr le tun lijinjiir aatuln ki cha m loln nsan dan do, ke m nan gaa nimi, ni nimi aamaal lii.

⁸ Nima pu na, naa ye nimi pu le cha m dan do, Uwumbɔr le ŋa kina. Uma le tii mi tininkpir ti paa ubɔr Faro pu na. Min le lik waawan mɔmɔk, ni Ijipt aatiŋ kee mɔmɔk.

⁹ “Tɔ, gir buen linampal mala tite chee, ki ti bui u ke ujapɔɔn Josef aah len pu na sɔ: Uwumbɔr ŋa mi Ijipt aatiŋ kee mɔmɔk aaninkpel a, ŋa mala ki dan m chee.

¹⁰ Aa dan ki nan li bi Gosenn aapepel wɔb, ki li mal mi. M ga ŋmaa lik aa ni saabim, ni aayaabitiib, ni saapiih, ni iŋoob, ni inaa, ni saah kpa tiwan nimɔk na.

¹¹ Aa yaa bi Gosenn aatiŋ ngbaan ni kan, m ga li lik si. Nkon aabin gur ŋiŋmu la, le maa ban ke aa ni saamaal, ni tiwakor kpo nkon.”

¹² Josef nan ki len ke, “Ni ni Benjaminn mɔmɔk, ni bee mbamɔm ke min Josef sil ye.

¹³ Ni ti bui nte maah kpa mpɔɔn Ijipt aatiŋ ponn ni pu na, ki bui u naah kan pu na mɔmɔk. Ni ŋa mala ki li joo ni u m chee man.”

¹⁴ Le u di uŋaal mɔmɔk ilee bub chuu Benjaminn le ki wii, le Benjaminn mu bub chuu u ki wii.

¹⁵ Le u bub chuu bi mɔmɔk ki beenin wii ki moor bitakpin. Nee aapuwɔb, le u ni ukpetiib piin ki bi gbaa tɔb chee tibɔr.

¹⁶ Ubɔrkpaan Faro ni waaninkpiib nan ŋun ke Josef aamaal fuu ni u chee, le ni mɔɔr bi pam.

¹⁷ U nan bui Josef ke, “Bui aakpetiib ke bi tun baabon ŋitun ki gir kun bido Kanaann aatiŋ ni mala.

¹⁸ Cha bi ti li joo ni bite, ni baamaal mɔmɔk, ki dan Ijipt aatiŋ ni do. M ga tii bi kitinyaan Ijipt ponn ni do, le bi ga kan baah ban pu na mɔmɔk.

¹⁹ Tii bi itaan ni tɔroku tiib bi ti yoor ni bipuutiib, ni mbim, ni bite, ki li joo ni bi.

²⁰ Bi taa dak baawan ni gur na pu, tiwan nyaan nimɔk bi Ijipt aatiŋ kee ponn ni na ga li ye biyaan la.”

²¹ Jakob aabim ngbaan nan ŋa baah bui bi pu na. Ubɔrkpaan aah len pu na, Josef nan ban itaan, ni tɔroku tiib, ni tijikaar ti bi ga li ji nsan ni na, ki tii bi.

²² U nan ki tii bi mɔmɔk tiwanpeenkaan, le ki nan tii Benjaminn ma tikunabr aamombil ikui itaa, ki tii u tiwanpeenkaan nfum muŋmu pu.

²³ U nan cha ibon kipiik le joo Ijipt yaab aawanyaan, le ibon kipiik mu joo tijikaar ki kpee baah ga li ji tijikaar ti nsan ni na.

²⁴ Le u chɔi ukpetiib ki bui bi ke, “Ni taa jaa nsan ni man.”

²⁵ Le bi gir kun Kanaann aatiŋ ni, bite chee,

²⁶ le ki ti bui bite ke, “Josef beenin bi. Uma le ye Ijipt aatiŋ aajojoor.” Le tibɔr ngbaan ŋa Jakob mpobiyuk, le waa nyi waah ga len pu na, ki dak ke taa gbii.

²⁷ Tɔ, n‑yoonn mu bi tuk u ujapɔɔn Josef aah len pu na mɔmɔk, aan u kan itaan, ni tɔroku tiib, bi Josef len ke bi di yoor ni u na ki di dan Ijipt aatiŋ ni, le usui nin doon.

²⁸ Le u bui ke, “Maabo Josef beenin bi. Ni ŋeer. See m buen ti kan u, le ki nin kpo.”