Mpiin 42 - Uwumbɔr aagbaŋ

Josef aakpetiib aah buen Ijipt aatiŋ ni pu na aabɔr

¹ Buyoonn Jakob ŋun ke tijikaar bi Ijipt aatiŋ ni na, le u bui ujapɔtiib ke, “Ba ŋa naan kpokl tɔb ki lik tijikaar aabɔr?

² M ŋun ke tijikaar bi Ijipt aatiŋ ni. Buen ki ti daa ni man aan ti taa kpo nkon.”

³ Nima pu le Josef aate aabim kipiik na buen Ijipt aatiŋ ni, bi ti daa tijikaar.

⁴ Jakob aa nan cha Josef aana aabo Benjaminn dii bi buen; ba pu? u nan dak ke nibaakan tiwan nibaa ga ti ŋa u nsan ni.

⁵ Le Jakob aajapɔtiib ni binib biken nan dii buen Ijipt aatiŋ ni, bi ti daa tijikaar; ba pu? nkon nan lir Kanaann aatiŋ ni.

⁶ Le Josef aah nan ye Ijipt aatiŋ ngbaan aayidaan ki lik tijikaar aabɔr pu na, uma le nan kooh tijikaar ngbaan tii dulnyaa aanib mɔmɔk. Nima pu na, Josef aakpetiib mu nan dan ki nan gbaan unimbiin ni.

⁷ N‑yoonn mu Josef kan ukpetiib na, le u bee bi, le u nan ŋa ke waah kaa nyi bi na. Le u baa bi liŋuul ni ke, “Ni nyan ni la?” Le bi giin bui u ke, “Ti nyan ni Kanaann aatiŋ ni, le ki dan ti nan daa tijikaar.”

⁸ Josef ma nan bee ukpetiib, bima le aa nan bee u.

⁹ U nan teer waah nan daŋ tidaŋ ti na aabɔr, le ki bui bi ke, “Ni ye bipepekb la; ni dan ke ni nan lik timi aatiŋ aah kaa kpa mpɔɔn nin chee na la.”

¹⁰ Bi nan bui u ke, “Uninkpel, aayii, ti ye saanaagbiib la, le ti dan ti nan daa tijikaar ti ji.

¹¹ Ti ye naabitiib, ni bininyaam la, taa ye bipepekb.”

¹² Le Josef ki giin bui bi ke, “Aayii. Ni dan ke ni nan lik timi aatiŋ aah kaa kpa mpɔɔn nin chee na la.”

¹³ Le bi bui u ke, “Uninkpel, ti nan ye naabitiib kipiik ni bilee la, ujabaan aabim, le ki nyan ni Kanaann aatiŋ ni. Ti ponn ni ubaa kpo a, le uwaatiir gur ki bi tite chee linampal.”

¹⁴ Le Josef beenin dii bi, ki bui bi ke, “Ni sil ye bipepekb la.

¹⁵ Maah ga ŋaŋ nimi pu na sɔ: m puu ubɔrkpaan Faro aayimbil pu ke maan cha ni ki gir kun see ni joo ni ninaal uwaatiir ngbaan m chee.

¹⁶ Ni ponn ni ubaa le ga gir kun ki ti li joo ni u. Nimi bi gur na ga li bi kiyondiik ni, le ti ti bee mbamɔn chee. Ni yaa kaa ŋa kina kan, ubɔrkpaan aayimbil pu, ni sil ye bipepekb la.”

¹⁷ Le u di bi ŋa kiyondiik ni, ki ti saa iwiin itaa.

¹⁸ Nwiin tatar daal, le Josef bui bi ke, “M ye unii u san Uwumbɔr na la, m mu ga siin nimi tibɔr tibaa le ki nyan nimi lii.

¹⁹ Naah ga mɔk mi nimi aabamɔn chee pu na sɔ, ni ponn ni ubaa le ga bee do, kiyondiik ni, le bi gur na di tijikaar ti ni daa na gir kun, ki ti kpiin nimi aamaal,

²⁰ aan ni ti gir ni, ki li joo ni ninaal uwaatiir ngbaan m chee. Nima kan, m ga bee ke ni len mbamɔn, le ki mu aan ku nimi.” Le bi kii waah len pu na,

²¹ le ki bui tɔb ke, “Mbamɔn, taah nan ŋa tinaal bakaa u na, ti bi ji waafalaa le din wee na; ti nan kan waafalaa buyoonn u nan gaŋ timi waamɔfal pu na, le ti yii, kaa ter u. Nima pu le dandana wee ti bi ji falaa umina.”

