Mpiin 40 - Uwumbɔr aagbaŋ

Josef aah nabr binaagbiib biken aadaŋ pu na aabɔr

¹ Buyoonn Josef nan bi kiyondiik ni na, le Ijipt aabɔrkpaan aatutum bilee nan ŋa bakaa ubaa. Ubaa le nan ye uja u tii u ndaan na, le uken mu nan ye binib bi ŋani boroboro na aaninkpel.

² Le liŋuul chuu ubɔr ngbaan,

³ le u di bi ŋa kiyondiik ni, waajab aaninkpel do, nin chee Josef bi na.

⁴ Bi nan yunn nima chee. Le uninkpel ngbaan bui Josef ke u li lik bi.

⁵ Kinyeek kibaa, le uja u nan tii ubɔr ndaan na, ni biboroboroŋam aaninkpel na mɔk daŋ tidaŋ, le baadaŋ ngbaan mɔmɔk aatataa aa kpaa.

⁶ Le ni woln kichakpiik ni, le Josef dan bi chee, ki kan ke baa kpa mpopiin.

⁷ Le u baa bi ke, “Din wee, ba ŋa ni lik kina? Naa mɔ nimi.”

⁸ Le bimɔk bilee giin bui u ke, “Kinyeek na le timɔk bilee daŋ tidaŋ, le taa nyi unii u ga ŋmaa nabr taatataa tii timi na.” Le Josef bui bi ke, “Ni ye Uwumbɔr le tii unii nlan le u ŋmaa nabr tidaŋ aatataa. Nima pu na, bui mi tidaŋ ngbaan man.”

⁹ Le uja u nan bi ubɔr chee ki tii u ndaan na bui ke, “Maadaŋ ponn ni, m kan busub bu lu ndaan aasubil na si nnimbiin ni,

¹⁰ ki kpa ibon itaa. Bu aah bunn tifar na, le mpuun nyan, le bu lun ŋibil ki puir.

¹¹ Le m ki joo ubɔr aadayikuuk, ki ker ŋisubil ngbaan, ki ŋmaan ŋa kidayikuuk ngbaan ni, le ki di tii ubɔr.”

¹² Le Josef bui ke, “Tidaŋ ngbaan aatataa le ye ke ibon itaa na ye iwiin itaa mu la.

¹³ Iwiin itaa daal kan, ubɔr ngbaan ga nyan si kiyondiik ni, ki di cha pinn si, le ki giin si saatuln ni.

¹⁴ Tɔ, njɔ, aa yaa ti bi ubɔr chee kan, teer mbɔr aan u nyan mi kiyondiik ni.

¹⁵ Maah bi do na, bi tɔk mi Hiibru yaab aatiŋ ni la, le maah bi Ijipt aatiŋ ni do na, maa ŋa nibaa le bi di mi ŋa kiyondiik ni.”

¹⁶ N‑yoonn mue biboroboroŋam aaninkpel na aah kan ke Josef nabr uken aadaŋ ni ŋan na, le u mu bui Josef waadaŋ aabɔr ke, “M tu tibɔɔkur titaa le n‑yil pu.

¹⁷ Le boroboro aabɔŋ bi paacham aabɔɔkuuk ponn ni, ki ye ubɔr yaan, le inyoon choo nan ji boroboro ngbaan.”

¹⁸ Le Josef giin bui u ke, “Tɔ, naatataa le ye ke tibɔɔkur titaa na ye iwiin itaa la.

¹⁹ Iwiin itaa daal kan, ubɔr ga nyan si kiyondiik ni ki ti chuu gii aayil. Le u ga di saawon di leen idɔ pu, le inyoon ga dan nan ji saawon ngbaan.”

²⁰ Le ni saa iwiin itaa daal, ni mu nan tuur baah nan ma ubɔrkpaan nwiin mundaal na la; le u cha bi ŋa tijikaar, le ki yin bininkpiib bimɔk paa u pu na, bi nan ji njim ngbaan; liyaadaal ngbaan le u nan cha bi nyan ni waanaagbiib bilee na kiyondiik ni, ki di bi dan u ni waaninkpiib ngbaan chee.

²¹ U nan ki giin uja u nan tii u ndaan na waatuln ni,

²² le ki cha bi ku biboroboroŋam aaninkpel na. Josef aah nan len pu na, ni nan ŋa kina la.

²³ Tɔ, uja u nan tun ndaan aatuln na aa nan ki dakl Josef aabɔr kpala, u nan suln waabɔr a.