Mpiin 44 - Uwumbɔr aagbaŋ

Josef aakunabr aayikuuk aah wɔŋ pu na aabɔr

¹ Josef nan bui waanaagbiija u lik waachiln na ke, “Ban tijikaar gbiin bijab ngbaan aabɔtɔ tiib, baah ga ŋmaa joo pu na, aan ki giin baamombil ŋa baabɔtɔ tiib ni.

² Di maayikuuk ki m joo nyu tiwanyukaan na ŋa uwaatiir aabɔtɔ ponn ni, tijikaar chee, ki di waamombil mu kpee.” Le u ŋa waaninkpel aah bui u pu na.

³ Le ni woln kichakpiik ni, le Josef chɔi ukpetiib, le bi ni baabon siir buen.

⁴ N‑yoonn mu bi siir buen kaa foor kpala na, le Josef bui waanaagbiija ngbaan ke, “Ŋa mala ki san chuu bijab ngbaan, ki baa bi ke, ‘Ba ŋa ni di bakaa pan tiŋann?

⁵ Ba ŋa ni sun maaninkpel aakunabr aayikuuk? U joo kima le nyu nnyun, ki joo kima le beer tiwan ni choo ki ga ŋa na. Ni ŋa bakaa u bir sakpen na.’”

⁶ N‑yoonn mu unaagbiija ngbaan pii bi ki len tibɔr ngbaan kina na,

⁷ le bi bui u ke, “Uninkpel, aa len kinye? Ti puu ke taan ŋmaa ŋa bakaa kina aaboln.

⁸ Taah nan gir choo na, ti nan giin ni ŋimombil ŋi nan bi timi aajikaar chee bɔtɔ tiib ponn ni na. Ba pu le ti ga ki su saaninkpel aakunabr, bee salmaa?

⁹ Uninkpel, aa yaa lik ki kan kiyikuuk ngbaan unii u aawan ponn ni na kan, ti kii ke aa ku udaan ngbaan, aan ki di timi bi gur na ŋa nimi aanaagbiib.”

¹⁰ Le u bui bi ke, “M kii kina, tɔ, unii u kiyikuuk ngbaan bi waawan ponn ni na le ga li ye maanaagbiija, le m ga di nimi bi gur na lii.”

¹¹ Le bi ŋa mala ki chuu paar baatun ibon pu, ki di siin kitiŋ, le ki buur baabɔtɔ tiib.

¹² Le Josef aanaagbiija ngbaan piin upol aabɔtɔ ponn ni, ki lik suusuu ki ti pii uwaatiir aabɔtɔ ni, le ki kan kiyikuuk ngbaan Benjaminn aabɔtɔ ponn ni.

¹³ Le ukpetiib aah kan kina na, bisui bii sakpen, le bi chuu baawanpeenkaan daa kar, le ki yoor baatun paan ibon pu, ki gir buen kitiŋ ponn ni.

¹⁴ N‑yoonn mu Juda ni biken fuu ni Josef do na, u nan bi linampal. Le bi gbaan unimbiin ni.

¹⁵ Le Josef baa bi ke, “Ba ŋa ni ŋa kina? Naa nyi ke min uninkpel kina aaboln ga ŋmaa baa ki bee naah ŋa pu na aa?”

¹⁶ Le Juda bui u ke, “Uninkpel, ti mu ga ki len kinye? Ti ga ŋa kinye ki kpak si aan ki nee nya? Uwumbɔr le nyan timi aabakaa mpaan pu. Ti mɔmɔk ga ŋa saanaagbiib la, ki kpee baah kan kiyikuuk ngbaan u aawan ponn ni na mu.”

¹⁷ Le Josef bui bi ke, “Aayii. Maan ŋmaa ŋa kina. See unii u ti kan kiyikuuk ngbaan waatuln ponn ni na le ga ŋa maanaagbiija. Nimi bi gur na ga ŋmaa gir kun nite chee ni laafee.”

Juda aah gaŋ Benjaminn pu pu na aabɔr

¹⁸ Le Juda foor duun Josef chee le ki bui u ke, “Uninkpel, ŋaanii, ki cha m len aa chee tibɔr mbaa pu. Taa gee m pu liŋuul, aa ŋma ubɔrkpaan Faro la.

¹⁹ Uninkpel, aa nan baa timi ke, ‘Nite beenin bi ii? bee ni ki kpa ninaal ubaa aa?’

²⁰ Le ti nan bui si ke, ‘Tite bi ki mu por sakpen; tinaal uwaatiir ubaa mu bi. Buyoonn tite por na le u ma u. Le uwaatiir ngbaan aakpel kpo a, uwaatiir ngbaan baanja le gur una aabibaal, ute mu gee u sakpen a; ba pu? uma le ye libigbiln.’

²¹ Uninkpel, le aa nan bui timi ke ti li joo ni u aan aa kan u,

²² le ti bui si ke ute aan kii ke u nya ki cha u, u yaa nyan kan, ute ga kpo.

²³ Le aa nan bui timi ke, ‘Kina kan, ti taa ki gir ni aa chee, see ti joo ni u.’

²⁴ “N‑yoonn mu ti gir kun na, le ti tuk tite saah len pu na mɔmɔk.

²⁵ Le tite ki bui timi ke ti gir ni ki nan daa tijikaar.

²⁶ Le ti giin bui u ke, ‘Taan ŋmaa buen uninkpel ngbaan chee; u nan bui ke tinaal uwaatiir yaa kaa dii ni timi kan, ti taa cha u kan timi. Tinaal yaa dii timi kan, ti mu ga buen.’

²⁷ Le tite bui timi ke, ‘Ni nyi ke mpuu Rachel ma mbijabim bilee baanja la.

²⁸ Ubaa puun nyan m chee a. Nibaakan, timoor ni aawan le nan chuu u, le maa ki kan u ki nan saa din wee.

²⁹ Ni yaa ki nyan umina mu m chee aan nibaa ti ŋa u kan, maah por sakpen pu na, nsuubiin sakpiin ga ku mi.’

^30-31 “Uninkpel, lik mbamɔm, m yaa gir kun kaa joo tinaal ngbaan kan, tite mu yaa bee ke waa dii timi kun ni kan, u ga kpo la. Waamɔfal bi waabo ngbaan le ni, le waah por sakpen pu na, nsuubiin kina aaboln ga ku u.

³² Ni kpee na le ye ke m nan di maamɔfal le puu tii ute, ubo ngbaan pu. M nan bui u ke ubo ngbaan yaa kaa gir ni kan, min le ye taani daan.

³³ Uninkpel, dandana wee, min le ga bee do, ki li ye saanaagbiija, aan ki cha bi di nnaal ngbaan kun ute chee.

³⁴ Ubo ngbaan yaa kaa dii timi kan, m ga ŋa kinye ki gir kun nte chee? Nte aah bi pu na, naa ŋan ke m joo ni tibɔbir kina aaboln u pu.”