Mpiin 43 - Uwumbɔr aagbaŋ

Josef aakpetiib ni binaal Benjaminn aah gir buen Ijipt aatiŋ ni pu na aabɔr

¹ Nkon ngbaan nan moo pɔɔk Kanaann aatiŋ ponn ni, ni ti nyaŋ,

² le Jakob do yaab nan jin tijikaar ti bi nan ti daa Ijipt aatiŋ ni na doo, le u bui ujapɔtiib ke, “Gir buen Ijipt aatiŋ ngbaan ni, ki ti ki daa ni tijikaar ti nan ji.”

³ Le ujapɔɔn Juda bui u ke, “Uja ngbaan nan sak timi sakpen a, ke ti yaa kaa joo ni tinaal uwaatiir kan, ti taa cha unimbil kan timi.

⁴ Aa yaa kii ke tinaal ngbaan dii timi kan, ti ga buen ti daa tijikaar tii ni si.

⁵ Aa yaa kaa kii kan, taan buen; ba pu? uja ngbaan nan bui ke u yaa kaa dii ni timi kan, ti taa ki cha u kan timi.”

⁶ Le Jakob bui bi, “Ba ŋa ni nan chinn ki tuk uja ngbaan ke ni kpa ninaal uwaatiir linampal?”

⁷ Le bi bui u ke, “Uja ngbaan le nan muk timi, ki baa timi aamaal aabɔr ke, ‘Nite beenin bi ii? Ni ki kpa ninaal ubaa aa?’ Ni mu ŋan ke ti giin kii u ibamɔn ponn ni. Taa nan nyi ke u ga bui timi ke ti li joo ni tinaal ngbaan.”

⁸ Le Juda bui ute ke, “Cha u dii mi, aan ti nya mala ki buen, ki ti joo ni tijikaar ki taa kpo nkon.

⁹ M ga di maamɔfal puu ke tinaal ngbaan yaa ŋa fam kan, min le ye taani daan n‑yoonn mu kaa kpa ndoon na.

¹⁰ Ti yaa kaa ba bii n‑yoonn kan, kina, naah saa pu na ti ba buen ŋitaa ŋilee man.”

¹¹ Le bite bui bi ke, “Ni yaa ye kina kan, li joo ipiin i nyan ni timi aatiŋ kee ponn ni ki ŋan sakpen na, ki ti tii uninkpel ngbaan: ni ban tulalee u nu mɔ na, ni tisiir, ni tikpin, ni ŋisubil ŋi mɔ na.

¹² Ni ki li joo ŋimombil nfum mulee pu; ba pu? ni ŋan ke ni li joo ŋimombil ŋi bi nan giin ŋa nimi aabɔtɔ tiib ponn ni na. Nibaakan bi nan chinn la.

¹³ Li joo ninaal man, aan ki gir ni mala.

¹⁴ Uwumbɔr Mpɔɔnsakpiindaan cheen nimi, ki cha uja ngbaan ti san nimi kinimbaak, ki giin Benjaminn ni nikpel uken na mu tii ni nimi. Min kan, ni yaa ye ke m ga kɔŋ maabim le kan, see ni ŋa kina.”

¹⁵ Le te aabitiib ngbaan ban ipiin ni ŋimombil nfum mulee pu, le bi ni Benjaminn dii buen Ijipt aatiŋ ni. Baah ti fuu na, bi nan buen Josef chee le ki ti di bibaa mɔk u.

¹⁶ Josef aah kan ke Benjaminn dii ukpetiib fuu ni na, le u bui waanaagbiija u lik udo na ke, “Di bijab bee buen ndo. M ni bima le ga kpaan ji tijikaar nwiin mue pu, kina pu na, lik kiwakork kibaa ki kɔr ki ŋa tijikaar.”

¹⁷ Le waanaagbiija ngbaan ŋa waah len pu na, ki di ukpetiib ngbaan buen udo.