²² Le Rubenn bui bi ke, “M nan tuk nimi ke ni taa ŋa tinaal ngbaan bakaa, le ni nan yii ke naan ŋun tii mi. Le dandana wee, waakun pu, ti bi ji falaa.”

²³ Josef nan nyi baah bi len pu na, bima le aa nan bee; ba pu? bi nan nabr baah len pu na la.

²⁴ Le Josef siir bi chee ki ti wii pam. N‑yoonn mu u ti ŋmaa chuu ubaa, kaa ki wii na, le u gir ni bi chee, le ki nyan Simeonn, le ki cha bi buu u iŋmin, biken aanimbil ni.

Josef aakpetiib aah gir kun Kanaann aatiŋ ni pu na aabɔr

²⁵ Le Josef tuk waanaagbiib ke bi ban tijikaar gbiin ukpetiib aabɔtɔ tiib, ki giin baamombil ŋa bi ponn ni, ki ki ban tijikaar tii bi, bi ti ji nsan ni. Le bi ŋa kina.

²⁶ Le ni woln kitaak, le ukpetiib ngbaan mɔmɔk di baajikaar paan baabon pu, le ki siir buen.

²⁷ Bi nan ti fuu nibaa chee ki ban bi doon kinyeek, le ubaa chuu buur waabɔtɔ ke u ŋa waabon tijikaar, le ki kan ŋimombil ŋi u ba di daa tijikaar ngbaan na bi bɔtɔ ponn ni.

²⁸ Le u bui biken na ke, “Maamombil le bi ki giin di ŋa bɔtɔ ponn ni na, ŋima sɔ.” Le bipobil yuk, le bi baa tɔb ke, “Ba ŋa Uwumbɔr ŋa timi kina?”

²⁹ N‑yoonn mu bi ti fuu bite Jakob do Kanaann aatiŋ ni na, le bi tuk u baah kan pu na mɔmɔk ke:

³⁰ “Ijipt aatiŋ ni aaninkpel len ti chee tibɔr liŋuul ponn ni, ki galn timi ke ti ye bipepekb la.

³¹ Le ti bui u ke taa ye bipepekb, ti ye bininyaam la,

³² ti nan ye te aabitiib kipiik ni bilee la, ujabaan aabim, le ti ponn ni ubaa kpo, le uwaatiir gur ki bi Kanaann aatiŋ ni, tite chee.

³³ Le uja ngbaan bui ke waah ga ŋa pu ki bee ke ti ye bininyaam na, see ti ponn ni ubaa gaar, aan biken na di tijikaar gir kun ki ti kpiin timi aamaal,

³⁴ ki ti li joo ni uwaatiir ngbaan, le u ga bee ke taa ye bipepekb, ti ye bininyaam la, le u ga giin tiŋeer ngbaan tii timi, aan ti li bi kitiŋ ngbaan ni ki daa tijikaar.”

³⁵ Le bi mɔmɔk kpenn nyan tijikaar baabɔtɔ tiib ponn ni, ki kan ŋimombil ŋi bi di daa ti na, le bi ni bite aah kan ŋimombil ngbaan kina na, ijawaan chuu bi.

³⁶ Le bite bui bi ke, “Ni ban ke m taa ki li kpa ubo ubaa la aa? Josef aa ki bi, Simeonn mu aa ki bi, le dandana wee ni ban ni nyan Benjaminn mu m chee. Min le ji falaa.”

³⁷ Le Rubenn bui ute ke, “M yaa kaa giin ni Benjaminn kan, chuu maabijabim bilee bee, ki ku teen. Di u ŋa ŋŋaal ni, m ga giin ni u.”

³⁸ Le Jakob nan bui u ke, “Maabo ngbaan aan dii si; ukpel kpo a, uma baanja le gur. Nibaakan tiwan nibaa ga ti ŋa u nsan ni. M por a, maabo umina mu yaa ki kpo kan, nsui ga bii sakpen ki cha m kpo.”