Mpiin 4 - Uwumbɔr aagbaŋ

Kainn ni Abel aabɔr

¹ Adam nan doon upuu chee, le u dek lipuul, ki ma ubijabo, le ki bui ke u kan ubo, Uwumbɔr aaterm pu, nima pu na, u ga yin u ke Kainn.

² Ki joo cha, le Adam aapuu ki dek, le ki ki ma ubijabo, bi yi u ke Abel. Kainn nan ye ukpaal, le Abel mu nan ye upihdaan.

³ Le n‑yoonn mubaa, Kainn nan chee waajikaar, ki joo ni waajikaar ngem, ki nan tii Uwumbɔr ipiin.

⁴ Le Abel mu nan lik waapiih ponn ni waapihninkpel aah pue ma njan aapihbo u na, ki di toor kitork, ki di tinann ti kpa nkpan na ki tii Uwumbɔr. Le Uwumbɔr pak Abel ni waapiin,

⁵ le ki yii Kainn ni waapiin. Le Kainn gee liŋuul pam, le unimbil wɔb bii.

⁶ Le Uwumbɔr baa u ke, “Ba ŋa aa gee liŋuul? Ba ŋa aanimbil wɔb bii?

⁷ Aa yaa kaa ba tun titunwanbir kan, maan pak saapiin aa? Tɔ, saah tun taani na, titunwanbir si gbɔk si, ki ban ti di si ŋa taanaagbiija, see aa nyaŋ ti.”

⁸ Le ni bi cha, le Kainn nan bui unaal Abel ke, [“Cha ti buen timoor ni.”] N‑yoonn mu bi bi timoor ni na, le u ti ku unaal Abel.

⁹ Nee aapuwɔb le Uwumbɔr baa Kainn ke, “Aanaal Abel bi la?” Le Kainn bui ke, “Maa nyi. Min le ye u lik u na aa?”

¹⁰ Le Uwumbɔr ki baa u ke, “Ba ŋa aa ŋa kina? Aanaal aasin bi kitiŋ ki wii, ki mɔk ke sin le ku u.

¹¹ M ga daa aatafal. Saan ki ŋmaa ko kitiŋ. Saah ku aanaal na, waasin bii kitiŋ tii si a.

¹² Le aa yaa ki ko kan, kitiŋ aan ŋa tijikaar mbamɔm ki tii si, le aa ga li gonni, ni kookoo, ki ga li ye uchayiin dulnyaa wee ni.”

¹³ Le Kainn bui Uwumbɔr ke, “Aa daa ntafal ki ti chaar jer a.

¹⁴ Aa nyan mi kitiŋ kee pu a, le ki chuu paar aaŋaal m pu. Maan ki li kpa maah ga koo nin chee na. Le maah ga li ye uchayiin pu na, unii umɔk kan mi na ga ku mi.”

¹⁵ Le Uwumbɔr daan Kainn kidaan, ubaa taa ku u, le ki bui ke unii umɔk yaa ku u na kan, bi ga ku binib bilole le ki teen lipɔln.

¹⁶ Le Kainn siir Uwumbɔr chee, ki buen kitiŋ kibaa ni, bi yin ki ke “Chuun Gonni,” ki bi Edenn aawipuul wɔb la.

Kainn aamaal

¹⁷ Kainn aapuu nan dek, ki ma ubijabo, ki yin u ke Enok, le Kainn aah nan bi nin chee na nan ŋa kitiŋ, le u di ujapɔɔn ngbaan aayimbil, ki di yin kitiŋ ngbaan.

¹⁸ Le Enok mu ma Irad, Irad mu ma Mehujael, Mehujael mu ma Metusael, Metusael mu ma Lamek.

¹⁹ Lamek nan kpa bipiib bilee, bi nan yin ubaa ke Ada, ki yin uken na ke Sila.

²⁰ Ada nan dek le ki ma Jabal, uyaabitiib le ye binib bi kpaa tiwakor ki chuun yiini na.

²¹ Jabal aanaal le bi nan yin u ke Jubal, uyaabitiib le ye binib bi pii ki gbaa tiwan ki joo gaa ilahn na.

²² Sila mu nan dek ki ma Tubal‑Kainn, uma le nan ye uchaa. Naama le nan ye Tubal‑Kainn aaninkpan.

²³ N‑yoonn mubaa le Lamek bui upuutiib ke, “Sin Ada ni Sila, li pel maah len pu na man, unachipɔɔn ubaa faa mi, le m ku u.

²⁴ Unii yaa ku Kainn aan binib bilole yaa ga kpo ki pa lipɔln ngbaan kan, unii yaa ku m mu kan, binib imonko itaa ni kipiik ni bilole le ga kpo ki pa maapɔln.”

Sef ni Enos aabɔr

²⁵ Adam ni upuu nan ki ma ubijabo uken. Le upii ngbaan bui ke, “Uwumbɔr ki tii mi ubijabo u leŋ Abel u Kainn nan ku na aaleleŋ.” Nima pu le u yin u ke Sef.

²⁶ Le Sef mu ma ubijabo le ki yin u ke Enos. N‑yoonn ngbaan le binib piin ki dooni Uwumbɔr aayimbil li bi chain na.