¹⁸ Baah ban bi koo lidichal ngbaan ni buyoonn na, le ijawaan chuu bi, le bi dakl ke, “Nibaakan, ŋimombil ŋi bi nan giin ŋa timi aabɔtɔ tiib ni na pu, le bi ga li ban bi baa timi ŋaabɔr. Bi ga lir ti pu ki gaa timi aabon yee, le ki di timi ŋa waanaagbiib.”

¹⁹ Nima pu na, baah laa si mbisamɔb chee na, le bi bui unaagbiija na ke,

²⁰ “Timi aaninkpel, ti nan dan do n‑yoonn mubaa ki nan daa tijikaar.

²¹ N‑yoonn mu ti nyan do ki chaa kun na, le ti ti fuu nibaa chee ki buur bɔtɔ tiib le ki kan timɔk aamombil bi timi aabɔtɔ tiib ponn ni, ŋi mɔmɔk nan beenin bi. Ti giin joo ni ŋi, ti nan tii si.

²² Ti mu ki joo ni ŋimombil ti nan ki daa tijikaar ngbaan. Taa nyi unii u giin ŋimombil ngbaan di ŋa timi aabɔtɔ tiib ni na.”

²³ Le unaagbiija ngbaan bui bi ke, “Ni taa cha nisui bii, ki mu taa li san ijawaan man. Nibaakan, nimi, ni nite Aawumbɔr le ga li giin ŋi ŋa nimi aabɔtɔ tiib ni. Ni nan pan tii mi a.” Waah len kina na, le u buen ti joo ni Simeonn bi chee,

²⁴ le ki di bi koon lidichal ngbaan ni, le ki ban nnyun tii bi aan bi finn bitaa, le ki ban tijikaar tii baabon mɔmɔk.

²⁵ Le bi gor ki nyan ipiin i Josef yaa nan fuu ni udo kan, bi ga di tii u na ki joo; ba pu? bi nan ŋun ke bi ni Josef le ga nan kpaan ji tijikaar nwiin pu.

²⁶ N‑yoonn mu Josef nan fuu ni udo na, le bi di ipiin ngbaan buen u chee, ki ti gbaan unimbiin ni, ki di tii u.

²⁷ Le u baa bi baasachuln aabɔr, le ki baa bi ke, “Ni nan tuk mi nite, uninkpel na aabɔr, u bi kinye? U beenin bi ki kpa laafee ee?”

²⁸ Le bi bui u ke, “Saanaagbiija tite beenin bi ki mu kpa laafee.” Le bi gbaan unimbiin ni ki doon u.

²⁹ N‑yoonn mu Josef yaar kan unaal Benjaminn na, le u bui ke, “Naah nan tuk mi ninaal uwaatiir u aabɔr na sɔ ɔɔ? Maabo, Uwumbɔr ŋa aa pu tinyoor.”

³⁰ Josef aah yaar kan unaal na, le naah ŋa usui ponn ni pu na cha u koo waadiik ni ti wii.

³¹ Waah ti ŋmaa chuu ubaa buyoonn na, le u ban nnyun finn unimbil wɔb, le ki gir ni bi chee, ki bui waanaagbiib ke bi li joo ni tijikaar bi ji.

³² Le bi nan tii Josef waajikaar teebul ubaa pu, le ki tii ukpetiib teebul uken pu. Le Ijipt yaab bi nan ji tijikaar Josef do na, nan ji tijikaar teebul uken pu; ba pu? Ijipt yaab aa kpaani Hiibru yaab chee ki ji tijikaar.

³³ U nan cha bi kaan ukpetiib bi paa tɔb pu baah jer tɔb tininkpir ki ti saa uwaatiir pu na la. Le bi ni Josef ka tok tɔb. N‑yoonn mu bi kan kina na, le bi yaar lik tɔb, le ni gar bi.

³⁴ Unaagbiija nan yoor tijikaar Josef aateebul pu, le ki ti tii bi mɔmɔk, le u nan tii Benjaminn ma nfum muŋmu pu. Le bi ni Josef mɔmɔk nan kpaan ki jin ki nyun ti bab.